Pagkatapos na iselebrar an Paskuwa kan 30 C.E., si Jesus asin an saiyang mga disipulo naghali sa Jerusalem. Pero, dai sinda diretsong nagpuli sa saindang mga harong sa Galilea. Nagpasiring nguna sinda sa mga banwaan kan Judea, kun sain nagbawtismo sinda nin dakul na tawo. Mga sarong taon na man na naggigibo kaiyan si Juan Bautista, asin an nagkapira sa mga disipulo niya kaibanan niya pa man giraray, posibleng sa kababan kan Salog nin Jordan.

Si Jesus mismo dai nagbawtismo—an mga disipulo niya an pinagbutan niyang gumibo kaiyan. Sa panahon na ini kan ministeryo ni Jesus, siya asin si Juan parehong nagtutukdo sa mga Judiong nagsusurulsol kan saindang mga kasalan sa tipan na Katugunan nin Diyos.—Gibo 19:4.

Pero an mga disipulo ni Juan nauuri, kaya nagreklamo sinda sa saiya manungod ki Jesus: “Su lalaking nakaiba mo . . . nagbabawtismo siya, asin gabos nagduduman sa saiya.” (Juan 3:26) Pero, dai man nauuri si Juan. Nauugma siya sa kapangganahan ni Jesus asin gusto niyang mag-ugma man an mga disipulo niya. Ipinagirumdom sa sainda ni Juan: “Kamo mismo makakapagpatotoo na sinabi ko, ‘Bako ako an Cristo, kundi isinugo ako na mainot sa saiya.’ ” Tanganing maintindihan ini kan gabos, guminamit siya nin arog kaining halimbawa o ilustrasyon: “An nobya para sa nobyo. Alagad an amigo kan nobyo, pag nagtindog siya asin nadangog niya an nobyo, dakulaon an saiyang kaugmahan dahil sa boses kan nobyo. Kaya an sakuyang kaugmahan nagin lubos na.”—Juan 3:28, 29.

Si Juan, arog kan amigo kan nobyo, nag-ugma mga pirang bulan na an nakaagi kan ipamidbid niya ki Jesus an mga disipulo niya. An nagkapira sa sainda nagsunod ki Jesus asin maabot an panahon na sinda lalahidan nin banal na espiritu. Gusto niya na an mga disipulong kaiba niya ngunyan sumunod man ki Jesus. Sa katunayan, an katuyuhan ni Juan iyo na iandam an dalan para sa ministeryo ni Jesus. Nagpaliwanag siya: “Siya kaipuhan na padagos na magdakul, pero ako kaipuhan na padagos na magdikit.”—Juan 3:30.

Pakalihis nin dakul na taon, an saro pang Juan, na nagin nang parasunod ni Jesus bago kaini, nagsurat mapadapit sa pinaghalian asin panginot na papel ni Jesus sa kaligtasan kan katawuhan: “An saro na gikan sa itaas nakakalabi sa gabos na iba pa. . . . Namumutan kan Ama an Aki asin an gabos na bagay itinao niya sa saiyang kamot. An nagtutubod sa Aki may buhay na daing katapusan; an minasuway sa Aki dai magkakamit nin buhay, kundi an kaanggutan nin Diyos nagdadanay sa saiya.” (Juan 3:31, 35, 36) Saro nanggad ining mahalagang katotoohan na dapat maaraman kan mga tawo!

Dai nahaloy pagkatapos sabihon ni Juan Bautista na an saiyang papel asin gibuhon dapat na magdikit, inarestar siya ni Hading Herodes. Kinua ni Herodes si Herodias, an agom ni Felipe na tugang niya sa ama, para magin agom. Kan hayagan na ibinuyagyag ni Juan an ginigibong pagsambay na ini ni Herodes, iprineso siya kaini. Kan mabaretaan ni Jesus an manungod sa pag-arestar ki Juan, naghali siya sa Judea kaiba an saiyang mga disipulo asin ‘nagpasiring sa Galilea.’—Mateo 4:12; Marcos 1:14.