Éyoñe be maneya jeme Pâque ya mbu 30 É.J., Yésus ba beyé’é bé ba kôlô Jérusalem. Ve jame da, be nji bulane menda map e Galilée éyoñe jia. Ba ke si ya Judée; vôm ate, ba du abui bôt. Jean Baptiste fe a nga bo aval ésaé ete bebé ngumba mbu, a beyé’é bé béziñ be ngenan a nye, éko éziñ mbi’ili ya Ôsôé Jourdain.

Yésus émien a nji du bôt, ve nnye a tebele beyé’é bé asu na be bo de. Éyoñe ji, ésaé nkañete Yésus aval ane ji Jean é ne na, be ye’ele Bejuif na, be kôñelane minlem a jôban abé dap amu be nji ba’ale Atiñe ya élat.​—Mam Minlôman 19:4.

Ve beyé’é be Jean ba bo éviele ajô Yésus, a ba ke so’o nye be Jean a jô na: “Môt ate [Yésus] mia nye mi nga to . . . a baptizô bôt, a bôte bese be ake be nye.” (Jean 3:26) Ve jame da, Jean nye a nji bo éviele. A wô’ô meva’a ya yeme na, ésaé Yésus ja wulu mvo’é, ajô te a yi na beyé’é bé be’ fe be vak a nye. Jean a ba’alane be na: “Miabebien mi ayem ane me nga jô mia na, Me nji bo Krist, me nga zu nye nlôman ôsu.” A nyoñ éve’an asu na a volô be na be tu’a kôme wôk a jô’ô na: “Môt a bili mbom, émien a ne nnôm; môt a ne mvôé nnôm, a tebe a wô’ô nye, a dañe wô’ô mvaé amu a wô’ô tyiñe nnôm: ava’a dam e jaéya amu ajô di.”​—Jean 3:28, 29.

Aval ane mvôé nnôm, Jean a nga too meva’ été abui bengon ôsu, éyoñ a nga liti Yésus beyé’é bé. Bevo’o y’été be nga tôñe Yésus, a bo miñwo’ane mvuse ya valé. Jean a yi fe na beyé’é bé be nga’an a nye be tôñe fe Yésus. Da yené na, nsôñane Jean ô ne na, a kôme zen asu ésaé nkañete Krist. Jean a kate na: “Nnye a yiane nenenen, ve ma me ayiane wulawulan.”​—Jean 3:30.

Jean mfe, nyô a nga taté na a wulu a Yésus, a nga su’ulan tili a lat a vôme Yésus a so, a ésaé a bili asu na a nyii bone be bôte na: “Môt a so yôp a dañe bôte bese. . . . Esa a nye’e Mon, ane a nga ve nye mam mese mo. Môt a buni Mon, nnye a ne ényiñ ya melu mese; ve môt a bo te wô’ô Mon, a ye yen ényiñ ya melu mese, Zambe a ye bo ve yaa ajô dé.” (Jean 3:31, 35, 36) Nga jam ete e ne nya ajôô a ne mfi bôte bese ba yiane yem?

Ayab éyoñ é nji lôt mvuse ya na Jean Baptiste a jô na ésaé jé ja yiane sis, nde Njô bôte Hérode a nga bi nye. Hérode a nga nyoñe Hérodiade, minga monyañe wé Philippe, a lu’u nye. Éyoñe Jean a kobô ajô ya mejiane mé e bôt été, Hérode a ke futi nye mimbôk. Éyoñ a wô’ôya na be biya Jean, Yésus a kôlô Judée a beyé’é bé a ba ‘ke si ya Galilée.’​—Matthieu 4:12; Marc 1:14.