Apre ki Zezi ek son bann disip in selebre Lapak lannen 30, li ek son bann disip i kit Zerizalenm. Me selman zot pa retourn direkteman kot zot Galile. Zot al dan lakanpanny Zide kot zot batiz en kantite dimoun. Pour apepre en an aprezan, Zan ki batize pe fer en travay en pe parey dan vale Larivyer Zourden. Serten bann disip Zan i ankor avek li.

Zezi li menm pa batiz personn, me son bann disip i fer sa anba son direksyon. Ziska prezan, Zezi ek Zan pe ansenny bann Zwif ki’n repantir akoz zot in fer pese kont lalyans Lalwa Bondye.​—Akt 19:4.

Me bann disip Zan i zalou e zot konplent avek li lo Zezi. Zot dir: “Sa zonm [Zezi] ki ti avek ou . . . pe batiz dimoun e zot tou zot pe al kot li.” (Zan 3:26) Me Zan pa zalou li. I kontan pour Zezi e i oule ki son bann disip osi i kontan. Zan i fer zot rapel: “Zot menm, zot in tande ler mon ti dir, ‘Mwan mon pa Kris me mon’n ganny anvoye par devan li.’” I servi en legzanp pour eksplike ki sa i vedir dan en fason ki tou dimoun i kapab konpran. I dir: “Se nouvo marye ki annan nouvel marye. Me ler zanmi nouvo marye i o bor li e i tann li koze, i dan en gran lazwa akoz i tann lavwa nouvo marye. Pareyman mwan osi mon dan en gran lazwa.”​—Zan 3:28, 29.

Detrwa mwan avan sa, Zan konman zanmi nouvo marye ti kontan pour entrodwi son bann disip avek Zezi. Serten parmi zot ti swiv Zezi e pli tar zot ti pou ganny swazir par lespri sen. Zan i osi anvi ki bann disip ki ankor avek li i swiv Zezi. Anfet, lobzektif Zan se ki i prepar semen pour Kris fer son minister. Zan i eksplike: “Sa enn i devret kontinyen ogmante me mwan mon pou kontinyen diminyen.”​—Zan 3:30.

Pli tar, en lot Zan, ki’n konmans swiv Zezi pli boner, i ekri konsernan lorizin Zezi ek son rol enportan pour sov limanite: “Sa enn ki sorti anler i par lao tou dimoun. . . . Papa i kontan son Garson e i’n donn li lotorite lo tou keksoz. Sa enn ki demontre lafwa dan Garson i ganny lavi eternel, sa enn ki dezobei Garson pa pou ganny lavi, me i pou eksperyans lakoler Bondye.” (Zan 3:31, 35, 36) Pa i enportan ki dimoun i konn sa!

Pa bokou letan apre ki Zan ki batize in dir ki i pou fer mwens, Lerwa Erod i fer li ganny arete. Erod in pran Erodyad, madanm son demi frer Filip e i’n marye avek li. Ler Zan i dir devan tou dimoun ki Erod in komet adilter, Erod i fer li ganny mete dan prizon. Ler Zezi i tande ki Zan in ganny arete, i kit Zide avek son bann disip e zot “al Galile.”​—Matye 4:12; Mark 1:14.