Пирӗн эрӑри 30 ҫулхи Пасха уявне паллӑ тунӑ хыҫҫӑн Иисуспа унӑн вӗренекенӗсем Иерусалимран тухса каяҫҫӗ. Анчах вӗсем килне Галилейӑна тӳрех таврӑнмаҫҫӗ. Малтан вӗсем Иудейӑна каяҫҫӗ те унта нумай ҫынна шыва кӗртеҫҫӗ. Шыва кӗртекен Иоанн, Иордан айлӑмӗнче пулас, пӗр ҫулталӑк хушши ӗнтӗ ҫавнах тӑвать. Унӑн хӑш-пӗр вӗренекенӗсем вара халӗ те унпа пӗрле.

Иисус хӑй никама та шыва кӗртмест, вӑл пӑхса тӑнипе унӑн вӗренекенӗсем ҫавна тӑваҫҫӗ. Иисусӑн сӑваплӑ ӗҫӗн ҫак тапхӑрӗнче вӑл та, Иоанн та иудейсене — Турӑ Саккунӗн килӗшӗвне хирӗҫ тунӑ ҫылӑхӗсемшӗн ӳкӗнекенскерсене — вӗрентеҫҫӗ (Апостолсен ӗҫӗсем 19:4).

Анчах та Иоанӑн вӗренекенӗсем кӗвӗҫнипе Иисус пирки ӳпкелешсе Иоана ҫапла калаҫҫӗ: «Санпа пӗрле Пулнӑскерӗ [Иисус]... шыва кӗртет, пурте Ун патне ҫӳреҫҫӗ» (Иоанн 3:26). Иоана илес пулсан, унӑн кӗвӗҫес шухӑш ҫук. Вӑл Иисусӑн сӑваплӑ ӗҫӗ ӑнса пынӑшӑн савӑнать, хӑйӗн вӗренекенӗсем те ҫавӑншӑн савӑнччӑр тет. Иоанн вӗсене аса илтерет: «Эпӗ хам ҫинчен: „эпӗ Христос мар, мана Ун умӗнчен янӑ“ тенине эсир хӑвӑрах ҫирӗплетсе пама пултаратӑр». Вӑл пурте ӑнланма пултаракан тӗслӗх илсе парать: «Хӗр ҫураҫнӑ ҫын кӗрӳ пулать; ӑна итлесе тӑракан юлташӗ, кӗрӳ сассине илтсе, савӑнса-хӗпӗртесе тӑрать: мана ҫав тулли савӑнӑҫ ҫитрӗ ӗнтӗ» (Иоанн 3:28, 29).

Темиҫе уйӑх маларах Иоанн, кӗрӳн юлташӗ пулнӑ май, хӑйӗн вӗренекенӗсене хаваспах Иисуспа паллаштарнӑ. Вӗсенчен хӑш-пӗрисем Иисус хыҫҫӑн кайнӑ та каярахпа вӗсене святой сывлӑшпа суйласа лартнӑ. Иоанн хӑйӗн ытти вӗренекенӗсем те Иисус хыҫҫӑн ҫӳреччӗр тет. Вӗт Иоанӑн тӗллевӗ — Христос валли ҫул хатӗрлесе хурасси. «Унӑн асла тухмалла, манӑн кӗҫӗне юлмалла»,— тесе ӑнлантарать Иоанн (Иоанн 3:30).

Тепӗр Иоанн, Христосӑн вӗренекенӗ, Иисус ӑҫтан килни пирки тата вӑл ҫынсене ҫӑлас тӗлӗшрен тӗп вырӑн йышӑнни пирки каярахпа ҫапла ҫырса хурать: «Ҫӳлтен Килекенни вара пуринчен те аслӑ. [...] Ашшӗ Ывӑлне юратать, Вӑл пӗтӗмпех Унӑн аллине панӑ. Ывӑлне ӗненекен ӗмӗрлӗх пурӑнӑҫлӑ. Турӑ Ывӑлне ӗненмен [«пӑхӑнман», ҪТ] ҫын пурӑнӑҫ кураяс ҫук, ун ҫинче Турӑ ҫилли тӑрать» (Иоанн 3:31, 35, 36). Ҫак питӗ кирлӗ чӑнлӑха пурин те пӗлмелле!

Иоанн хӑйӗн кӗҫӗне юлмалла, ӗҫӗ чакса пымалла тенӗ хыҫҫӑн кӑштах вӑхӑт иртсен, Ирод патша ӑна тытса хуптарать. Ирод хӑйӗн пӗртӑванӗн Филипӑн арӑмне, Иродиадӑна, качча илет. Иоанн ӑна аскӑн ӗҫ туни пирки халӑх умӗнче питлесен, Ирод ӑна тӗрмене хупать. Ҫакӑн ҫинчен илтсен, Иисус хӑйӗн вӗренекенӗсемпе Иудейӑран тухать те Галилейӑна ҫул тытать (Матфей 4:12; Марк 1:14).