Thupene la hna sine la Paseka ne la 30 M.K., hnei Iesu me itretre drei nyidrë hna tro qa Ierusalema. Ngo tha bëeke kö angatr kowe la zi i angatr e Galilaia. Hnei angatre hna trongëne la nöje Iudra me bapataisone la ka ala nyim. Ca macatre ne kuca Ioane Bapataiso la huliwa cili. Ce angeice pala kö me itre xa atre dreng, ma angatre jë ngöne la itre wetr ne la Hneopegejë Ioridrano.

Pëkö ala cas hnei Iesu hna sipu bapataison—ngo itretre dreng a kuca thenge la hna amekötin hnei nyidrë. Matre ngöne la ijine cili ne la huliwa i Iesu, nyidrëti hë me Ioane a hamë ini kowe la itre atre Iudra ka ietra, pine angatr ena lo isisinyikeu ne la Wathebo i Akötresie.—Itre Huliwa 19:4.

Qa ngöne lai, hnei itretre drei Ioane hna zalu me eetre pi Iesu. Öni angatr koi Ioane: “Ame lo atr [Iesu] ka ce me nyipë. . . angeice fe a hane bapataiso atr, nge ala nyimu la itre ka tro koi angeic.” (Ioane 3:26) Ngo goi tha zalu fe Ioane. Angeice pe a madrine la aqane tro loi la huliwa i Iesu, nge angeic a ajane tro fe la itretre drei angeic a hane madrin. Matre angeic a amekunë angatr ka hape: “Drenge hi nyipunieti lo eni a qaja ka hape, ‘Tha Keriso kö ni, ngo hna upi ni pe qëmeke i nyidrë.’  ” Angeic a xome pi la ketre ceitun matre trotrohnine jë angatr, öni angeic: “Eje thene la atre xötrei faipoipo la föi angeic. Ngo ame la sinee ne la atre xötrei faipoipo, angeic a mejë me madrin la kola drenge la aqane ewekë ne la atre xötrei faipoipo. Celë hi matre pexeje hë la madrineng.”—Ioane 3:28, 29.

Tune la itre sinee ne la atre faipoipo, hnei Ioane hna madrin itre treu qëmeken, me upe koi Iesu la itretre drei angeic. Matre hnei itre xan hna xötrethenge Iesu, ame hna ië angatr e thupen hnei uati hmitrötr. Ngo aja i Ioane pala hi tro la itretre drei angeic enehila a hane xötrethenge Iesu. Eje hi, ame la aja i Ioane, tre troa hnëkë gojeny kowe la huliwa i Keriso. Matre öni angeic: “Tro nyidrëti a draië, nge tro pena ni a patre trootro.”—Ioane 3:30.

Hnei Ioane, ketre atre drei Iesu, hna cinyihane la qaane i Iesu, me hnëqa ka sisitria i nyidrë troa amele nöjei atr. Öni angeic: “Ame la atre ka qaa hnengödrai, tre, ka draië kö hune la nöjei atr asë. . . . Kem a hnimi Nekön, matre nyidrëti a nue la nöjei ewekë kowe la iwanakoime ne la Nekön. Nge ame la atre amamane la lapaune i angeic kowe la Nekön, tro hë angeic a kapa la mele ka pë pun, ngo ame la atre tha drengethenge la Nekön, tha tro kö angeic a hane öhne la mel, ngo tro ha eje thei angeic la elëhni i Akötresie.” (Ioane 3:31, 35, 36) Drei la ketre ini ka tru kowe la itre atr!

Tha qea kö thupene la Ioane Bapataiso a qaja ka hape, tro hë la huliwa me hnëqa i angeic a patre trootro, nge akalabusi angeice jë hi hnei Herodra Joxu. Hnei Herodra lo hna faipoipo me Herodia, föi Filipo lo trejine me angeic. Matre ame la Ioane a qaja amamane la aqane nyixetë i nyidro, Herodra a akalabusi angeice ju. Nge ame ju hi la Iesu a drenge ka hape, ase hë akalabusi Ioane, nyidrëti a feke jë qa Iudra me itretre dreng ‘a tro Galilaia.’—Mataio 4:12; Mareko 1:14.