Iesu bona ena hahediba taudia be 30 C.E. ena Pasova aria idia karaia murinai, Ierusalema idia rakatania. To, maoromaoro Galilea dekenai idia giroa lasi. Idia be Iudea dekenai idia lao, bona unuseniai momo idia bapatisoa. Ioane Bapatiso be lagani ta bamona lalonai unai gaukara ia karaia, reana Ioridane Sinavai ena koura ai. Iena hahediba taudia haida be ia idia bamoa.

Iesu ese taunimanima ia bapatisoa lasi, to iena hakaua henunai ena hahediba taudia ese unai idia karaia. Unai nega lalonai, Iesu bona Ioane be Iuda taudia idia hadibaia, unai Iuda taudia be Dirava ena Taravatu gwauhamatana idia makohia dainai idia helalo-kerehai.​—Kara 19:4.

To Ioane ena hahediba taudia idia mama, bona Iesu idia maumauraia, idia gwau: “Guna Ioridane kahanai oi ida ia noho tauna [Iesu] . . . be taunimanima ia bapatisoa bona ibounai be ia dekenai idia lao noho.” (Ioane 3:26) To Ioane ia mama lasi. Ia be Iesu ia karaia gaukarana dainai ia moale bona ia ura ena hahediba taudia idia moale danu. Ioane ese ia hamaorodia: “Umui danu umui kamonai vadaeni lau gwau, ‘Lau be Keriso lasi, to Dirava ese unai tauna vairanai lau ia siaia.’” Unai idia lalopararalaia totona, inai haheitalai ia gwauraia: “Headava matamata tauna ese headava matamata hahine ia abia. To headava matamata tauna ena turana be ia badinai ia gini bona ena gadona ia kamonai neganai, ia moale bada. Unai hegeregerena egu kudouna be moale amo ia honu.”​—Ioane 3:28, 29.

Ioane be headava matamata tauna ena turana bamona, ia be hua haida gunanai, mai moale ida ena hahediba taudia dekenai Iesu ia herevalaia. Idia haida be Iesu murinai idia raka bona gabeai Dirava ese lauma helaga amo ia horodia. Ioane ia ura ia ida idia noho hahediba taudia be Iesu murinai idia raka. Oibe, Ioane ia ura Keriso ena haroro gaukara totona dala ia hegaegaelaia. Ioane ia gwau: “Unai tauna be do ia bada ia lao, to lau be do lau maragi lau lao.”​—Ioane 3:30.

Ioane ma ta, Iesu murinai ia raka tauna unai, be gabeai Iesu ena mai gabuna bona taunimanima hamauria karana dekenai ia karaia gaukara badana ia herevalaia: “Atai amo ia mai tauna ese taunimanima ibounai ia hereaia. . . . Tamana ese Natuna ia lalokau henia bona gau ibounai be iena imana dekenai ia atoa. Natuna ia abidadama henia tauna be mauri hanaihanai do ia abia, to Natuna ia kamonai henia lasi tauna be mauri do ia itaia lasi, to Dirava ena badu be ia latanai ia noho.” (Ioane 3:31, 35, 36) Taunimanima ese unai hereva momokani idia diba be namo!

Ioane Bapatiso ese ena maduna bona gaukara do ia maragi karana ia herevalaia bena daudau lasi murinai, King Heroda ese ia hadiburaia. Heroda ese ena kakana Filipo ena adavana, Herodia, ia abia bona adavaia. Ioane ese taunimanima vairanai Heroda ena heudahanai karana ia gwauraia neganai, Heroda ese ia hadiburaia. Iesu ia kamonai Ioane idia hadiburaia neganai, ia bona ena hahediba taudia be Iudea idia rakatania bona ‘Galilea dekenai idia lao.’​—Mataio 4:12; Mareko 1:14.