Pengudah ngintu Pengerami Paska maya musin bungai kena taun 30 M., Jesus enggau bala murid iya ninggalka Jerusalem. Taja pia, sida enda terus pulai ngagai rumah sida ba Galili. Sida ngagai mayuh endur ba Judea lalu maptisa mayuh orang. John Pemaptisa mega udah maptisa orang ba lebak Sungai Jordan kira-kira satu taun, lalu sekeda ari bala murid iya agi nitihka iya.

Jesus enda maptisa orang tang iya ngasuh bala murid iya ngereja nya. Maya Jesus bejalaika pengawa nginjil iya ba dunya tu, iya enggau John ngajar orang Judah ke nesal ati laban udah ngelanggar sempekat ba Adat Petara.—Surat Kereja Rasul 19:4.

Tang bala murid John berasai chemburu, lalu sida mutap ngagai iya pasal Jesus. Sida madahka: “Lelaki [Jesus] ke kala enggau nuan . . . maptisa orang lalu semua orang datai ngagai iya.” (John 3:26) Taja pia, John enda chemburu. Iya gaga ati ke Jesus, lalu iya deka bala murid iya sama gaga ati. John ngingatka sida madahka: “Kita empu nyadi saksi aku lebuh aku madahka, ‘Aku ukai Kristus, tang aku udah dianjung dulu ari iya.’” John mega nyebut pasal siti jaku sempama ngambika ulih nulung bala murid iya faham utai tu. John madahka: “Pengantin indu endang enggi pengantin lelaki. Taja pia, kaban pengantin lelaki balat gaga ati lebuh iya bediri sereta ninga nyawa pengantin lelaki. Nya alai, aku penuh enggau pengaga ati.”—John 3:28, 29.

John baka kaban pengantin lelaki nya. Beberapa bulan sebedau nya, John gaga ati laban iya udah nulung bala murid iya ngelala Jesus. Sekeda ari murid John udah berengkah nitihka Jesus lalu deka dipilih kuasa kudus Petara. John mega deka bala murid iya ke bukai nitihka Jesus. Iya ke amat, pengawa John muka jalai ngagai pengawa nginjil Jesus. John madahka: “Pengawa ke dikereja iya deka majak nambah, tang pengawa ke dikereja aku deka majak kurang.”—John 3:30.

Siku da agi John ke dulu agi nyadi murid Jesus, nulis pasal asal penatai Jesus sereta peranan iya nyelamatka mensia. John nulis: “Iya ke datai ari atas besai agi ari semua orang. Apai rinduka Anak lalu udah nyerahka semua utai ngagai iya. Barang sapa arapka Anak deka bulih pengidup ti meruan belama iya. Barang sapa ke enda ngasika Anak nadai bulih pengidup. Tang pengeringat Petara deka mengkang ba orang nya.” (John 3:31, 35, 36) Pemendar tu amat penting lalu semua orang patut nemu!

Nama nyadi enda lama pengudah John Pemaptisa nyebut pasal peranan iya enggau pengawa iya ke deka majak kurang? Sayau amat, iya ditangkap Raja Herod. Herod udah jadi enggau Herodias, iya nya bini menyadi tiri iya, Philip. Ketegal nya, John madahka Herod ngereja pengawa butang. Nya kebuah Herod ngejil John. Pengudah ninga John udah ditangkap, Jesus enggau bala murid iya mupuk ari Judea lalu ‘ngagai Galili.’—Matthew 4:12; Mark 1:14.