Nọ ehaa Ọnyavrẹ na e nwani kuhọ no evaọ amara Asa hayo Ane ọrọ ukpe 30 C.E., Jesu avọ ilele riẹ a te no Jerusalẹm. Rekọ, a nwane nya ovavo kpobọ uwou rai evaọ Galili hi. Obọ iwhre Judia a nya, yọ a jọ obei họ ahwo buobu ame. Anwọ oware wọhọ ẹgbukpe soso Jọn Ọhọahwo-Ame na o bi ro ru iruo nana, yọ ilele Jọn jọ e gbẹ jọ kugbei, ẹsejọhọ evaọ ukiekpotọ Ethẹ Jọdan.

Jesu ọ rọ obọ riẹ họ ohwo ọvo ame he, rekọ ilele riẹ a jẹ họ ahwo ame nọ Jesu ọ tẹ ta kẹ ae nọ a ru ere. Evaọ oke nana, Jesu avọ Jọn Ọhọahwo-Ame na a je wuhrẹ ahwo Ju nọ i kurẹriẹ no izieraha rai, enọ a thọ evaọ otọ Uzi Mosis na.—Iruẹru Ikọ 19:4.

Rekọ, ilele Jọn Ọhọahwo-Ame na a te mu Jesu ihri họ ẹre, a te gu ei kẹ Jọn nọ: “[Jesu] ọzae nọ ọ jọ kugbe owhẹ [na] . . . ọ be họ ahwo ame, yọ ahwo kpobi a be nya bru rie.” (Jọn 3:26) Rekọ, Jọn ọ re Jesu ihri vievie he. Eva e were riẹ inọ iruo Jesu e be nyaharo, yọ ọ gwọlọ nọ ilele riẹ a were eva re. Jọn ọ kareghẹhọ ae nọ: “Wha rẹ sai se isẹri kẹ omẹ inọ mẹ ta nọ, ‘Mẹ họ Kristi na ha, rekọ a vi omẹ karo kẹ ọyena.’” Kẹsena ọ tẹ rọ ọtadhesẹ ru ẹme na vẹ kẹ ae nọ: “Ọva na họ ọnọ o wo ọmọtibobo na. Rekọ ogbẹnyusu ọva na nọ o dikihẹ etẹe je yo urru riẹ, ọ rẹ ghọghọ gaga fiki urru ọva na nọ o yo na. Fikiere oghọghọ mẹ o gbunu no.”—Jọn 3:28, 29.

Wọhọ epanọ eva e rẹ were ogbẹnyusu ọva na, ere ọvona eva e were Jọn emerae jọ nọ i kpemu nọ o je dhesẹ Jesu kẹ ilele riẹ. Ejọ evaọ usu ilele Jọn na a te lele Jesu, yọ a rọ ẹzi ọfuafo wholo ae uwhremu na. Jọn ọ tubẹ gwọlọ nọ ilele riẹ nọ i kiọkọ na a lele Jesu re. Evaọ uzẹme, oware nọ Jọn ọ gwọlọ ru kpobi họ re ọ ruẹrẹ edhere na họ taure Jesu o te ti mu iruo odibọgba riẹ họ. Jọn o ru ẹme na vẹ nọ: “Ọyena o ti dhe evievihọ, rekọ me ti dhe ẹkẹkawo.”—Jọn 3:30.

Ọzae ọfa nọ a re se Jọn nọ o zihe ro olele Jesu no, o kere uwhremu na kpahe obonọ Jesu o no ze gbe epanọ ahwo a te rọ rehọ ẹkwoma riẹ wo esiwo. O kere nọ: “Ọnọ o no obọ ehru ze ọ rro vi amọfa kpobi. . . . Ọsẹ na o you Ọmọ na yọ ọ rọ eware kpobi họ obọ riẹ no. Ọnọ o fi ẹrọwọ họ Ọmọ na o re wo uzuazọ ebẹdẹ bẹdẹ; ọnọ ọ ghẹmeeyo kẹ Ọmọ na o ti wo uzuazọ họ, rekọ ofu Ọghẹnẹ o ti tei.” (Jọn 3:31, 35, 36) Onana yọ obọdẹ oware nọ u fo nọ ohwo kpobi ọ rẹ riẹ.

Nọ Jọn Ọhọahwo-Ame na ọ ta kpahe epanọ iruo riẹ i ti ro dhe ẹkẹkawo no, u kri hi Herọd ovie na o te mu ei. Herọd o mi oniọvo obọriẹ nọ a re se Filip aye. Odẹ aye na Herodias. Nọ Jọn ọ ta kẹ Herọd evaọ ẹgbede nọ oware nọ o ru na o thọ gaga, o te mu ei fihọ uwou-odi. Nọ Jesu ọ nwani yo nọ a mu Jọn Ọhọahwo-Ame na, ọyomariẹ avọ ilele riẹ a te no Judia “kpobọ Galili.”—Matiu 4:12; Mak 1:14.