Thutha wa gũkũngũĩra Pasaka ya mwaka wa 30, Jesu na arutwo ake makoima Jerusalemu. No handũ ha gũcoka ĩmwe kwa ĩmwe mĩciĩ kwao Galili, magathiĩ bũrũri wa Judea, na makabatithia andũ aingĩ kuo. Johana Mũbatithania akoretwo akĩruta wĩra ũcio kwa ihinda rĩa kĩndũ mwaka ũmwe, na amwe a arutwo ake marĩ o hamwe nake, kwahoteka mũkuru-inĩ wa Rũĩ rwa Jorodani.

Jesu we mwene ndarabatithania, ĩndĩ arutwo ake nĩo marabatithania makĩrũmĩrĩra ũtongoria wake. Ihinda-inĩ rĩrĩ ũtungata-inĩ wa Jesu, we hamwe na Johana marahunjĩria Ayahudi arĩa merirĩte mehia ma kuuna Watho wa Ngai.​—Atũmwo 19:4.

No arutwo a Johana nĩ maraigua ũiru, magateta kũrĩ we igũrũ rĩgiĩ Jesu makamwĩra: “[Jesu] mũndũ ũrĩa mwarĩ nake . . . nĩ arabatithania, na andũ othe marathiĩ kũrĩ we.” (Johana 3:26) No Johana ndaraigua ũiru. Nĩ arakenera kũgaacĩra kwa Jesu, na arenda arutwo ake o nao makene. Akamaririkania ũũ: “Inyuĩ ene mũrĩ aira a ũrĩa ndoigire atĩ, ‘Ti niĩ Kristo, ĩndĩ nĩ gũtũmwo ndũmĩtwo njũke mbere yake.’ ” Akaheana ngerekano ĩngĩteithia othe gũtaũkĩrũo nĩ ũndũ ũcio akoiga: “Mũndũ o wothe ũrĩ na mũhiki nĩwe mũhikania. No rĩrĩa mũrata wa mũhikania aarũgama hakuhĩ nake na aigua akĩaria, nĩ akenaga mũno nĩ kũigua mũgambo wa mũhikania. Nĩ ũndũ ũcio, gĩkeno gĩakwa nĩ gĩkinyanĩru.”​—Johana 3:​28, 29.

Mĩeri ĩigana ũna mĩhĩtũku, o ta mũrata ũcio wa mũhikania, Johana nĩ aakenire kũmenyithania Jesu harĩ arutwo ake. Amwe ao makĩrũmĩrĩra Jesu, na ihinda rĩtarĩ haraihu nĩ megũitĩrĩrio roho mũtheru. Johana nĩ arenda o nao arutwo arĩa arĩ nao marũmĩrĩre Jesu. Muoroto wa Johana nĩ kũhaarĩria njĩra nĩ ũndũ wa ũtungata wa Kristo. Ataarĩirie ũũ: “Ũcio no mũhaka athiĩ na mbere kuongerereka, ĩndĩ niĩ no mũhaka thiĩ na mbere kũnyiha.”​—Johana 3:30.

Nake Johana ũngĩ, ũrĩa warĩkĩtie gũtuĩka mũrũmĩrĩri wa Jesu, aacokire kwandĩka ũhoro wĩgiĩ kĩhumo kĩa Jesu na itemi rĩake rĩa bata harĩ kũhonokia andũ akiuga: “Ũrĩa umĩte igũrũ akoragwo arĩ mũnene gũkĩra arĩa angĩ othe. . . . Ithe nĩ endete Mũriũ na nĩ amũheete ũnene igũrũ rĩa indo ciothe. Ũrĩa wonanagia wĩtĩkio harĩ Mũriũ arĩ na muoyo wa tene na tene; ũrĩa ũtaathĩkagĩra Mũriũ ndakoona muoyo, ĩndĩ marakara ma Ngai matũũraga igũrũ rĩake.” (Johana 3:​31, 35, 36) Ĩyo nĩ ma ya bata mũno andũ magĩrĩirũo kũmenya!

Ihinda inini thutha wa Johana Mũbatithania kuuga atĩ no mũhaka athiĩ na mbere kũnyiha, Mũthamaki Herode akamũnyitithia. Herode oete Herodia, mũtumia wa Filipu mũrũ wa ithe, na akamũhikia. Johana oimbũra gĩĩko kĩu kĩa ũtharia, Herode akamũikia njera. Jesu aigua Johana nĩ mũnyite, akoima Judea arĩ na arutwo ake, ‘agathiĩ Galili.’​—Mathayo 4:12; Mariko 1:14.