18-تاراۋ
يسا جوعارىلادى، ال جاقيا تومەندەدى
ماتاي 4:12 مارقا 6:17—20 لۇقا 3:19، 20 جوحان 3:22—4:3
-
يسانىڭ شاكىرتتەرى شومىلدىرۋ ٴراسىمىن جاسادى
-
جاقيا تۇرمەگە جابىلدى
ب.ز. 30-جىلىنىڭ كوكتەمى. يسا مەن شاكىرتتەرى قۇتقارىلۋ مەيرامىن تويلاعاننان كەيىن، يەرۋساليمنەن كەتتى. الايدا ولار بىردەن عاليلەياداعى ۇيلەرىنە ورالمادى. ياھۋدەياعا بارىپ، سول جەردە كوپتەگەن ادامدى شومىلدىرۋ راسىمىنەن وتكىزدى. جاقيانىڭ دا وسىنداي ٸستى اتقارىپ جۇرگەنىنە ٴبىر جىلداي ۋاقىت بولدى. ول يوردان وزەنىنىڭ اڭعارىندا جۇرسە كەرەك. كەيبىر شاكىرتتەرى ٵلى دە ونىڭ قاسىندا.
يسانىڭ ٶزى ەشكىمدى شومىلدىرۋ راسىمىنەن وتكىزگەن جوق. بۇل ٴراسىمدى ونىڭ باسشىلىعىمەن شاكىرتتەرى جاسادى. وسىلايشا قىزمەتىنىڭ وسى كەزەڭىندە يسا دا، جاقيا دا قۇداي زاڭىنىڭ كەلىسىمىن بۇزعانىنا وكىنگەن ياھۋديلەرگە ٴتالىم بەرىپ ٴجۇردى (ەلشىلەردىڭ ىستەرى 19:4).
الايدا جاقيانىڭ شاكىرتتەرى قىزعانىپ: «سىزگە كەلگەن... ادام [يسا] شومىلدىرۋ ٴراسىمىن جاساپ ٴجۇر»،— دەپ شاعىمداندى (جوحان 3:26). ال جاقيا قىزعانبادى، قايتا، يسانىڭ جەتىستىكتەرىنە قۋاندى. ول شاكىرتتەرىنىڭ دە قۋانعانىن قالادى. ٴسويتىپ، ولارعا: «مەنىڭ «ٴماسىح ەمەسپىن، ونىڭ الدىنان جىبەرىلگەن اداممىن» دەگەنىمە وزدەرىڭ كۋاسىڭدەر»،— دەدى. وسى جايتتى ٴتۇسىندىرۋ ٷشىن، مىسال كەلتىرىپ: «قالىڭدىعى بار كىسى — كۇيەۋ جىگىت قوي. ال قاسىندا تۇرعان دوسى ونىڭ داۋسىن ەستىپ، قاتتى قۋانادى. مەنىڭ دە قۋانىشىم قوينىما سىيماي تۇر»،— دەدى (جوحان 3:28، 29).
بىرنەشە اي بۇرىن جاقيا شاكىرتتەرىن يسامەن تانىستىرعاندا، كۇيەۋ جىگىتتىڭ دوسى سياقتى قۋانعان. سول كەزدە جاقيانىڭ بىرنەشە شاكىرتى يسانىڭ سوڭىنان ەرگەن بولاتىن، ٵرى ولار بولاشاقتا كيەلى رۋحپەن مايلانباق ەدى. قازىر ول قاسىنداعى شاكىرتتەرىنىڭ دە يساعا ەرگەنىن قالايدى. ويتكەنى جاقيانىڭ ماقساتى يسانىڭ قىزمەتىنە جول دايىنداۋ ەدى. ول مۇنى ٴتۇسىندىرىپ: «ول جوعارىلاي، ال مەن تومەندەي بەرۋىم كەرەك»،— دەدى (جوحان 3:30).
يساعا ەرگەن جاقيانىڭ شاكىرتى جوحان يسانىڭ قايدان كەلگەنى مەن ادامزاتتى قۇتقارۋدا باستى رول اتقاراتىنى جايلى كەيىننەن بىلاي دەپ جازدى: «جوعارىدان كەلگەن ول بارىنەن ۇلى... اكەسى ۇلىن سۇيەدى، ٵرى بارلىعىن ونىڭ قولىنا تاپسىردى. كىم ۇلعا سەنسە، ماڭگىلىك ٶمىردى يەلەنەدى، ال كىم وعان مويىنسۇنباسا، ومىرگە يە بولماي، قۇدايدىڭ قاھارىنا ۇشىرايدى» (جوحان 3:31، 35، 36). بۇل ادامزات ٴبىلۋ كەرەك ماڭىزدى شىندىق ەمەس پە؟!
جاقيا ٶزىنىڭ دارەجەسىنىڭ تومەندەيتىنىن ٵرى قىزمەتىنىڭ اياقتالاتىنىن ايتقاننان كەيىن كوپ ۇزاماي تۇرمەگە جابىلدى. ول يرود پاتشانىڭ يرودياعا ۇيلەنىپ، ازعىندىق جاساعانىن جۇرت الدىندا اشكەرەلەگەن بولاتىن. يروديا يرودتىڭ باۋىرى فىلىپتىڭ ايەلى ەدى. يسا جاقيانىڭ تۇتقىندالعانىن ەستىگەندە، شاكىرتتەرىمەن بىرگە عاليلەياعا جول تارتتى (ماتاي 4:12؛ مارقا 1:14).