Jesu ni balutiwa bahae bazwa mwa Jerusalema hase baezize mukiti wa Paseka kwa makalelo a mbumbi, ka silimo sa 30 C.E. Kono habakuteli kwa mandu abona mwa Galilea. Baya mwa naha ya Judea, mobayo kolobeza batu babañata. Joani Mukolobezi saaezize musebezi oswana ka nako yebato kwana silimo, mwendi ili mwa musindi wa Nuka ya Jordani, mi naasali ni balutiwa bahae babañwi.

Jesu hakolobezi batu, kono balutiwa bahae ki bona babakolobeza ka taelo yahae. Ka nako ye ya bukombwa bwa Jesu, Jesu ni Joani baluta Majuda bababakezi libi zabona za kutula tumelelano ya Mulao wa Mulimu.—Likezo 19:4.

Kono balutiwa ba Joani bashwela Jesu muna, bali: “Mutu yani [Jesu] yanaali ni wena . . . usweli wakolobeza, mi batu kaufela basweli kuya ku yena.” (Joani 3:26) Joani yena haashweli Jesu muna. Utabiswa ki zende zapeta Jesu mi ubata kuli balutiwa bahae ni bona batabe. Joani ubahupulisa kuli: “Mina kasibili mu lipaki za kuli neniize: ‘Hakina Kreste, kono nilumilwe kuitangeta ku yena.’” Ufa mutala wo kuli bautwisise zatalusa, uli: “Mutu kaufela yanani munyaliwa ki munyali. Kono mulikanaa munyali, hayema ni kuutwa munyali habulela, uba ni tabo yetuna hahulu kabakala kuutwa linzwi la munyali. Ka mukwa ocwalo, tabo yaka ni yona itezi.”—Joani 3:28, 29.

Ka kuswana sina mulikanaa munyali, Joani ni yena naatabile likweli kwamulaho hanaazibahalize balutiwa bahae ku Jesu. Babañwi kubona nebalatelezi Jesu mi hamulaho wa nako nebaka toziwa ka moya okenile. Hape Joani ubata kuli balutiwa bahae babasiyezi ni bona balatelele Jesu. Mane mulelo wa Joani ki wa kulukiseza Kreste nzila kuli apete bukombwa bwahae. Joani utalusa kuli: “Yale ulukela kuzwelapili kuekezeha, kono na nilukela kuzwelapili kufukuzeha.”—Joani 3:30.

Joani usili, yanaakalile kulatelela Jesu, hasamulaho uñola ka za simuluho ya Jesu ni musebezi wa butokwa wapeta mwa kupiliswa kwa batu, uli: “Yazwa kwahalimu ufita babañwi kaufela. . . . Ndate ulata Mwana mi ufile lika kaufela mwa mazoho ahae. Yabonisa tumelo ku Mwana uba ni bupilo bobusa feli; yasautwi Mwana hana kubona bupilo, kono buhali bwa Mulimu busiyala ku yena.” (Joani 3:31, 35, 36) Yeo ki taba ya butokwa luli yebatokwa kuziba batu!

Joani Mukolobezi utamiwa ki Mulena Heroda hamulahonyana wa kubulela kuli musebezi wahae ukafukuzeha. Heroda naanyezi Herodiasi musalaa Filipi, muhulwanaa hae. Joani hakalimela Heroda patalaza ka za kezo yahae ya bubuki, Heroda ulaela kuli Joani akenyiwe mwa tolongo. Jesu hautwa kuli Joani utamilwe, uzwa mwa Judea ni balutiwa bahae mi ‘uya kwa Galilea.’—Mateu 4:12; Mareka 1:14.