Yesu ne bandi bana ba bwanga abataluka mu Yelusalema pa kupwa kusoba masobo a Pashika ku muketeko wa 30 Yesu ke mwiye. Ino kebayukile shi basa kujokela kwabo ku Ngadilea. Abaenda ku ntanda ya Yudea, kwine kobabatyija bantu bavule. Yoano Mubatyiji nandi wingilanga uno mwingilo ke padi kintu kya mwaka mutuntulu, kadi bana ba bwanga bandi bamo bakidi nandi, padi i ku musanza wa Munonga wa Yodano.

Yesu mwine kabatyijepo muntu nansha umo​—bandi bana ba bwanga bo babatyija na lupusa lwandi. Mwingilo wa Yesu ne pano ukidi bwa wa Yoano wa kufundija Bayuda besāse bubi bwabo bwa kujilula kipwano kya Bijila bya Leza.​—Bilongwa 19:4.

Inoko bana ba bwanga ba Yoano abakwatwa mukao, kebatompola kudi Yoano pa mwanda wa Yesu amba: “Yewa muntu [Yesu] owadi nandi . . . yewa ubatyija kadi bonso boba benda kwadi.” (Yoano 3:26) Ino Yoano aye kadipo na mukao. Wasangela kwendelela kwa mwingilo wa Yesu kadi usaka bandi bana na bwanga nabo basangale. Yoano webavuluja’mba: “Banwe bene mubasapula bukamoni bwa byonanenene amba, ‘Ami nkidipo Kidishitu.’” Washintulula mwanda mu muswelo wivwana bonso amba: “Yewa ense udi na musongwa i musoñañani. Inoko, mulunda na musoñañani shi waimana kadi wamwivwana, wikalanga na nsangaji mikatampe pa mwanda wa diwi dya musoñañani. Nanshi nsangaji yami ibafika ne pa mfulo.”​—Yoano 3:28, 29.

Yoano, mulunda na musoñañani wasangele myeji kunyuma pa kuyukanya Yesu kudi bandi bana ba bwanga. Bamo balondele Yesu ne mwenda mafuku bashingwa māni a mushipiditu ujila. Yoano usaka ne bana ba bwanga bene badi nabo balonde Yesu. Na bubine, kitungo kya Yoano i kya kuteakanya dishinda dya mwingilo wa Kidishitu. Yoano ushintulula’mba: “Yao ufwaninwe kukanda’nka kukanda, ino amiwa mfwaninwe kutūka’nka kutūka.”​—Yoano 3:30.

Yoano mukwabo walondele Yesu ku ngalwilo, walembele mwenda mafuku kutambile Yesu ne mwingilo wandi mukatampe wa kupandija bantu amba: “Yewa utamba kūlu udi peulu pa bakwabo bonso. . . . Tata usenswe Mwana kadi i mumupe bintu byonso mu kuboko kwandi. Yewa ulombola lwitabijo mudi Mwana udi na būmi bwa nyeke; yewa kakōkelapo Mwana kakamonepo būmi, ino bukalabale bwa Leza budi nyeke pādi.” (Yoano 3:31, 35, 36) Bine buno i bubine bufwaninwe kuyuka bantu!

Yoano Mubatyiji upwa’tu kwisambila pa kutūka kwa mwingilo wandi, Mulopwe Heloda wamukute. Heloda waselele Helodyasa mukaja mwanabo Fidipa ke wandi mukaji. Yoano pa kusokola patōka kino kilongwa kya makoji, Heloda wamukutyija. Yesu pa kwivwana’mba Yoano wakutwe, watambe mu Yudea na bana bandi ba bwanga ‘abekokela ku Ngadilea.’​—Mateo 4:12; Mako 1:14.