Yesu natumbaji twenyi vafumine kuYelusalema omu chakumine chilika chaPaseka kuchivatuko chavula chamu 30 C.E. Oloze muchishishisa chakukinduluka kumembo avo kuNgalileya, vayile kuYuleya kuze vakambapachishile vatu vavavulu. Halwola kanelu Yowano Muka-kumbapachisa te nazate lyehi ou mulimo kafwe mwaka wamuundu, kaha achipwile natumbaji twenyi. Chasoloka nge vapwile nakutwama muchinema chaKalwiji Yotau.

Yesu kapwile nakumbapachisa vatuko, oloze alwezelenga tumbaji twenyi valinge ngocho. Halwola kanelu, Yesu naYowano vapwile nakunangula vaYuleya vaze vapihililile nakwalumuka kujishili javo hakuhokola Lushiko lwamuJishimbi jaKalunga.—Vilinga 19:4.

Chaluvinda, tumbaji twaYowano vevwile lwiso havyuma apwile nakulinga Yesu. Ngocho vayayavalile kuli mwata wavo ngwavo: “[Yesu] uze apwanga nayove . . . ali jino nakumbapachisa vatu, kaha vatu vosena vali nakuya kuli ikiye.” (Yowano 3:26) Oloze Yowano kevwile lwisoko. Awahililile hakwivwa nge Yesu apwile nakufukila, kaha asakile tumbaji twenyi navakiko vawahilile. Yowano avanukishile ngwenyi: “Enu munapu muvinjiho jami omu ngwambile ngwami, ‘Ami keshi yami Kulishituko, oloze vanangutumu kulutwe lwenyi.’” Kufumaho, avalwezele chakutalilaho mangana vosena vevwishise, ngwenyi: “Weshowo ali namwenga ikiye ivene mwenyamwenga. Oloze sepa lyamwenyamwenga, omu mwemana nakwivwa mwenyamwenga ali nakuhanjika, mwawahilila chikuma hakwivwa lizu lyenyi. Shikaho ngunawahilila jino chikuma.”—Yowano 3:28, 29.

Yowano hakupwa ikiye sepa lyamwenyamwenga, awahililile hatukweji vatanu naumwe vahichile kunyima omu ajimbwile tumbaji twenyi kuli Yesu. Vamwe vaputukile kukavangiza Yesu, kaha kutwala muze vavawavishile nashipilitu yajila. Yowano asakile tumbaji twenyi vaputuke kukavangiza Yesu, mwomwo mulimo wenyi wapwile wakuwahishila Kulishitu jila mangana azate kanawa mulimo wenyi. Yowano alumbunwine ngwenyi: “[Yesu] atela kuya lika nakutohwelako, oloze ami ngwatela kuya lika nakukehelako.”—Yowano 3:30.

Mukuhita chamyaka, Yowano weka uze aputukile lyehi kukavangiza Yesu asonekele vyokwo afumine Yesu namulimo ejile nakuzata wakulwila vatu. Ambile ngwenyi: “Ou afuma mwilu ahambakana vosena. . . . Ise azanga Mwanenyi, kaha nahane vyuma vyosena mulivoko lyenyi. Ou mwafwelela Mwana ali nakuyoya chahaya myaka yosena, ou mwalikanga kuli Mwana keshi kukamona kuyoyako, oloze utenu waKalunga naupwa hali ikiye.” (Yowano 3:31, 35, 36) Ou wapwile muchano waulemu vatelele kutachikiza vatu.

Omu mwahichile kaha makumbi amandende kufuma haze Yowano Muka-kumbapachisa ahanjikile ngwenyi ikiye namulimo wenyi vyatela kukehelako, Mwangana Helote amukashile mukamenga. Helote ambachile Helochiya, pwevo lyandumbwenyi Fwilipu nakumutenga puwenyi. Ngocho omu Yowano asolwele hatoma evi vilinga vyaujila alingile, Helote amukashile mukamenga. Jino omu Yesu evwile ngwavo Yowano vanamukase, afumine kuYuleya natumbaji twenyi, “ayile kuNgalileya.”—Mateu 4:12; Mako 1:14.