Yʋʋmd 30 Pakã poore, a Zeezi ne a karen-biisã yii Zeruzalɛm n le rɩk sore. La b pa leb Galɩle soolmẽ wã, zĩig ning b sẽn yitã ye. B reng n kẽnga Zʋʋde. Beenẽ, b lisa neb wʋsgo. Sẽn ta yʋʋmd masã la a Zãmbatiis me lisd nebã. Tõe tɩ yaa Zʋrdẽ kʋɩlgẽ wã. A karen-biis kẽer n ket n be ne-a.

A Zeezi ra pa lisd nebã a toor ye. A ra kõo a karen-biisã sor tɩ b maand rẽ. Wakat kãng t’a Zeezi ne a Zã fãa sẽn da zãmsd-b rãmbã yaa zʋɩf-rãmb nins sẽn tek yam n kos sugri, b sẽn kɩɩs tõod nins Wẽnnaam sẽn da kõ Israyɛll nebã yĩngã.—Tʋʋmã 19:4.

La a Zãmbatiis karen-biisã ra maanda sũ-kiiri, neb wʋsg sẽn da rebd a Zeezi nengẽ wã. B tɩ yeela a Zãmbatiis yaa: “Karen-saamba, ned ning [a Zeezi] sẽn dag n be ne yãmb Zʋrdẽ rʋʋndã, tɩ yãmb kɩs a kasetã, ad a lisda nebã, la nebã fãa dabda a nengẽ.” (Zã 3:26) La a Zãmbatiis pa maan sũ-kiir ye. A sũurã pʋd n nooma a Zeezi tʋʋmdã sẽn paamd pãngã, n dat t’a karen-biisã me maan sũ-noogo. A tẽeg-b-la bũmb a sẽn da togs-ba. A yeelame: “Yãmb mens yaa kaset dãmb tɩ mam yeelame tɩ mam ka Kirisã ye.” A paasame tɩ b tʋma yẽ t’a reng a Zeezi taoore. A rɩka makr sẽn na yɩl tɩ b wʋm a gomdã võore. A yeela woto: “Yaa pag sɩd n so-a. La pʋg-sɩdã zoa bee ne-a n kelgd-a, la a sã n wʋm pʋg-sɩdã koɛɛga, a sũur yaa noogo. Sũ-no-kãng sẽn yaa mam dẽndã pida zãnga.”—Zã 3:28, 29.

A Zãmbatiis n yaa pʋg-sɩdã zoa, bala na maan kiis masã, a maana sũ-noog a sẽn wa n wilgd a karen-biisã a Zeezi sẽn yaa ned ningã. A karen-biisã kẽer meng tũ a Zeezi. Kaoosg zugẽ, b wa n paama vʋʋsem sõngã zaeebo. A Zã ra ratame t’a karen-biis nins sẽn ket ne yẽ wã me tũ a Zeezi. A tʋʋmdã meng yaa a maneg sorã Kirisã yĩnga. A yeelame: “Yaa tɩlay tɩ Bãmb tʋʋmdã lebgd kãseng n paasdẽ, tɩ mam dẽndã tar boogre.”—Zã 3:30.

Kaoosg zugẽ, Zã ning sẽn lebg a Zeezi karen-biigã goma a Zeezi sẽn yi zĩig ningã yelle, la tʋʋmd ning a sẽn na n tʋm ninsaalbã fãagr yĩngã. A yeelame: “Sẽn yi-a yĩngr n wa wã yɩɩda nebã fãa. . . . Ba wã nonga Bi-riblã, n dɩk bũmba fãa n ning a nugẽ. Ned ning sẽn tẽed-a Bi-riblã tara vɩɩm sẽn kõn sa. La ned ning sẽn kɩɩsd-a Bi-riblã kõn paam vɩ-kãng ye, la Wẽnnaam sũ-puugrã na n ta-a lame.” (Zã 3:31, 35, 36) Nebã fãa tog n bãnga gom-kãensã, bala yaa sɩda.

A Zãmbatiis sẽn wilg tɩ yẽ tʋʋmdã pãng na n boogame wã pa kaoos la rĩm a Erood kɩt tɩ b yõk-a n kẽes bãens-roog ye. Bõe yĩnga? Bala a Erood rɩka a Eroodyaad sẽn yaa a ba-biig a Filip pagã n maan a paga, t’a Zã togs nebã fãa taoor t’a sẽn maanã yaa yoobo. Rẽ n so t’a Erood kɩt tɩ b yõk-a n kẽes bãens-roogo. A Zeezi sẽn wʋm t’a Zã bee bãens-roogã, yẽ ne a karen-biisã yii Zʋʋde n na n kẽng Galɩle.—Matye 4:12; Mark 1:14.