Emanle ompaka Paskha variyari elukuluku ya ephovo mu eyaakha ya 30 E.K., Yesu ni amuhuserya awe annakhuma o Yerusalemu. Nyenya, awo hanakookela elapo aya o Kalileya. Awo anaya o epooma yo Yuteya weiwo anaapatisaayawo achu ancipale. Yohani Mpatisi onnapaka muteko mmohamoha mu iyaakha sincipale, nave akina a oohuserya awe nlelo ari ni yoowo, akhweya o Muhice Yortano.

Yesu hanampatisa muchu—oohuserya awe tanapatisa ni ohoolela wawe. Ophiyerya elukuluku yeela ya muteko wa Yesu, oopiili Yesu ni Yohani anaahusiha Ayuta yaawo arukununse murima ntakhara ochekela waya nlakano na Nlamulo na Muluku.—Saweriwa T’arummwa 19:4.

Nyenya oohuserya a Yohani annamukhalela nrima nave annaloca sa Yesu: “Yole [Yesu] ari ni weyano . . . onampatisa ni atxhu othene anaya wa yowo.” (Yohani 3:26) Nyenya Yohani haanono nrima. Owo onnahakalala ni okhumelela phaama wa Yesu navetho onachuna wi oohuserya awe ehakalale. Yohani onnawuupuserya: “Nyuwano ene muri anamona a seiho kilontxaka: miyo nkiri Kristu, nto kirimurummwa oholo wawe.” Owo onnaphwanaphwaniha wi oothene ewerye wiiwexexa: “Orino mwariye, muthelí; nto nthamwene a mutheli ori ni yowo ni onan’wiriyana, onnahakalala ni nsu na mutheli. Nihakalaliho naka nri nawakhwanasa!”—Yohani 3:28, 29.

Yohani, ntoko nthamwene a mutheli, aahihakalala miyeeri soopacerya vaavaa aamperenkheiye Yesu wa oohuserya awe. Akina a yaawo yaahimuchara Yesu nave mu elukuluku yaahaala othanliwa ni munepa waweela. Yohani onachunatho wi amuhuserya ohanleiyeno emuchare Yesu. Mweeparipari, yookhwela ya Yohani ori orehererya ephiro ntakhara muteko wa Kristu. Yohani onnathariha: “Ti yophwanelela wi owo annuwe, nave miyo kiyeve.”—Yohani 3:30.

Yohani mukina, yoowo aapacenrye omuchara Yesu, ohoolo waya oorepa vooloca sa mapacereryo ni muteko wa Yesu wa waavulusa achu: “Yole onarwa wirimu onnapwaha othene. . . . Atithi annamukhwela Mwana, nave sothene àmunnya mmatani mwawe. Ole onamwemererya Mwana, òkhalano ekumi yohimala. Nto yowo onakhotxa omwiwelela Mwana harwa ona ekumi, nave esara ya Muluku enamukhala mwa yowo.” (Yohani 3:31, 35, 36) Ela eparipari yookhweleya wi achu esuwele!

Ehivinrevo elukuluku yincipale Yohani Mpatisi amanle oloca wi muteko awe waaphwanela oyeva, owo onnaphariwa ni Mwene Herote. Herote aamuthenle Herotiya, mwaara a Filipi, munnawe oomaayi. Vaavaa Yohani onamulokoheiye vanlakani vooloca sa meerelo awe ooraruwa, Herote onnamurihela mukalaposo. Amanle wiiwa vooloca sa owaleliwa wa Yohani, Yesu aahivinyawo o Yuteya ni oohuserya awe nave “àya o Galileya.”—Mateu 4:12; Marko 1:14.