Despues di a selebrá e Pasku Hudiu den lènte di aña 30 di promé siglo, Hesus i su disipelnan a bandoná Herúsalèm. Sinembargo, nan no a bolbe mesora na nan kasnan na Galilea. Nan a bai Hudea, kaminda nan a batisá hopi hende. Huan Boutista tabatin alrededor di un aña ta hasi un trabou similar, kisas den e vaye di Riu Yordan. I ainda algun di su disipelnan tabata huntu kuné.

Hesus mes no tabata batisá niun hende. Ta su disipelnan tabata hasi esei bou di su guia. E tempu ei, tantu Hesus komo Huan Boutista tabata siña e hudiunan ku a arepentí di nan pikánan kontra e pakto di Lei di Dios.—Echonan 19:4.

Pero e disipelnan di Huan a bira yalurs i a bai keha serka Huan. Nan a bis’é: ‘E hòmber [Hesus] ku tabata huntu ku bo na otro banda di Riu Yordan ta batisá hende, i tur hende ta bai serka dje.’ (Huan 3:26) Pero Huan sí no tabata yalurs. E tabata kontentu ku Hesus tabatin éksito, i e tabata ke pa su disipelnan tambe ta kontentu. P’esei, el a kòrda nan: “Boso mes ta testigu ku mi a bisa: ‘Mi no ta Kristu, ma mi a ser mandá su dilanti.’” I pa nan por a komprondé e punto akí bon, el a usa un ilustrashon. El a bisa nan: “E brùit ta pertenesé na e brùidehòm. Ma e amigu di e brùidehòm ta bira masha kontentu ora e para banda di e brùidehòm i tend’é papia. P’esei, mi goso ta kompleto.”—Huan 3:28, 29.

Vários luna promé, Huan tabata kontentu, meskos ku e amigu di e brùidehòm, ku e por a introdusí su disipelnan na Hesus. Algun di nan a sigui Hesus i ku tempu nan lo a ser ungí ku spiritu santu. Huan tabata ke pa e disipelnan ku a keda huntu kuné tambe sigui Hesus. De echo, Huan su propósito tabata pa prepará e kaminda pa Kristu su sirbishi. Huan a splika: “E mester sigui oumentá, ma ami mester sigui mengua.”—Huan 3:30.

Mas despues, un otro persona ku tambe tabata yama Huan, kende mas promé a bira siguidó di Hesus, a skirbi tokante Hesus su orígen i e papel importante ku lo el a hunga den salbashon di humanidat. El a bisa: “Esun ku ta bini djariba ta mas ku tur hende. . . . E Tata ta stima e Yu i a entregá tur kos den su man. Esun ku pone fe den e Yu lo haña bida eterno; esun ku desobedesé e Yu lo no haña bida, ma e rabia di Dios ta keda riba dje.” (Huan 3:31, 35, 36) Esei ta un bèrdat masha importante ku tur hende mester sa!

Poko tempu despues ku Huan Boutista a bisa ku su papel i trabou lo mester a mengua, Rei Heródes a laga arest’é. Dikon? Tabata asina ku Heródes a tuma Herodías, esposa di su ruman Felipe, i a kasa kuné. Ora ku Huan a mustra públikamente ku loke Heródes a hasi tabata malu, Heródes a laga ser’é den prizòn. Anto ora ku Hesus a tende ku nan a arestá Huan, é ku su disipelnan a bandoná Hudea i “kue kaminda pa Galilea.”—Mateo 4:12; Marko 1:14.