30 kaq watapim pascua fiesta tukuruptin Jesusqa qatiqninkunawan kuska Jerusalenmanta Judea lawkunaman rirqaku, chaypim achka runakunata bautizarqaku, chaymi manaraq Galilea lawpi llaqtankumanqa kutirqakuraqchu. Bautizaq Juanpas watañam achka runakunata bautizachkarqa Jordan mayupi, paypaqa karqaraqmi qatiqninkunapas.

Kikin Jesusqa manam pitapas bautizarqachu, aswanqa qatiqninkunallam Jesuspa nisqanman hina bautizarqaku. Bautizaq Juanwan Jesusqa runakunatam yanaparqaku Moisespa chaskisqan Diospa kamachikuyninkunata mana kasukusqankumanta wanakunankupaq (Hechos 19:4).

Bautizaq Juanpa qatiqninkunam ichaqa Jesusmanta kaynata rimapakurqaku: “Jordan mayupa wak lawninpi qanwan kaq runam bautizachkan hinaptinmi payman llapallanku asuykuchkanku”, nispanku (Juan 3:26). Juanmi ichaqa Jesuspa ruwasqanmanta kusikuspan qatiqninkunatapas kusikunankupaq nirqa: “Kikikichikmi testigo kankichik kayna nisqaymanta: ‘Ñuqaqa manam Cristochu kani, aswanqa paypa ñawpaqninta kachamusqa kaqmi’”, nispa. Hinaspapas nirqataqmi: “Noviayuq kaqqa noviom. Noviopa amistadninmi ichaqa anchallataña kusikun noviopa hichpanpi sayaspa rimasqanta uyarispan. Chayraykum ñuqaqa ancha kusisqallaña kachkani”, nispa (Juan 3:28, 29).

Bautizaq Juanqa noviopa amistadnin hinam anchata kusikurqa qallariyllapiraq qatiqninkunata Jesusman riqsichisqanrayku. Chaymi wakin qatiqninkunaqa Jesuspa qatiqninña karqaku, hinaspam Diospa chuya espiritunta qipakunaman chaskirqaku. Bautizaq Juanqa hinallam munarqa wakin qatiqninkunapas Jesuspa qatiqninña kanankuta. Chayta ruwananpaq akllasqa kaspanmi Jesusmanta nirqa: “Payta qatiqkunaqa astawanmi yapakunqa, ñuqapa qatiqniykunam ichaqa asllayanqa”, nispa (Juan 3:30).

Jesuspa huk kaqnin qatiqnin Juan sutiyuqpas Jesusmanta rimaspanmi qipakunaman nirqa: “Altomanta hamuqqa runakunamanta aswan altopim kachkan. [...] Hanaq pacha taytaqa churintam kuyan, hinaspam churinpa makinpi tukuy imata churaykun. Churipi iñiqqa wiñay kawsayniyuqmi, churita mana kasukuqmi ichaqa mana kawsanqachu, aswanqa Diospa piñakuyninmi paypi hinalla kanqa”, nispa (Juan 3:31, 35, 36). Lliw runakunam Jesusmanta chay willakuytaqa sumaqta yachananku karqa.

Bautizaq Juanqa nirqam paypa ruwasqanqa asllayananmanta. Chayna nisqan qipallamanmi kamachiq Herodes payta presocharurqa. Herodesqa wawqin Filipopa warmillanwanmi kakurqa, chaymi Juanqa mana allin ruwasqanmanta qaqcharqa, Herodesñataqmi piñakuruspan presocharurqa. Jesusñataqmi chayta yacharuspan Judea lawmanta Galileaman qatiqninkunawan kuska rirqa (Mateo 4:12; Marcos 1:14).