Na peko ti so ala hunzi ti sara matanga ti Pâque ti ngu 30 ti ngoi ti e awe, Jésus na adisciple ti lo azia Jérusalem. Me, ala kiri droit na kodro ti ala na Galilée ape. Ala gue na sese ti Judée, na kâ, ala batize azo mingi. A sara ngu oko tongaso awe la si Jean Baptiste ayeke sara mara ti kua ni so ge na ndo ni so, na lo yeke na ambeni disciple so ayeke lakue na tere ti lo, peut-être na popo-hoto ti Ngu ti Jourdain.

Jésus lo wani la lo yeke batize azo ape, me lo la lo mû yanga na adisciple ti lo ti sara ni. Ni la, na ngoi ni so, Jésus na Jean kue la ayeke fa ye na aJuif so achangé asarango ye ti ala so ague nde na Mbele ti Ndia.—Kusala 19:4.

Me bê asara adisciple ti Jean na ala dema tere ti ala na ndo ti Jésus, ala tene: “[Jésus] so ayeke lani na tere ti mo, . . . lo yeke batize azo na azo kue ayeke gue na mbage ti lo.” Ye oko, Jean asara bê ape. Lo yeke na ngia ti bâ so iri ti Jésus awu mingi na lo ye si adisciple ti lo kue asara nga tongaso. Jean adabe ti ala, lo tene: “Ala yeke atémoin ti tënë so mbi tene lani, so mbi so mbi tene mbi yeke Christ ni ape, me a tokua mbi ti ga kozo ti lo.” Lo mû mbeni tapande so amû lege na ala ti mä yâ ti tënë ni so, lo tene: “Zo so amû wali fini fini ayeke koli ti wali ni. Ye oko, na ngoi so kamarade ti koli so amû wali fini fini ayeke luti na tere ti lo na amä lo, lo yeke na kota ngia ndali ti go ti koli ti wali ni so lo mä so. Ni la, ngia so mbi yeke na ni so, alingbi kue awe.”—Jean 3:28, 29.

Jean, so ayeke tongana kamarade ti koli so amû wali fini fini, ayeke lani na ngia tongana lo ga lani na adisciple ti lo na Jésus. Ambeni amû peko ti Jésus, na ngoi kete na pekoni a yeke soro ala na lege ti yingo ti gue na yayu. Jean aye nga même ti tene adisciple so ayeke na tere ti lo, na ndembe ni so, amû peko ti Jésus. Lo sara tongaso ndali ti so kua ti lo ayeke ti tene lo leke lege na Christ ti tene lo sara kua ti lo. Ni la, Jean atene: “Ti lo, lo yeke gue gi guengo na li ni, me ti mbi, mbi yeke kiri gi kiringo na gbe ni.”—Jean 3:30.

Na pekoni, mbeni Jean ni nde, so akomanse ti mû peko ti Jésus depuis, asara tënë ti ndo so Jésus alondo dä nga na kua so lo yeke sara ti tene azo awara salut. Lo tene: “Zo so alondo na nduzu si aga ayeke na ndo ti tanga ti azo kue. . . . Babâ ni andoye Molenge ni na lo zia aye kue na maboko ti lo. Zo so amä na bê na Molenge ni ayeke na fini ti lakue lakue. Me zo so ake yanga ti Molenge ni ayeke wara ande fini ape, me ngonzo ti Nzapa angbâ na ndo ti lo.” (Jean 3:31, 35, 36). A lingbi azo kue ahinga tâ tënë so.

Kete na peko ti so Jean Baptiste afa so a lingbi kua ti lo akiri na gbe ni, Gbia Hérode abi lo na da ti kanga. Hérode asara mariage lani na Hérodiade so ayeke wali ti ita ti lo Philippe. Na ngoi so Jean afa na lê ti azo lango-sioni ti lo ni, Hérode abi lo na da ti kanga. Na ngoi so Jésus amä so a bi Jean na da ti kanga, lo na adisciple ti lo azia Judée na ala ‘gboto tere ti ala, ala gue na Galilée’.—Matthieu 4:12; Marc 1:14.