Ua māeʻa nei le Paseka i le 30 T.A., ma ua tuua e Iesu ma ona soo Ierusalema. Nai lo o le toe foʻi i o latou aiga i Kalilaia, ua latou agaʻi atu i Iutaia, ma papatisoina ai le toʻatele o tagata. E faapena foʻi le galuega sa faia e Ioane le Papatiso i le pe ā ma le tasi le tausaga. O loo faatasi pea Ioane ma nisi o ona soo, atonu i le vanu o loo iai le vaitafe o Ioritana.

E lē o papatisoina e Iesu tagata, peitaʻi, ua ia faatonuina ona soo e faia faapea. I le taimi lea, o loo aʻoaʻoina e Iesu ma Ioane tagata Iutaia, o ē ua salamō mai i a latou agasala e tusa ai ma le feagaiga o le Tulafono a le Atua.—Galuega 19:4.

Ua lotovale soo o Ioane, ma faitio atu iā te ia e faatatau iā Iesu e faapea: ʻO Iesu lea sa lua faatasi o loo ia faia papatisoga, ma ua gasolo atu tagata uma iā te ia.’ (Ioane 3:26) Peitaʻi, e lē o lotoleaga ai Ioane. Nai lo o lea, o loo fiafia o ia i le taulau manuia o le faiva a Iesu, ma e manaʻo foʻi i ona soo ina ia faaalia lenā fiafia. Ua faamanatu atu e Ioane iā i latou: “O lenā tou te molimau, na ou fai atu, e lē o aʻu o le Keriso, ae na auina mai aʻu e muamua iā te ia.” Ua ia faia se faataʻitaʻiga ina ia faigofie ai ona malamalama ona soo uma i le uiga o lenā manatu: “O le alii faaipoipo, o ia e ana le tamaʻitaʻi faaipoipo. Peitaʻi, pe a tū le uō sili a le alii faaipoipo ma faalogo i lona leo, ona matuā olioli ai lea o ia. O lea la, ua atoatoa ai foʻi loʻu olioli.”—Ioane 3:28, 29.

E pei o le uō sili a le alii faaipoipo, na matuā olioli Ioane i masina na muamua atu, ina ua ia faailoa atu ona soo iā Iesu. Sa mulimuli nisi o i latou iā Iesu, ma mulimuli ane o le a faauuina i le agaga paia. E manaʻo foʻi Ioane i ona soo o loo iai, e mulimuli atu iā Iesu. O le mea moni, o le autū o le galuega a Ioane o le saunia lea o le ala mo le faiva a Keriso. Ua faapea atu Ioane: “E tatau ona faateleina pea o ia, a o aʻu nei, e tatau ona faaitiitia.”—Ioane 3:30.

E iai le uluaʻi soo o Iesu e igoa foʻi iā Ioane. Ua ia tusi e faatatau i le soifuaga o Iesu a o leʻi afio mai i le lalolagi, ma lana matafaioi autū mo le faaolataga o tagata e faapea: ʻO lē e maliu mai i lugā e pule o ia i isi uma. E alofa le Tamā i lona Alo, ma ua ia tuuina atu mea uma i lona aao. O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola, ae tumau pea le toʻasā o le Atua iā te ia.’ (Ioane 3:31, 35, 36) O se upu moni tāua lenei e tatau ona iloa e tagata.

E leʻi umi talu ona mavae le faamatalaina atu e Ioane le Papatiso o le a faaitiitia lana matafaioi ma ana galuega, ae faafalepuipuiina loa o ia e le tupu o Herota. O le māfuaaga, ona ua ia faailoa atu le mulilua sa faia e Herota ma Herotia le avā a lona ʻafa uso o Filipo, ma ave ai o ia e fai ma ana avā. Ua logotala Iesu i lenei mea ua tupu iā Ioane, ona ia tuua lea o Iutaia faatasi ma ona soo ae ʻmaliu atu i Kalilaia.’—Mataio 4:12; Mareko 1:14.