Ŵati amaliza phwandu la Pasika mu 30 C.E., Yesu ndi akusambira ŵaki angutuwaku ku Yerusalemu. M’malu mwakuwere kwawu ku Galileya, yiwu anguluta ku Yudeya ko angubatiza ŵanthu anandi. Yohane Mubatizi nayu wagwiranga ntchitu yakubatiza ŵanthu pafufupi kwa chaka chimoza. Pa nyengu iyi, akusambira ŵaki anyaki ŵenga ndi iyu ndipu panyaki ŵenga pafupi ndi Msinji wa Yorodani.

Yesu ndiyu wabatizanga ŵanthu cha. Kweni akusambira ŵaki ndiwu agwiranga ntchitu yeniyi mwakulondo vo iyu waŵakambiyanga. Pa nyengu iyi, Yesu ndi Yohane asambizanga Ayuda wo angulapa maubudi ngawu chifukwa chakuleka kuvwiya Dangu laku Chiuta.—Machitidu 19:4.

Akusambira aku Yohane anguchita sanji. Ndipu angukambiya Yohane kuti: “Munthu yuwa [Yesu] mwenga nayu . . . wabatiza ndipu ŵanthu wosi aluta kwaku iyu.” (Yohane 3:26) Kweni Yohane wanguchita sanji cha. Iyu wangukondwa ukongwa ndi vo Yesu wachitanga ndipu wakhumbanga kuti akusambira ŵaki nawu akondwengi. Yohane wanguŵakumbusa kuti: “Yimwi mwija mutindijaliya ukaboni kuti ndingukamba kuti, ‘Ini ndini Khristu cha, kweni ndikutumika panthazi paku iyu.’” Kuti wawovyi akusambira ŵaki kuvwisa fundu yeniyi, iyu wangulutirizga kukamba kuti: “Weyosi yo we ndi mwali, ndi munthulumi mweneku wa nthengwa. Kweni asani mubwezi wa munthulumi mweneku wa nthengwa wasoka ndi kuvwa vo wakamba, watuŵa ndi likondwa likulu ukongwa chifukwa cha kuvwa mazu nga munthulumi mweneku wa nthengwa. Mwaviyo likondwa langu lafiskika.”—Yohane 3:28, 29.

Myezi yimanavi kuvuli, Yohane yo wenga nge mubwezi wa munthulumi mweneku wanthengwa, wangukondwa ukongwa kuwovya akusambira ŵaki kuti aziŵi Yesu. Akusambira ŵaki anyaki angulondo Yesu. Yohane wakhumbanga so kuti akusambira ŵaki wo angujaku aje akusambira aku Yesu. Ntchitu yikulu yaku Yohane yenga yakunozga nthowa ya uteŵeti waku Khristu. Iyu wangukamba kuti: “Iyu watenere kulutirizga kukuwa kweni ini nditenere kulutirizga kuja mumana.”—Yohane 3:30.

Pati pajumpha nyengu Yohane munyaki yo wenga wakusambira waku Yesu, wangulemba vakukwaskana ndi ko Yesu wangutuliya. Iyu wangulemba so vakukwaskana ndi udindu wo Yesu wenga nawu wakuwovya ŵanthu kuti azitaskiki. Iyu wanguti: “Munthu yo watuliya kuchanya, waluska wosi. . . . Ada atanja Mwana ndipu vinthu vosi avipereka mu manja mwaki. Munthu yo wavwana mu Mwana, we ndi umoyu wamuyaya, ndipu munthu yo waleka kuvwiya Mwana, wazakuwuwona cha umoyu, kweni ukali waku Chiuta ujaliliya paku iyu.” (Yohane 3:31, 35, 36) Ŵanthu akhumbikanga kuziŵa fundu yauneneska yeniyi.

Pechendajumphi nyengu yitali kutuliya po Yohane Mubatizi wangukambiya kuti ntchitu yaki yijengi yimana, Fumu Herodi yingumumanga. Herodi wanguto Herodiya yo wenga muwolu wa mku waki Filipu, ndipu wanguja muwolu waki. Herodi wanguŵika Yohane mujeri chifukwa wangumuchenya pa masu pa ŵanthu kuti wato mulamu waki. Yesu wati wavwa kuti Yohane wamangika, iyu ndi akusambira ŵaki ‘angutuwaku ku Yudeya ndipu anguluta ku Galileya.’—Mateyu 4:12; Mariko 1:14.