Bihain long bung bilong Pasova long Mas o Epril bilong yia 30 C.E., Jisas na ol disaipel bilong em i lusim Jerusalem. Tasol ol i no go stret long ples bilong ol long Galili. Ol i go long hap bilong Judia, na ol i baptaisim planti man. Jon Bilong Baptais tu i wok long baptaisim ol man inap 1-pela yia. Sampela disaipel bilong Jon i stap yet wantaim em, ating long ples daun bilong wara Jordan.

Jisas yet i no baptaisim ol man, em i givim dispela wok long ol disaipel bilong em. Long dispela taim long wok autim tok bilong Jisas, ol Juda i tanim bel long rong ol i mekim long brukim kontrak bilong Lo ol i wokim wantaim God, na nau Jisas na Jon i kirap long skulim ol dispela man. Olsem na taim Jon na ol disaipel bilong Jisas i baptaisim ol man, dispela i makim olsem ol dispela lain i tanim bel pinis.—Aposel 19:4.

Ol disaipel bilong Jon i jeles, na ol i go long Jon na komplein long Jisas, ol i tok: “Dispela man [Jisas] husat i bin stap wantaim yu . . . em i wok long baptaisim ol man na olgeta manmeri i wok long i go long em.” (Jon 3:26) Tasol Jon i no jeles. Em i amamas long wok Jisas i mekim na em i laik bai ol disaipel bilong em tu i amamas. Olsem na Jon i tokim ol: “Yupela yet i bin harim mi tok olsem, Mi no Krais, tasol God i salim mi long i go pas long em.” Jon i mekim tok piksa em ol inap kliagut long en, em i tok: “Man i gat meri bilong maritim, em dispela man husat bai marit. Tasol taim pren bilong man husat bai marit i sanap na harim nek bilong dispela man, em i gat bikpela amamas. Olsem na dispela amamas bilong mi i pulap.”—Jon 3:28, 29.

Wankain olsem pren bilong man i laik marit i amamas, Jon i amamas sampela mun paslain long em i tokim ol disaipel bilong em long Jisas. Sampela bilong ol i bihainim Jisas, olsem na bihain God inap makim ol tu long holi spirit. Jon i laik bai ol disaipel husat i stap yet wantaim em, ol tu i mas bihainim Jisas. Wok bilong Jon em bilong redim rot bilong Krais long autim tok. Jon i tok: “Wok bilong dispela man i mas i go bikpela, tasol wok bilong mi i mas i go liklik.”—Jon 3:30.

Narapela Jon, husat i kamap disaipel bilong Jisas long pastaim, bihain em i raitim stori long Jisas i kam we na long bikpela wok bilong Jisas long kisim bek ol man olsem: “Man i kam long ples antap em i gat namba i winim olgeta arapela. . . . Papa i laikim tumas Pikinini na em i putim olgeta samting long han bilong en. Man i bilip long Pikinini, em i gat laip i stap oltaim. Man i no bihainim tok bilong Pikinini, em i no inap kisim laip, na belhat bilong God bai painim em.” (Jon 3:31, 35, 36) Man! Em wanpela bikpela tok i tru olgeta man i mas harim!

Bihain liklik long taim Jon Bilong Baptais i stori olsem em i redim rot bilong Krais na ol wok bilong em yet i mas i go liklik, King Herot i arestim em. Herot i maritim Herodias, em meri bilong hap brata bilong em Filip. Taim Jon i tokaut olsem Herot i mekim pasin adaltri, em i putim Jon long kalabus. Taim Jisas i harim olsem ol i arestim Jon, em wantaim ol disaipel bilong em i lusim Judia na ol “i go long Galili.”—Matyu 4:12; Mak 1:14.