Nuumala niira na Paasikha, elimwe ya 30 EC, Yesu ni awiixutti awe yaahikhuma oYerusalemu. Masi, awo khiyaaronwe elapo aya oGalileya. Awo yaaronwe oYudeya, muttetthe yoowo yaabatinze aya atthu anceene. Etthu yowiiraka eyaakha emosa, Yohani Mbatiza aahivara muteko mmosaru, nave awiixutti awe akina yaari ni yena, woonasa wene okhatoni wa Muro Yordani.

Yesu khaabatiza atthu, masi aaruma atthareli awe wira avareke muteko owo. Nto okathi ole wa muteko woolaleerya wa Yesu, owo ni Yohani yaawiixuttiha aYuda yaawo yaattharunwe itampi saya, mwaha wootthekela nivarihano na Nlamulo na Muluku.​—Miteko 19:4.

Awiixutti a Yohani yaanimukhalela nrima Yesu nto yaahimuleela Yohani wira: “Ole ari ni nyuwo [Yesu] . . . onnabatiza atthu: othene anrowa wa yowo!” (Yohani 3:26) Masi Yohani khaamukhalela nrima Yesu. Tthiri Yohani aanihakalala mwaha woowi muteko wa Yesu waaninnuwa, nave aaphavela wira awiixutti awe ahakalaleke. Yohani aahiwuupuxerya wira: “Nyuwo mmansinyu mw’ànamona a itthu iye sihimmyaka wira: ‘Miyo nkihiyó Kristu: miyo kirummwe orowa oholo wawe’”. Nto Yohani aahipaka nlikanyiho wira otheene aya yiiwexexe, oriki: “Mwara t’awawe ole omuthenle. Vano mpatthani awe mutheli onnimuhola pahi, onninwiriyana, atteliwaka murima ni nsu na mutheli. Otteliwa waka murima ti wenno: ni vano ti womalela”.​—Yohani 3:28, 29.

Myeeri vakhaani saavinre, Yohani, yoowo aari ntoko mpatthani awe mutheli, aahihakalala omusuweliha Yesu awiixutti awe. Akina a yaawo yaahikhala atthareli a Yesu, nto nuuvira okathi yaahoottihiwa ni munepa wootteela. Nave, Yohani aaphavela wira atthareli awe yaahanle amutthareke Yesu. Tthiri, yoolakela ya Yohani waari olokiherya ephiro ya muteko woolaleerya wa Kristu. Yohani aahimmye so: “Owo ohana wunnuwa: vano miyo kivukuweke”.​—Yohani 3:30.

Yohani mukina, yoowo aari mutthareli oopacerya a Yesu, muhoolo mwaya aahilepa iphattuwelo ni muteko wa Yesu wa owoopola apinaatamu, oriki: “Ole onkhuma musulu ti mulupale wavikana othene. . . . Atithi annimphenta Mwana, khupweha sothene mmatatani mwawe. Ole onimwamini Mwana òkhalana ekumi yohimala; vano ole onkhotta omwiwelela Mwana, khakhalanne ekum’iyo, nto onanariwa wa Muluku onokhala ni yowo”. (Yohani 3:31, 35, 36) Tthiri ela ekeekhai yootthuneya wira atthu asuwele!

Ohivinre okathi munceene, nuumala Yohani Mbatiza ohimya wira muteko awe waahaana ovukuwa, Mwene Herodi aahimutthukwela mukhatteya. Herodi aahimukuxa Herodiya, mwaara a muhima awe iihaniwa Filipi, khumuthela. Vaavo Yohani aahimmye awe mararuwo ale, Herodi aahimurihela Yohani mukhatteya. Nuumala Yesu wiiwa wira Yohani aahitthukweliwa mukhatteya, Yesu ni awiixutti awe yaahikhuma oYudeya ‘arowaka oGalileya’.​—Matheyo 4:12; Marko 1:14.