Katapos magselebrar han Paskua han katsaringsing han 30 C.E., hi Jesus ngan an iya mga disipulo binaya ha Jerusalem. Kondi, waray hira umuli ha ira tagsa-tagsa nga balay ha Galilea. Kinadto hira ha distrito han Judea, diin damu an ira ginbawtismohan. Ito liwat an ginbubuhat ni Juan nga Parabaptis ha sulod hin mga usa ka tuig na, ngan an pipira han iya mga disipulo kaupod la gihapon niya, posible nga didto ha walog han Salog Jordan.

Hi Jesus diri amo an nanbabawtismo, lugod an iya mga disipulo an nagbubuhat hito ilarom han iya paggiya. Durante hini nga pagministeryo ni Jesus, hiya ngan hi Juan pariho nagtututdo ha mga Judio nga nagbasol ha ira mga sala kontra han kanan Dios Balaud nga kasabotan.—Buhat 19:4.

Kondi an mga disipulo ni Juan nangabugho ngan nagreklamo kan Juan mahitungod kan Jesus: “An tawo [nga hi Jesus] nga kaupod mo . . . nanbabawtismo hiya ngan an ngatanan napakadto ha iya.” (Juan 3:26) Pero waray mangabugho hi Juan. Nalipay hiya ha kalamposan ni Jesus ngan karuyag niya nga malipay liwat an iya mga disipulo. Iya hira ginpahinumdoman: “Kamo mismo mga testigo nga nagsiring ako, Diri ako an Kristo, kondi ginsugo ako nga mag-una ha iya.” Igin-ilustrar niya ini ha paagi nga masasabtan han ngatanan: “An tag-iya han maarasawa amo an karaslon nga lalaki. Pero an sangkay han karaslon nga lalaki nga natindog hirani han karaslon nalilipay gud kon nakakabati han iya tingog. Salit daku gud ini nga akon kalipay.”—Juan 3:28, 29.

Hi Juan, pariho han sangkay han karaslon nga lalaki, nalipay gud han iginpakilala niya kan Jesus an iya mga disipulo mga pipira ka bulan na an naglabay. An iba ha ira nagin sumurunod ni Jesus ngan pag-abot han panahon didihogan pinaagi han baraan nga espiritu. Karuyag liwat ni Juan nga magin sumurunod ni Jesus an iba pa niya nga disipulo. Ha pagkamatuod, katuyoan niya nga iandam an dalan para ha ministeryo han Kristo. Hi Juan nagsaysay: “Hiya padayon nga madudugangan, pero ako padayon nga maiibanan.”—Juan 3:30.

An usa pa nga Juan, nga bag-o nga disipulo ni Jesus, ha urhi nagsurat may kalabotan ha gintikangan ni Jesus ngan han iya importante nga papel ha katalwasan han katawohan: “An napakanhi tikang ha igbaw amo an labaw ha ngatanan. . . . Hinigugma han Amay an Anak ngan gintagan hiya hin awtoridad ha ngatanan nga butang. An nagpapakita hin pagtoo ha Anak may kinabuhi nga waray kataposan; an diri nasugot ha Anak diri magkakaada hin kinabuhi, kondi padayon nga kangangalasan hiya han Dios.” (Juan 3:31, 35, 36) Importante gud nga hibaroan han mga tawo ini nga kamatuoran!

Waray pag-iha katapos hisgotan ni Juan nga Parabaptis nga maiibanan an iya papel ngan buruhaton, gin-aresto hiya ni Hadi Herodes. Gin-asawa ni Herodes hi Herodias, an asawa ni Felipe nga iya bugto ha tatay. Han igbuhayhag ni Juan ini nga pag-adulteryo, iginpapriso hiya ni Herodes. Pakabati ni Jesus nga gin-aresto hi Juan, hiya ngan an iya mga disipulo binaya ha Judea ngan ‘kinadto ha Galilea.’—Mateo 4:12; Marcos 1:14.