Biʼniʼ si Jesús né ca discípulo stiʼ Pascua ni raca Jerusalén lu primavera de iza 30 que, bireecaʼ zecaʼ sti guidxi. Peru qué nibiguétacaʼ Galilea, xquídxicaʼ, sínuque guyecaʼ región stiʼ Judea ne caguunísacaʼ stale binni. Maʼ ziné Juan Bautista biaʼ ti iza de caguunisa cásica cayuni Jesús, zándaca caguunisa Juan binni ndaaniʼ valle stiʼ guiiguʼ Jordán ne nuu caadxi de ca discípulo stibe caʼruʼ gusaanacaʼ laabe.

Peru qué niguunisa Jesús nin ti binni, sínuque ca discípulo stiʼ nga bíʼnicaʼ dxiiñaʼ riʼ ra yenándacaʼ modo gúdxibe laacaʼ. Biaʼ tiempu ziné Jesús de cayuni xhiiñaʼ Dios, laabe ne Juan, cusiidicabe ca judíu ni maʼ guca arrepentir de ca pecadu stiʼ ra bicheenecaʼ pactu stiʼ Ley (Hechos 19:4).

Cadxiichi ca discípulo stiʼ Juan, cayaca quejarcaʼ ne nacaʼ: «Xa hombre [Jesús] ni uyuu ra nuuluʼ [...] que, caguunisa ne cayé guiráʼ binni ra nuu» (Juan 3:26). Peru cadi cadxiichi Juan pur guiráʼ ni cayuni Jesús, sínuque cayecheʼ ne laaca racalaʼdxiʼ chuʼ ca discípulo stiʼ nayecheʼ. Nga runi gúdxibe laacaʼ: «Laatu nánnatu gunieeʼ: “Cadi naa diaʼ nga Cristu, sínuque biseendacabe naa delante de laabe”». De raqué gudíxhebe ti ejemplu para ganda guiénecaʼ ni: «Ti novio nga richaganáʼ ti novia. Peru nabé riecheʼ xhamigu novio ora maʼ zuhuaa cueʼ novio que ne maʼ cucaadiaga laabe ora maʼ caniʼbe. Nga runi naa guizáʼ maʼ cayecheʼ» (Juan 3:28, 29).

Juan nga zeeda gaca xhamigu novio que, purtiʼ guizáʼ biecheʼ ora biʼniʼ presentar ca discípulo stiʼ Jesús, chupa chonna beeu ante. Caadxi de ca discípulo stiʼ Juan que yenándacaʼ Jesús ne despué zaca ungircaʼ né espíritu santu. Ni racalaʼdxiʼ Juan nga guni xcaadxi discípulo stiʼ zaqueca, chinándacaʼ Jesús, purtiʼ dxiiñaʼ stiʼ Juan nga guni preparar ti neza para ganda guni Cristu xhiiñaʼ Dios. Nga runi, guníʼ Juan: «Zadale dxiiñaʼ stibe, peru naa zaxiéʼ dxiiñaʼ stinneʼ» (Juan 3:30).

Tobi de ca discípulo stiʼ Jesús, laaca Juan láʼ, despué bicaa padé zeeda Jesucristu ne dxiiñaʼ risaca napa para gulá binni guidxilayú: «Jma risaca ni zeeda de luguiáʼ que guiráʼ xixé binni. [...] Nadxii Dios Xiiñiʼ ne maʼ gudixhe guiráʼ xixé cosa lu nabe. Ni gapa fe Xiiñibe zacaa guendanabani ni qué zaluxe, peru ni qué guzuubaʼ stiidxaʼ Xiiñibe qué zacaa guendanabani, sínuque nuu xiana stiʼ Dios luguiáʼ» (Juan 3:31, 35, 36). Nga runi, nabé risaca ganna binni ca diidxaʼ riʼ.

Despué de guníʼ Juan Bautista zaxiéʼ dxiiñaʼ stiʼ, biʼniʼ mandar rey Herodes guseguyoocabe laa. Biʼniʼ Herodes ndiʼ purtiʼ gudxi Juan laa cadi jneza diʼ bichaganáʼ Herodías, xheelaʼ biʼchiʼ, Filipo. Ora gunna Jesús biseguyoocabe Juan, bireené ca discípulo stiʼ Judea ne yené laacabe Galilea (Mateo 4:12; Marcos 1:14).