Mu njel i Yudéa inyu ke i Galiléa, Yésu ni banigil bé ba ntagbe Samaria ba kenek ñombok. Liké li nwéés bo. Bebee ni kosi, ba ntelep ipañ tison i Sikar inyu noi bebee ni bee yada i bebek Yakôb a bi tém, tole a bi boñ le bôt ba tém hala yé mbôgôl ni mbôgôl nwii. I bee i i nginda yii letee ni len ini, bebee ni tison ba nsébél ni hop Pulasi le Naplouse.

Mu kiki Yésu a yé noi ipañ bee, banigil bé ba nke somb bijek i Sikar. I ngéda banigil ba nke, muda Samaria wada a nlo ap malép. Yésu a nkal nye le: ‘Ti me malép, me nyo.’​—Yôhanes 4:7.

Bôt ba Lôk Yuda ni bôt ba Samaria ba mbéna bé bana maada inyule ba gwé mbagla ibôdôl behee. Inyu hala nyen muda a nhel, a bat Yésu le: “Lelaa man Lôk Yuda kiki we, u mbat me muda Samaria malép?” Yésu a ntimbhe, a kal nye le: “Ibale u yik likébla Nyambe a nti yañga, u yik ki njee a yé i kal we le: ‘Ti me malép,’ ki wen u mbat nye, ndi a ti we malép ma niñ.” Muda a nkal nye le: “A isañ mbai, u gwé bé to nlôñga inyu ap malép, yak bee i yé isi. Hee ni w’a yôñôl malép ma niñ mana? U nloo bé sôgôlsôgôl wés Yakôb nu a bi ti bés i bee ini, a nyo ki malép mé nye ni bon bé lôñni nyaga yé, hala bé?”​—Yôhanes 4:9-12.

Yésu a nke ni bisu i kal nye le: “Hiki mut a nyo malép mana, nyus malép y’a gwel ki nye. Ndi nu ni nu a nyo malép m’a ti nye, nyus malép i yé ki mbén i gwel nye; ndi malép m’a ti nye m’a yila ikété yé kiki liñgen li malép li li mpél inyu ti niñ boga.” (Yôhanes 4:13, 14) Ñ, to mu kii a yé nwaak, Yésu a gwé ngôñ i añle muda Samaria maliga ma nti niñ.

Muda a mbat ni nye le: “A isañ mbai, ti me malép ma, le ndi nyus malép i gwel ha bañ me, me waa ki lo hana i homa nunu i ap malép.” Nano i nene le Yésu a nhéñha nkwel, a nkal muda le: “Ke sébél nlôô woñ, ndi u lo hana.” Muda a ntimbhe le: “Me gwé bé nlôm.” Ndi i mam Yésu a nyi inyu yé ma nlama hélés nye. Yésu a nkal nye le: “U mpot maliga ngéda u nkal le: ‘Me gwé bé nlôm.’ Inyule u bi bana balôm batan; ndi i mut u gwé nano a ta bé nlô woñ.”​—Yôhanes 4:15-18.

I muda nunu a yé nhelek ni mam Yésu a nyi, jon a nkal nye le: “A isañ mbai, me ntehe le u yé mpôdôl.” I mbus, a ñunda le a ngwés mam ma mbuu ngéda a nkal le: “Basôgôlsôgôl bés ba bi bégés Nyambe munu hikôa hini, ndi bé ni nkal le homa bôt ba nlama bégés Nyambe a yé i Yérusalem.”​—Yôhanes 4:19, 20.

Ndi Yésu a nkal nye le homa het ba mbégés a gwé bé mahee. A nkal ki nye le: “Ngeñ i nlo le n’a bégés bé Tata to munu hikôa hini, to i Yérusalem.” I mbus a nkal le: “Ngeñ i nlo, yak lo i mal lo, le bañga babégés Nyambe b’a bégés nye lôñni mbuu ni maliga; ntiik, Tata a  yé i yéñ mintén mi bôt mi inyu bégés nye.”​—Yôhanes 4:21, 23, 24.

I jam li nlôôha ba nseñ inyu Tata li ta bé i homa ba mbégés, ndi lelaa ba mbégés nye. Muda a yé nhelek, a nkal le: “Me nyi le Mésia a yé i njel, nyen ba nsébél le Kristô. I ngéda a nlo, a’ añle bés mam momasôna i mbamba.”​—Yôhanes 4:25.

Ha nyen Yésu a nkal nye jam li nlôôha ba nseñ: “Me nu me yé i pôdôs we, men me yé nye.” (Yôhanes 4:26) Hoñol le! I muda nunu a nlo i kosi inyu ap malép. Jam li hélha li yé le nyen Yésu a nti nsima i yi njee a yé toi, inyule a nyelene nye jam a ba ngi kal mut numpe: Le nyen a yé Mésia.

Banigil ba Yésu ba nlo i Sikar ni bijek. Ba nkoba nye het ba nyék nye, i bee Yakôb, ndi a yé kwel ni muda Samaria wada. Ngéda banigil ba mpam het Yésu ni muda ba yé, muda a nyék ébél yé inyu ke i tison.

Ngéda a mpam i Sikar, i muda nu a ñañle bôt ba tison mam Yésu a nkal nye. Ni makénd, a nkal bo le: “Lona, ni béñge mut wada nu a ñañle me mam momasôna me bi boñ.” I mbus, bebek inyu ôt mahoñol map, a mbat bo le: “Le nye bé nyen a yé Kristô?” (Yôhanes 4:29) I mbadga i i nlôôha ba nseñ, ibôdôl dilo di Môsi, bôt ba gwé ngôñ i yi ndimbhe. (Ndiimba Mbén 18:18) Hala a ntinde bôt ba tison i ke tehe Yésu.

Nlélém ngéda, banigil ba Yésu ba yé kal nye le a je bijek ba nlona. Ndi nye a ntimbhe bo le: “Me gwé i je bijek le ni nyi bé.” Banigil ba mbadba: “Baa mut a nlona nye yom i je?” Ndi Yésu a ntoñle bo ngim jam i i ga bana mahee inyu banigil bé bobasôna, a nkal le: “Bijek gwem bi yé le me boñ sômbôl i nu a bi om me, me mélés ki nson wé.”​—Yôhanes 4:32-34.

 Nson Yésu a yé pôdôl u ta bé libumbul li li bé lama bôña i mbus sôñ ina, ndi a yé pôdôl libumbul i pes i mbuu, kiki a nke unda. A nkal le: “Ni pa mis, ni béñge lelaa nwom mi yé nhôôlak inyu libumbul. I mut a mbumbul a mal kôhna nsaa, a nkot ki matam inyu niñ boga, le ndi nu a mbel ni nu a mbumbul ba kon maséé lôñ yada.”​—Yôhanes 4:35, 36.

Bebek Yésu a nyi mam ma nke lo i mbus nkwel wé ni muda Samaria. Ngandak bôt i Sikar i nhémle Yésu ngéda i muda nu a nkal bo le: “A ñañle me mam momasôna me bi boñ.” (Yôhanes 4:39) Jon ngéda ba nlo i bee, ba mbat Yésu le a yégle, a kônde añle bo mam. Yésu a neebe nsébla wap, a nyén ki ni bo dilo diba.

I mbus le ba ñemble biniigana bi Yésu, ngandak i nhémle nye. Ba nkal muda Samaria le: “Di nhémle ha bé ndigi inyu mam u bi pot; inyule bésbomede di nok ni maôô més, di nyi ki le i mut nunu a yé toi ntohol nkoñ isi.” (Yôhanes 4:42) Ibabé pééna, muda Samaria a nti ndémbél lam i ñunda lelaa di nla bok mbôgi inyu Kristô. A bi boñ le bet ba bé emble nye ba kônde bana ngôñ i nok mam.

Kiki di mbôk di kal, i yii sôñ ina iloole libumbul li mbôdôl. I mpôôna le mu nkoñ u, libumbul li kôn li bé ipôla sôñ Matumb ni sôñ Matôp. Di yé i sôñ Maye sép tole Libuy li nyéé, hala a nsômbôl kal le i mbus ngand Pasa i nwii 30 N.Y., Yésu ni banigil bé ba bi tégbaha sôñ juem i Yudéa inyu niiga ni i sôble. Nano ba nyoñ njel i i nke i ñombok inyu témb i boni i Galiléa. Kii i bem bo nyoo?