Kan pa-Galilea si Jesus asin an mga disipulo niya haling Judea, nagbaklay sinda panorte asin nag-agi sa distrito nin Samaria. Napagal sinda. Mga udto na kan magpundo sinda para magpahingalo harani sa siyudad nin Sicar, sa may bubon, na posibleng kinalot ni Jacob o pinakalot paagi sa pagtangdan sa iba dakul na siglo na an nakaagi. Sagkod ngunyan, an bubon na iyan mahihiling harani sa modernong siyudad nin Nablus.

Miyentras na nagpapahingalo si Jesus sa may bubon, nagpasiring sa siyudad an mga disipulo para bumakal nin kakanon. Pakahali ninda, sarong Samaritana an nag-abot para magsakdo nin tubig. Sinabi ni Jesus sa saiya: “Painuma man ako.”—Juan 4:7.

An mga Judio asin Samaritano dai nakikiiba-iba sa kada saro huling haloy na panahon na sindang anggot sa kada saro. Kaya nagngalas an babayi asin naghapot: “Judio ka baga, taano ta naghahagad ka nin maiinom sa sako na sarong Samaritana?” Nagsimbag si Jesus: “Kun naaraman mo sana an mapadapit sa daing bayad na regalo nin Diyos asin kun siisay an nagsasabi sa saimo, ‘Painuma man ako,’ naghagad ka na kuta sa saiya, asin tinawan ka na kuta niya nin tubig na buhay.” Nagsimbag an babayi: “Ginoo, dai ka nganing pansakdo nin tubig, tapos hararom an bubon. Kaya sain mo kukuanon an tubig na buhay na ini? Mas matibay ka pa daw sa apuon ming si Jacob, na nagtao sa samo kan bubon na ini asin nag-inom diyan kaiba an saiyang mga aki saka mga ataman na hayop?”—Juan 4:9-12.

“An gabos na nag-iinom sa tubig na ini mapapaha giraray,” an sabi ni Jesus. “An siisay man na uminom sa tubig na itatao ko sa saiya dai na nanggad nuarin man mapapaha, alagad an tubig na itatao ko sa saiya magigin siring sa burabod nin tubig sa laog niya na nagbubulakbugak tanganing magtao nin buhay na daing katapusan.” (Juan 4:13, 14) Iyo, dawa pagal, andam si Jesus na ihiras sa Samaritana an nagtataong-buhay na mensahe nin katotoohan.

Dangan sinabi kan babayi: “Ginoo, tawan mo ako kan tubig na iyan, tanganing dai na ako mapaha asin dai na ako magparabalik-balik sa lugar na ini para magsakdo nin tubig.” Minalataw na binago ni Jesus an pinag-uulayan asin nagsabi: “Sige na, apuda an agom mo asin iiba mo siya digdi.” Nagsimbag an babayi: “Dai akong agom.” Pero siguradong nabigla siya sa aram ni Jesus kan sabihon kaini: “Tama ka sa sinabi mong ‘Dai akong agom.’ Huli ta lima na an nagin agom mo, asin an lalaking kasaruan mo ngunyan bako mo man agom.”—Juan 4:15-18.

Malinaw sa saiya an kahulugan kan sinabi ni Jesus, asin may pagngalas niyang sinabi: “Ginoo, sa hiling ko saro kang propeta.” Dangan ipinahiling niyang interesado siya sa espirituwal na mga bagay. Paano? Nagpadagos siya: “An samuyang mga apuon [na mga Samaritano] digdi sa bukid na ini [an haraning Bukid nin Gerizim] nagsamba, pero an sabi nindo [an mga Judio] sa Jerusalem dapat na magsamba an mga tawo.”—Juan 4:19, 20.

Minsan siring, ipinaliwanag ni Jesus na bako an lugar nin pagsamba an mahalaga. Sinabi niya: “Maabot an oras na dai na kamo masamba sa Ama sa bukid na ini o sa Jerusalem man.” Dangan sinabi pa niya: “Maabot an oras, asin ngunyan na iyan, na an tunay na mga parasamba masamba sa Ama sa espiritu asin katotoohan, huli ta sa katunayan, mga arog ninda an hinahanap kan Ama na magsamba sa saiya.”—Juan 4:21, 23, 24.

An hinahanap kan Ama sa tunay na mga parasamba  bako man an lugar kun sain sinda nagsasamba kundi kun paano sinda nagsasamba. Napahanga an babayi. “Aram kong madatong an Mesiyas, na inaapod na Cristo,” an sabi niya. “Pag nagdatong siya, ihahayag niya sa samo an gabos na bagay.”—Juan 4:25.

Dangan ihinayag ni Jesus an sarong mahalagang katotoohan: “Ako na kaulay mo, ako siya.” (Juan 4:26) Nag-abot an babaying ini para magsakdo nin tubig sa kaudtuhan, asin direktang sinabi sa saiya ni Jesus na siya an Mesiyas! Espesyal nanggad idto huling sinabi sa saiya ni Jesus an sarong bagay na dai pa niya hayagan na sinasabi sa iba.

Nagbalik an mga disipulo haling Sicar na may darang kakanon. Nahiling ninda si Jesus sa may bubon ni Jacob kun sain ninda siya binayaan, pero ngunyan nakikipag-ulay siya sa sarong Samaritana. Mantang parani an mga disipulo, iwinalat kan babayi an dulay niya asin nagpasiring sa siyudad.

Pag-abot sa Sicar, isinaysay kan babayi sa mga tawo an mga bagay na sinabi ni Jesus. May kumpiyansa niyang sinabi: “Madya kamo, hilingon nindo idtong tawo na nagsaysay sa sako kan gabos na ginibo ko.” Tibaad gusto niyang pukawon an interes ninda, kaya naghapot pa siya: “Ano daw, iyo na kaya ini an Cristo?” (Juan 4:29) Mahalagang marhay an hapot na iyan huling pinag-iisipan na an dapit diyan puon pa kan panahon ni Moises. (Deuteronomio 18:18) Napahiro kaiyan an mga tawo sa siyudad na magduruman para mahiling ninda mismo si Jesus.

Miyentras tanto, dinagka si Jesus kan mga disipulo na magkakan kan dara ninda. Pero nagsimbag siya: “Igwa ako nin kakanon na dai nindo aram.” Napangalas an mga disipulo asin nag-urulay-ulay: “Dai man nin nagdara sa saiya nin ano man na kakanon, bako?” Mabuot na nagpaliwanag si Jesus paagi sa mga tataramon na makahulugan para sa gabos niyang parasunod: “An sakuyang kakanon iyo na gibuhon an kabutan niya na nagsugo sa sako asin na tapuson an saiyang gibuhon.”—Juan 4:32-34.

An gibuhon na sinasabi ni Jesus bakong literal na pag-ani, na mga apat na bulan pa an hahalaton.  Imbes, iyo iyan an espirituwal na pag-ani, arog kan ipinaliwanag niya: “Hilingon nindo asin pagmasdan an kaumahan, hirinog na an tipasi asin puwede nang anihon. Sa ngunyan, an mga paraani nag-aako na nin tangdan asin nagtitipon na nin mga bunga para sa buhay na daing katapusan, tanganing an parasabwag asin an paraani magkaibanan na mag-ugma.”—Juan 4:35, 36.

Posibleng nahihiling na ni Jesus an epekto kan saiyang pakikipag-ulay sa Samaritana. Dakul sa Sicar an nagturubod sa saiya huli sa patotoo kan babayi, huling sinasabi kaini sa mga tawo: “Isinaysay niya sa sako an gabos na ginibo ko.” (Juan 4:39) Kaya, kan magduman sinda sa bubon, nakiulay sinda ki Jesus na dai nguna maghali para tukduan pa sinda. Inako ni Jesus an imbitasyon asin nagdanay sa Samaria nin duwang aldaw.

Mantang naghihinanyog ki Jesus an mga Samaritano, dakul pa an nagturubod sa saiya. Sinabi ninda sa babayi: “Nagtutubod kami ngunyan bako na lang dahil kan sinabi mo; huli ta nadangog mi na mismo, asin aram niyamo na an tawong ini talagang iyo an paraligtas kan kinaban.” (Juan 4:42) Siguradong nagtao nin magayon na halimbawa an Samaritana kun paano kita makakapagpatotoo manungod ki Cristo, na pinupukaw an interes kan mga nakakaulay tanganing urog pa sindang magdangog.

Tandaan na apat na bulan pa bago an pag-ani—malinaw na iyo an pag-ani nin sebada, na sa rehiyon na ini nangyayari pag tigsuli o mga Marso o Abril. Kaya posibleng Nobyembre o Disyembre na ngunyan. Nangangahulugan ini na pagkatapos kan Paskuwa kan 30 C.E., si Jesus asin an mga disipulo nagdanay nin walong bulan o labi pa sa Judea, na nagtutukdo asin nagbabawtismo. Mapa-norte na sinda ngunyan pasiring sa saindang sadiring lugar sa Galilea. Ano an naghahalat sa sainda duman?