To whenue Jesu po devi etọn lẹ po tọ́n sọn Jude bo jei Galili, yé zingbejizọnlin pànta agewaji gbọn agbegbe Samalia tọn ji. Nuṣikọna yé na gbejizọnlin lọ wutu. To nudi whèmẹ, yé nọte sẹpọ tòdaho Sikali tọn nado gbọjẹ to dotọ̀ de tó, ehe Jakọbu na ko kùn kavi na ko zọ́n kùnkùn to owhe kanweko delẹ die wayi. Kakajẹ egbé, dotọ̀ enẹ sọgan yin mimọ sẹpọ tòdaho egbezangbe tọn he nọ yin Naplouse.

Dile Jesu to gbigbọjẹ to dotọ̀ lọ pá, devi etọn lẹ yì tòdaho he to yakẹ lọ mẹ nado họ̀ núdùdù. Whenue yé ma to finẹ wẹ yọnnu Samalianu de wá nado dọ̀n osin. Jesu dọna ẹn dọmọ: “Na mi osin vude nado nù.”—Johanu 4:7.

To paa mẹ, Ju lẹ po Samalianu lẹ po ma nọ jẹpọ, na nuvẹun sinsinyẹn he tin to ṣẹnṣẹn yetọn wutu. Enẹwutu, e paṣa yọnnu lọ bọ e kanse dọmọ: “Naegbọn hiẹ, mahopọnna dọ a yin Ju de, biọ mi osin nado nù, to whenuena e yindọ yọnnu Samalianu de wẹ yẹn?” Jesu gblọn dọmọ: “Eyin hiẹ ko yọ́n nunina vọnu Jiwheyẹwhe tọn po mẹhe dọna we dọ, ‘Na mi osin vude nado nù’ po wẹ, hiẹ na ko biọ ẹ, bọ ewọ na ko na we osin ogbẹ̀ tọn.” Yọnnu lọ gblọn dọ, “Mẹdaho, hiẹ ma tlẹ tindo sindànu nado dọ̀n osin, dotọ̀ lọ sọ siso. Enẹwutu, fie wẹ hiẹ hẹn osin ogbẹ̀ tọn ehe sọn? Hiẹ ma saa klohu tọgbo mítọn Jakọbu, mẹhe na mí dotọ̀ lọ bọ ewọ lọsu po ovi etọn lẹ po gọna kanlin whégbè tọn etọn lẹ nù sọn e mẹ, kavi hiẹ klohu i wẹ?”—Johanu 4:9-12.

“Nugbla na vọ́ hù mẹdepope he nù sọn osin ehe mẹ,” wẹ Jesu dọna ẹn. “Nugbla ma na hù mẹdepope he nù sọn osin he yẹn na na ẹn lọ mẹ gbede ba, ṣigba osin he yẹn na na ẹn lọ na lẹzun asisa osin tọn de to ewọ mẹ he na to sisà jẹgbonu nado namẹ ogbẹ̀ madopodo.” (Johanu 4:13, 14) Mọwẹ, mahopọnna dọ onú ko ṣikọna Jesu, e tindo ojlo nado má ohó nugbo ogbẹ̀ tọn lọ hẹ yọnnu Samalianu lọ.

Enẹgodo, yọnnu lọ dọmọ: “Mẹdaho, na mi osin ehe, na nugbla ma nado hù mi bọ yẹn na nọ to ofi wá nado to osin dọ̀n.” Todin, e taidi dọ Jesu diọ hosọ lọ bo dọna ẹn dọmọ: “Yì, bo ylọ asu towe, na mì ni wáfi.” Yọnnu lọ gblọnna ẹn dọmọ: “Yẹn ma tindo asu de.” Ṣigba, pọ́n lehe yọnnu lọ na ko jọsi do nado mọ lehe Jesu yọ́n ninọmẹ etọn do, to whenue e dọna ẹn dọ: “Hójọhó wẹ hiẹ dọ, dọ ‘Yẹn ma tindo asu de.’ Na hiẹ ko dà asu atọ́n, podọ dawe he hiẹ tindo todin ma yin asu towe.”—Johanu 4:15-18.

Yọnnu lọ yọ́n nuhe hodidọ etọn enẹ zẹẹmẹdo, enẹwutu e dọ po nupaṣamẹ po dọ: “Mẹdaho, yẹn mọdọ yẹwhegán de wẹ hiẹ.” E sọ dohia dọ e tindo ojlo to gbigbọnu lẹ mẹ. Gbọnna? E zindonukọn dọmọ: “Tọgbo mítọn [Samalianu] lẹ basi sinsẹ̀n to osó ehe ji [Osó Gelizimi he to yakẹ]; ṣigba mìwlẹ [Ju lẹ] dọ dọ Jelusalẹm wẹ fihe gbẹtọ lẹ dona nọ basi sinsẹ̀n te.”—Johanu 4:19, 20.

Ṣigba, Jesu dohia ẹ dọ e ma yin nọtẹn sinsẹ̀n-bibasi tọn wẹ yin nujọnu lọ. E dọmọ: “Ojlẹ lọ ja to whenue mì na nọ sẹ̀n Otọ́, e ma yin to osó ehe ji kavi to Jelusalẹm gba.” Enẹgodo, e dọna ẹn dọmọ: “Ṣigba, ojlẹ lọ ja, din sọ wẹ, to whenue sinsẹ̀n-basitọ nugbo lẹ na nọ sẹ̀n Otọ́ to gbigbọ mẹ podọ to nugbo mẹ, na nugbo tọn, omẹ  mọnkọtọn lẹ dín wẹ Otọ́ te nado nọ basi sinsẹ̀n hlan ẹn.”—Johanu 4:21, 23, 24.

Nuhe dín Otọ́ lọ te to sinsẹ̀n-basitọ etọn lẹ dè ma yin fie yé nọ basi sinsẹ̀n te, ṣigba lehe yé nọ basi sinsẹ̀n gbọn. Awuji yọnnu lọ bọ e dọmọ: “Yẹn yọnẹn dọ Mẹsia, mẹhe yè nọ ylọdọ Klisti lọ na wá. To whenue ewọ na wá, e na lá onú lẹpo na mí to gbangba.”—Johanu 4:25.

To whenẹnu, Jesu hùn nugbo titengbe de dọna ẹn dọmọ: “Yẹn mẹhe to hodọna we wẹ omẹ lọ.” (Johanu 4:26) Yí nukun homẹ tọn do pọ́n! Yèdọ yọnnu de, bọ ewọ wá osin dọ̀n gbé to whèmẹ. Etomọṣo, Jesu do nukundagbe hia ẹ to aliho he jiawu de mẹ. Nuhe e ma ko dọ to gbangba na mẹdevo lẹ wẹ e dọna yọnnu lọ tlọlọ—dọ emi wẹ yin Mẹsia lọ.

Devi Jesu tọn lẹ lẹkọwa sọn Sikali po núdùdù po. Yé mọ ẹn to fie yé jo e do to dotọ̀ Jakọbu tọn tó, amọ́ todin e to hodọ hẹ yọnnu Samalianu de. Whenue devi lọ lẹ wá, yọnnu lọ jo osinzẹ́n etọn do bo dedo tòdaho lọ mẹ.

Tlolo he yọnnu lọ jẹ Sikali, e dọ nuhe Jesu dọna ẹn lẹ na gbẹtọ lẹ. E dọna yé po nujikudo po dọmọ: “Mì wá pọ́n dawe de he dọ nuhe yẹn ko wà lẹpo na mi.” Enẹgodo, vlavo nado fọnjlodotena yé, e kanse dọ: “Vlavo, be e ma yin Klisti lọ die nẹ?” (Johanu 4:29) Kanbiọ enẹ gando hosọ titengbe de go—ehe ko nọ fọnjlodotena mẹsusu sọn azán Mose tọn gbè gbọ́n. (Deutelonomi 18:18) Ehe whàn mẹhe to tòdaho lọ mẹ lẹ nado tọ́n wá bo yí nukun yetọn titi do pọ́n Jesu.

To ojlẹ enẹ mẹ, devi lẹ to Jesu vẹ̀ nado dù núdùdù he yé ko hẹnwa. Ṣigba, e gblọn dọmọ: “Yẹn tindo núdùdù de nado dù ehe mìwlẹ ma yọnẹn.” Ehe paṣa devi lẹ bọ yé to didọ to yede ṣẹnṣẹn dọmọ: “Mẹde ma saa ko hẹn nudepope wá na ẹn nado dù, kavi mẹde ko wàmọ wẹ?” Jesu gbọn homẹdagbe dali yí hogbe he dona yinuwado hodotọ etọn lẹpo ji lẹ zan nado basi zẹẹmẹ na yé dọmọ: “Núdùdù ṣie wẹ nado wà ojlo ewọ he do  mi hlan tọn podọ nado dotana azọ́n etọn.”—Johanu 4:32-34.

Azọ́n he hodọ Jesu te ma yin jibẹwawhé jinukun lẹ tọn he na wá aimẹ to osun ẹnẹ godo gba. Kakatimọ, Jesu to alọdlẹndo jibẹwawhé gbigbọmẹ tọn de, kẹdẹdile e dohia do dọmọ: “Mì ze nukun mìtọn lẹ daga bo pọ́n ogle lẹ hlan, mì na mọdọ yé ko bia na gbingbẹ̀n. Todin gbingbẹ̀ntọ lọ ko to azọ́nkuẹ lẹ yí bo to sinsẹ́n bẹpli na ogbẹ̀ madopodo, na nudotọ lọ po gbingbẹ̀ntọ lọ po nido sọgan jaya dopọ.”—Johanu 4:35, 36.

Todin, Jesu sọgan mọ kọdetọn he hodidọ etọn hẹ yọnnu Samalianu lọ hẹnwa. Omẹ Sikali tọn susu wẹ to yise dohia to ewọ mẹ na kunnudide yọnnu lọ tọn wutu, na e to didọna gbẹtọ lọ lẹ dọ: “E dọ nuhe yẹn ko wà lẹpo na mi.” (Johanu 4:39) Enẹwutu, whenue yé tọ́n sọn Sikali wá dotọ̀ lọ kọ̀n, yé biọ to Jesu si nado nọ yé dè bo dọhona yé dogọ. Jesu yigbena oylọ lọ bo nọ Samalia na azán awe.

Dile Samalianu lẹ to todoaina Jesu, mẹsusu dogọ yí i sè. Yé dọna yọnnu lọ dọmọ: “E ma yin ohó towe wutu wẹ mí yise ba gba; na mílọsu lẹ ko sè podọ mí yọnẹn dọ dawe ehe, na nugbo tọn, wẹ mẹwhlẹngántọ aihọn tọn.” (Johanu 4:42) Ayihaawe ma tin dọ yọnnu Samalianu lọ ze apajlẹ dagbe dai na nuhe dù lehe mí sọgan dekunnu gando Klisti go do, gbọn ojlo finfọndote na hosetọ mítọn lẹ dali, na yé nido kẹalọyi nudọnamẹ lẹ dogọ.

Flindọ osun ẹnẹ gbẹ́ pò jẹnukọnna jibẹwawhé—yèdọ jibẹwawhé balekun tọn he nọ wá aimẹ to amakikọ-whenu to lẹdo lọ mẹ. Enẹwutu, e taidi dọ osun novembre kavi décembre tọn mẹ wẹ yé te. Ehe dohia dọ to hùnwhẹ Juwayi owhe 30 W.M. tọn lọ godo, Jesu po devi etọn lẹ po ko yí nudi osun ṣinatọ̀n zan to Jude nado to nuplọnmẹ bosọ to gbẹtọ lẹ baptizi. Todin, yé pànta Galili to agewaji, yèdọ tòdaho he mẹ yé nọ nọ̀. Etẹwẹ to tepọn yé?