Lebuh Jesus enggau bala murid iya bejalai ari Judea ngagai Galili, sida bisi mansa Samaria. Sida berasai amat lelak. Nya alai maya tengah hari, sida ngetu belelak ba siti telaga semak nengeri Saikar. Beratus taun sebedau nya, Jakop udah numbak telaga nya. Kemayaharitu, kitai agi ulih tetemuka telaga nya semak nengeri Nablus.

Lebuh Jesus duduk ba telaga nya, bala murid iya mupuk ke pasar meli pemakai. Maya nya siku indu Samaria datai nyauk ai. Jesus lalu bejaku ngagai iya: “Beri aku ai irup.”—John 4:7.

Orang Judah enggau orang Samaria enda begulai enggau pangan diri ketegal sida bepilih mata. Nya alai indu nya tekenyit lalu nanya Jesus: “Nuan orang Judah, lalu aku tu indu orang Samaria. Nya alai, nama kebuah nuan minta ai irup ari aku?” Jesus nyaut: “Enti nuan nemu pasal pemeri pechuma ari Petara, lalu ngelala sapa ke nyebut ngagai nuan, ‘Beri aku ai irup,’ nuan tentu deka minta ai ari iya, lalu iya deka meri nuan ai pengidup.” Indu nya bejaku ngagai iya, “Tuan, nuan nadai beledi kena nyauk ai, lalu telaga tu dalam. Nya alai, ari ni nuan tau bulih ai pengidup nya? Kati nuan besai agi ari aki kami Jakop? Iya ke meri kami telaga tu, lalu iya, bala anak iya, enggau jelu tupi iya mega ngirup ai ari telaga tu.”—John 4:9-12.

Ku Jesus nyaut iya: “Semua orang ke ngirup ai tu deka aus baru. Tang barang sapa ke ngirup ai ti deka diberi aku, enda agi aus. Dalam orang nya, ai nya deka nyadi baka pun penatai ai ke meri pengidup ti meruan belama iya.” (John 4:13, 14) Taja pan Jesus lelak, tang iya agi bekunsika pemendar ngagai indu Samaria nya.

Indu nya madah ngagai iya: “Tuan, beri aku ai nya ngambika aku enda agi aus, lalu enda ibuh agi kitu nyauk ai.” Udah nya, Jesus ngubah randau nya lalu madahka: “Alai, kangauka laki nuan lalu asuh iya kitu.” Indu nya nyaut: “Aku nadai laki.” Ku Jesus: “Betul jaku nuan ke madahka diri nadai laki. Nuan udah lima kali belaki, lalu lelaki ke enggau nuan begulai diatu ukai laki nuan.” Indu nya tentu berasai tekenyit enggau utai ke ditemu Jesus pasal iya.—John 4:15-18.

Ari jaku Jesus, indu nya nemu Jesus ukai orang biasa. Ku indu nya madah: “Tuan, diatu aku nemu nuan endang nabi.” Udah nya, indu nya nunjukka minat ba pekara rohani. Baka ni? Indu nya madahka: “Aki ini kami [orang Samaria] nyembah Petara ba bukit tu [Bukit Gerisim, ke enda jauh ari nya], tang bansa kita [orang Judah] madahka orang semina tau nyembah Petara ba Jerusalem.”—John 4:19, 20.

Tang, Jesus madahka endur nyembah Petara enda penting. Iya madah: ‘Maya deka datai alai orang enda agi nyembah Apai ba bukit tu tauka ba Jerusalem. Maya deka datai, indah maya nya udah datai, alai bala penyembah ti bendar deka nyembah Apai nitihka iring  kuasa kudus Iya sereta sejalai enggau pemendar. Kebendar iya, Apai benung ngiga orang ke baka nya ngambika nyembah Iya.’—John 4:21, 23, 24.

Ba Petara, endur alai nyembah Iya enda penting, tang Iya ngemeratka agi chara orang nyembah Iya. Indu nya alit ati lalu madah: “Aku nemu Messiah ke dikumbai Kristus deka datai. Lebuh iya datai, iya deka madahka semua utai ngagai kami.”—John 4:25.

Udah nya, Jesus bekunsika siti pemendar ti amat penting. Ku Jesus: “Aku meh iya, ke benung bejaku enggau nuan.” (John 4:26) Perundingka tu: Indu nya datai nyauk ai maya tengah hari. Lalu Jesus madah ngagai indu nya, iya meh Messiah. Maya nya, Jesus bedau agi madah ngagai orang bukai pasal iya nya Messiah. Tang iya madahka tu ngagai indu Samaria nya. Tu tentu amat istimewa!

Lebuh bala murid Jesus pulai ari Saikar, sida meda iya bejaku enggau siku indu Samaria. Lebuh sida datai, indu nya ninggalka kebuk ai iya lalu pulai ngagai Samaria.

Lebuh ba Saikar, indu nya madah ngagai orang bukai pasal jaku Jesus. Enggau yakin, iya madah: “Aram kitai meda orang ke udah madah ngagai aku semua utai ke udah dikereja aku.” Ngambika ulih meransang minat sida, indu nya lalu nanya: “Kada enda iya Kristus?” (John 4:29) Tanya indu nya amat penting laban kenyau ari jeman Moses, orang deka nemu sapa Kristus. (Ulang Adat 18:18) Ketegal nya, orang Samaria deka betemu enggau Jesus kena nemu saut iya.

Bala murid Jesus ngasuh iya makai. Tang iya madah: “Aku bisi pemakai ke enda ditemu kita.” Bala murid iya lalu bejaku enggau pangan diri: “Nadai orang udah meri iya pemakai, enda pia?” Jesus lalu nerangka reti jaku iya: “Pemakai aku nya ngereja peneka Iya ke  ngirumka aku, lalu nembuka pengawa ke diberi Iya.”—John 4:32-34.

Maya nya, Jesus enda bejaku pasal pengawa ngetau barli ke deka digaga empat bulan da agi. Tang, Jesus nyebut pasal pengawa ngetau secara rohani. Iya madah: “Peda! Ladang udah mansau, lalu sedia deka diketau. Orang ke ngetau udah nerima gaji lalu benung ngumpul utai ke diketau, iya nya orang ke deka nerima pengidup ti meruan belama iya. Nya alai, orang ke nabur benih enggau orang ke ngetau deka sama gaga ati.”—John 4:35, 36.

Jesus engka nemu, mayuh orang ari Saikar deka arapka iya pengudah sida ninga jaku indu nya. Indu nya madah: “Iya madah ngagai aku semua utai ti udah dikereja aku.” (John 4:39) Nya alai, lebuh sida datai betemu enggau Jesus, sida minta iya diau enggau sida lalu ngajar sida mayuh agi utai. Jesus pan diau ba dia pengelama dua hari.

Asil iya, majak mayuh orang Samaria arapka Jesus. Sida madah ngagai indu nya: “Diatu kami arap ukai semina laban utai ke disebut nuan, tang laban kami empu udah ninga. Lalu kami nemu iya endang penyelamat dunya.” (John 4:42) Indu Samaria nya nunjukka teladan ti manah bekaul enggau chara kitai ulih meri saksi pasal Jesus. Kitai deka narit minat peninga kitai ngambika sida deka nemu mayuh agi.

Maya nya, bisi empat bulan da agi sebedau ngetau barli. Ba dia, maya ngetau barli selalu digaga maya musin bungai. Nya alai, utai ke nyadi entara Jesus enggau indu Samaria nya engka nyadi ba bulan November tauka bulan Disember. Reti nya pengudah Pengerami Paska ba taun 30 M., Jesus enggau bala murid iya diau ba Judea kira-kira lapan bulan, ngambika ulih ngajar sereta maptisa orang. Udah nya sida pulai ke Galili. Nama deka nyadi ngagai sida ba dia?