Omu Yesu natumbaji twenyi vapwile nakufuma kuYuleya nakuya kuNgalileya, vapulasanyine muSamaliya. Vazeyele chikuma hakutambuka ou ungeji. Jino omu likumbi lyahetele hamulungu, vahetele kwakamwihi nanganda yaSukale, kaha vashinganyekele kuhwimako halishima lyaYakova. Lishima kana Yakova alingile lyakulifulila ivene chipwe pamo afwetele vatu vamufulilelyo. Noholyapwa lishima kana kulyatwama, lyatwama kwakamwihi nanganda yaNablus.

Shimbu Yesu apwile nakuhwima kwakamwihi nalize lishima, tumbaji twenyi vayile munganda yapwile hakamwihi nakulanda vyakulya. Omu valingile nyimako, pwevo umwe wakaSamaliya ejile nakuswita meya. Yesu amulombele ngwenyi: “Nguhaneko meya akunwa.”—Yowano 4:7.

VaYuleya navaSamaliya kavalinwishilenga meyako mwomwo valimwenenga ulumbi. Shikaho uze pwevo hakulikomokela, himwahulisa jino ngwenyi: “Uno naungulomba ngachilihi meya akunwa okunyi ove wapwa ukaYuleya, ami ngupwevo wakaSamaliya?” Yesu amukumbulwile ngwenyi: “Nge watachikizanga wana wakanyombo waKalunga, nou nawa ali nakuhanjika kuli ove ngwenyi, ‘Nguhaneko meya akunwa,’ kachi unamulombo, kaha kachi nakuhane meya akuyoya.” Jino uze pwevo ambile kuli Yesu ngwenyi: “Ove mwata, kaweshi nambekete yakuswichisa meyako, kaha lishima nawa lyalisuku. Shikaho kulihi unawane owo meya akuyoya? Kutala ove unahambakana kaka yetu Yakova uze atuhanyine lino lishima, uze nawa anwinengamo meya hohamwe navana venyi navimuna jenyi numba?”—Yowano 4:9-12.

Yesu ambile ngwenyi: “Weshowo mwanwa kumeya awa mwakevwa lipwila cheka. Oloze weshowo mwanwa kumeya aze nangumuhana ami keshi kukevwa cheka lipwilako, kaha meya aze nangumuhana ami nawalumuka kupwa kaselwoke kameya muli ikiye kakuvweluka meya akuyoya chahaya myaka yosena.” (Yowano 4:13, 14) Enga, numba tuhu Yesu azeyele, oloze alisuwile kwambulila ou pwevo wakaSamaliya muchano wakutwala kukuyoya.

Hahaze vene uze pwevo ambile ngwenyi: “Ove mwata, nguhane owo meya kana, mangana nguzenekenga kwivwa cheka lipwila chipwe kwizanga kuno nakuswita meya.” Jino Yesu alumwine chihande, kaha ambile kuli ikiye ngwenyi: “Yako, kasanyike lunga lyove mwizenga kuno.” Uze pwevo amukumbulwile ngwenyi: “Ami kangwatwama nalungako.” Uze pwevo alikomokelele chikuma jino havyuma amulwezele Yesu ngwenyi: “Unahanjika mwakwoloka ngwove, ‘Ami kangwatwama nalungako.’ Mwomwo wasombokele kumalunga vatanu, kahou lunga uli nenyi oholyapwa keshi lunga lyove wakukumbatako.”—Yowano 4:15-18.

Vyumevi ahanjikile Yesu vyakomwesele chikuma uze pwevo. Ngocho ambile ngwenyi: “Ove mwata, ngunamono ngwami ove ukapolofweto.” Jino uze pwevo asolwele ngwenyi asaka vyuma vyakushipilitu. Mujila muka? Atwalileho kuhanjika ngwenyi: “Vakakuluka jetu [vaSamaliya] valemeselelenga Kalunga hapili yino [Pili yaNgelaze yize yapwile hakamwihi], oloze enu [vaYuleya] ngwenu, kuYelusalema kukiko vatela vatu kulemeselanga Kalunga.”—Yowano 4:19, 20.

Oloze Yesu alumbunwine ngwenyi chihela chakulemesela Kalunga kachapwile chachilemuko. Ambile ngwenyi: “Ola yili nakwiza omu namukazeneka kulemesela Tata hapili yino chipwe kuYelusalema.” Kaha amulwezele nawa ngwenyi: “Ola yili nakwiza, kaha yikiko vene yino, omu vaka-kulemesa vamuchano  navakalemesanga Tata mushipilitu namumuchano, mwomwo chikupu vene Tata ali nakutondatonda vatu vangana vamulemesenga.”—Yowano 4:21, 23, 24.

Vyuma asaka Setu kuli vaka-kumulemesa vamuchano shina mujila veji kumulemeselangamo, keshi nge kuchihela veji kumulemeselangako. Uze pwevo awahililile chikuma hakwivwa vyumevi. Ngocho ambile ngwenyi: “Ngunatachikiza ngwami Meshiya ali nakwiza uze vavuluka ngwavo, Kulishitu. Kaha heshoho mwakejila, mwakatulweza kanawa vyuma vyosena.”—Yowano 4:25.

Jino Yesu avulukile muchano waulemu ngwenyi: “Ami nguli nakuhanjika nayove, yami vene ikiye.” (Yowano 4:26) Achishinganyekenu hachuma kana. Uze pwevo ejilenga hamulungu nakuswita meya. Oloze ikiye vevwilile uselewa kuli Yesu. Kaha Yesu amulwezele hatoma chuma chize kanda alwezengaho lyehi vatu veka, ngwenyi ikiye Meshiya.

Omu tumbaji twaYesu vakindulukile kufuma muSukale muze vayile nakulanda vyakulya, vawanyine mwata wavo ali vene haze halishima lyaYakova vamusezele. Vamuwanyine ali nakushimutwila napwevo wakaSamaliya. Omu vahetele, uze pwevo asezele mulondo wenyi nakuya munganda.

Omu ahetele muze munganda yaSukale, uze pwevo ahichililemo vatu vyuma vize amulwezele Yesu. Akunyukile nakuvalweza ngwenyi: “Twayenu mumone mutu uze nangulweze vyuma vyosena ngwalinga.” Pamo hakusaka vatu vapwenga napwipwi yakuya nakutala Yesu, ou pwevo ahulishile ngwenyi: “Mutu kana ngwavo azeneke kupwa Kulishitu?” (Yowano 4:29) Echi chihula chakwachile vatu kumichima mwomwo vapwile nakuvandamina Yesu putu vene kumakumbi aMose. (Lushimbi lwamuchivali 18:18) Ngocho, vatu vamunganda kaneyi valovokele mangana vakalimwene Yesu nameso avo kapu.

Jino tumbaji valwezele Yesu mangana alyenga vyakulya vize vayile nakulanda munganda. Oloze ikiye ambile ngwenyi: “Ami nguli nakulya chize munazeneka enu kutachikiza.” Tumbaji valikomokelele chikuma, kaha valihanjikishile mwavomwavo ngwavo: “Uno kuli mutu umwe namunehela vyakulya tahi?” Yesu ahanjikile jino mazu aze apwa amalemu kuli  vaka-kumukavangiza vosena ngwenyi: “Kulya chami shina kulinga mwaya muchima wayauze angutumine nakukumisa mulimo wenyi.”—Yowano 4:32-34.

Yesu hano kapwile nakuvuluka mulimo wakwaha jimbutoko, uze wapwile kafwe tukweji vawana kulutwe. Oloze apwile nakuvuluka mulimo wakwaha chakushipilitu. Ambile ngwenyi: “Andulenu meso enu mutale mande, kaha namumona ngwenu anatomasana lyehi, anatemo kwaha. Muka-kwaha ali lyehi nakutambula fweto nakukungulula nawa mihako yakukuyoya chahaya myaka yosena, mangana muka-kukuva namuka-kwaha vawahilile hamwe.”—Yowano 4:35, 36.

Halwola kanelu pamo Yesu atachikijile vyuma navisoloka mwomwo yavyuma vize ahanjikile nauze pwevo wakaSamaliya. Vatu vavavulu vamuSukale vamwitavilile mwomwo yavyuma vize avalwezele uze pwevo ngwenyi: “Nangulweze vyuma vyosena ngwalinga.” (Yowano 4:39) Shikaho omu vatu vafumine muSukale nakwiza kuze kulishima, valembelelele Yesu ngwavo atwame navo mangana avanangule vyavivulu. Yesu etavilile, kaha atwamine muSamaliya makumbi avali.

VaSamaliya vevwililile kuvyuma ahanjikile Yesu, kaha vavavulu vamwitavilile. Valwezele uze pwevo ngwavo: “Etu katwetavile mwomwo yavyuma watulwezanga kahako, oloze tunalivwila etu vavene, kaha tunatachikiza ngwetu ou mutu chikupu vene ikiye mulwilo wakaye.” (Yowano 4:42) Uze pwevo wakaSamaliya alingile chuma chamwaza chize chasolola jila twatela kwambulwilamo vyaKulishitu, hakwivwisanga vatu kuwaha mangana vatwaleho lika kwivwilila.

Anukenu ngwenu halwola kanelu, kwasalile tukweji vawana numba mulimo wakwaha mbale uputuke uze wapwilengako kuchivatuko chavula. Kaha chasoloka nge Yesu ahanjikile nauze pwevo wakaSamaliya muNovember chipwe muDecember. Echi chili nakulumbununa nge kufuma haPaseka yamu 30 C.E., Yesu natumbaji twenyi vatwamine kafwe tukweji 8 muYuleya nakunangula vatu nakuvambapachisa. Kufumaho, vatalishile jino kunote kungalila yakwimbo lyavo kuNgalileya. Vyuma muka vakawanyine kuze?