A Zeezi ne a karen-biisã sẽn wa n yi Zʋʋde n debd Galɩle wã, b tũu sor ning sẽn pasgd Samaari soolmã. Wĩnto-sʋk sẽn wa n ta tɩ lebg yaamsã, b yalsa Samaari tẽng a ye sẽn boond tɩ Sikaare, n na n vʋʋse. Yaa a Zakoob bulgã sɛɛg la b sẽn yalsã. Tõe tɩ yaa a Zakoob meng n tu bulgã, wall a yaoo neb tɩ b tu. Hal ne rũndã, bulgã ketame. Pa zãr ne Napluuz tẽngã ye.

A Zeezi paa bulgã sɛɛg n vʋʋsdẽ, t’a karen-biisã kẽng n na n tɩ ra rɩɩbo. B sẽn loogã, Samaari pag a ye n wa n na n toog koom. A Zeezi kosa pagã koom n na n yũ.—Zã 4:7.

Zʋɩf-rãmbã ne Samaari nebã ra kisa taaba. B ra pa wae n gomd ne taab ye. Dẽnd a Zeezi sẽn gom ne pagã ling-a-la wʋsgo, t’a sok yaa: “Yɩta a wãn tɩ yãmb sẽn yaa Zʋɩfã kot maam a Samaari nin-paga koom n na n yũ?” A Zeezi leokame: “Fo sã n dag n miẽ Wẽnnaam kũunã, la f mi ned ning sẽn kot-a foom koomã n na n yũ wã, yaa foom n dag n na n kos-a, la a rag n na n kõo foom ko-bundga.” Pagã yeel-a lame yaa: “M kẽem sõngo, yãmb ka tar baa fɩ n na n toog koomã bulgẽ wã ye, tɩ bulgã yaool n zulmẽ. Dẽ, yãmb na n yãnda ko-bund-kãng yɛɛnẽ? Yãmb yɩɩda tõnd yaab a Zakoob sẽn kõ-a tõnd bul-kãngã wã la? Bãmb meng yũu a koom, tɩ b kom-dibli ne b rũm-bãgã me yũ.”—Zã 4:9-12.

A Zeezi yeel-a lame: ‘Ned ning fãa sẽn yũud ko-kãngã, ko-yũud na leb n yõk-a. La ned ning fãa sẽn na n yũ koom ning mam sẽn na n kõ-a wã, ko-yũud kõn leb n yõk-a ye: la koom ning mam sẽn na n kõ-a wã na n lebga ko-bundg sẽn na n buli, hal tɩ ta vɩɩm sẽn kõn sa wã pʋgẽ.’ (Zã 4:13, 14) Baa ne yaamsã, a Zeezi yãka yam n na n taas Samaari pagã koe-noogã sẽn kõt vɩɩmã.

Pagã yeela a Zeezi yaa: “M kẽem sõngo, kõ-y maam ko-kãnga, tɩ ko-yũud da leb n yõk maam, tɩ m leb n wat ka n yãkd koomã ye.” La a Zeezi maana wa a na n toeema sõsgã, n yeel pagã woto: “Kẽng n tɩ bool f sɩdã, la f lebg n wa ka.” Pagã leokame: “Mam ka tar sɩd ye.” A Zeezi yeel-a lame yaa: “Fo maana neere, fo sẽn yeel tɩ f ka tar sɩdã. Bala, fo talla sɩdb a nu, la fo sẽn tar a soab moasã wã ka fo sɩd ye. Fo togsa sɩd yellã pʋgẽ.” A Zeezi sẽn bãng woto fãa wã linga pagã wʋsgo.—Zã 4:15-18.

Gom-kãensã kɩtame tɩ pagã bãng t’a Zeezi pa nin-zaalg ye. A yeelame: “M kẽem sõngo, mam neeme tɩ yãmb yaa Wẽnnaam no-rɛɛsa.” A sẽn paas bũmb ningã wilgdame t’a nonga Wẽnnaam. Ad a sẽn yeele: “Tõnd ba-rãmbã [Samaari nebã] dag n pʋʋsda tãn-kãngã zugu [Gerizim tãngã sẽn pa zãr ne be wã]. La yãmb Zʋɩf-rãmbã yetame tɩ zĩig ning b sẽn tog n pʋʋsã yaa Zeruzalɛm.”—Zã 4:19, 20.

La a Zeezi wilga pagã tɩ Wẽnnaam tũubã wɛɛngẽ, pa zĩigã n tar yõod ye. A yeela pagã yaa: “Wakat n wat tɩ ka tãn-kãngã zug wall Zeruzalɛm la yãmb na n pʋʋs y ba wã ye.” A paasa woto: “Wakat watame, la yaa moasã,  tɩ tõnd ba wã waoogdb sɩd-sɩdã na n waoog bãmb ne b sɩɩse la ne sɩda. Bala, yaa waoogdb a woto buud la tõnd ba wã baooda.”—Zã 4:21, 23, 24.

Sɩd me Wẽnnaam nifẽ, pa zĩig ning b sẽn pʋʋsd-a wã n tar yõod n yɩɩd ye. Yaa b sẽn tũud-a to-to wã. Gomdã kẽe pagã, t’a yeel yaa: “Mam miime tɩ Mesi wã, soab ning b sẽn boond tɩ Kirisã na n waame. B sã n wa, b na n wilga tõnd bũmba fãa.”—Zã 4:25.

Wakat kãng la a Zeezi vẽneg n togs-a sɩdã. A yeelame: “Maam, soab ning sẽn gom ne foomã, yaa maam la bãmba.” (Zã 4:26) Tags-y n ges-y! Pag sẽn yik wĩnto-sʋk n na n tɩ toog koom, mik a na n sega a Zeezi t’a togs-a t’a yaa Mesi wã. Bark tek woto! Wõnda a Zeezi ra nan pa togs ned a to vẽeneg t’a yaa Mesi wã ye.

A Zeezi karen-biisã tɩ raa rɩɩbã n lebg n wa. B taame n mik t’a Zeezi ket n bee a Zakoob bulgã sɛɛga, la a ra sõsda ne pag sẽn yit Samaari. Karen-biisã sẽn wa wã, pagã basa a yʋʋrã n tees tẽngã pʋgẽ.

Pagã tɩ togsa Sikaar nebã bũmb nins a Zeezi sẽn togs yẽ wã. A ra gomda ne bas-m-yam. Ad a sẽn yeele: “Wa-y n ges-y rao sẽn togs maam bũmb nins fãa mam sẽn maanã!” A paasa woto: “Dẽ yĩnga, ka na n yɩ Kirisã?” (Zã 4:29) Tõe tɩ yaa sẽn na yɩl tɩ b sak n wa kelg a Zeezi goamã la a sẽn sok woto wã. Nebã fãa rat n bãnga sã n yaa Kirisã. Bala, hal a Moyiiz wakatã, b gũuda Mesi wã waoongo. (Tõodo 18:18) Sokrã kɩtame tɩ tẽngã neb wʋsg sɩd wa na n yã a Zeezi ne b nifu.

Pagã sẽn loogã, karen-biisã pẽdga a Zeezi n dat t’a rɩ, t’a leok-b woto: “Mam tara rɩɩb yãmb sẽn ka mi, n na n dɩ.” Karen-biisã pa wʋm a gomdã võor ye. B goma ne taab n yeel tɩ “daar ninga ned n tall rɩɩb n wa n kõ-ba.” A Zeezi maaga a yĩng n leok-ba, hal t’a sẽn yeel bũmb ningã yaa saglg n kõ kiris-ned fãa.  A yeelame: “Mam rɩɩbã, yaa tɩ maan sẽn tʋm-a maamã raabo, la m baas tʋʋmd ning b sẽn kõ maam tɩ m maanã.”—Zã 4:32-34.

A Zeezi sẽn gomd tʋʋmd ning yellã pa koodã kẽebg sẽn da ket n ta kiis a naasã ye. Yaa Wẽnnaam nebã tigsg la a sẽn mak ne kẽebgã. A sẽn yeel bũmb ningã n wilgd rẽ. A yeela woto: “Zẽk y nens n ges pʋtã sẽn pelg n dat tigsgã. Sẽn tigsd-a wã zoe n deegda a tʋʋm yaoodo, la a tigsda koodã wakat sẽn kõn sa yĩnga. Woto, sẽn bʋt-a wã ne sẽn tigsd-a wã naagda taab n kɩdme.”—Zã 4:35, 36.

Tõeeme t’a Zeezi ra zoe n mii bũmb nins sẽn na n maan yẽ ne Samaari pagã sõsgã poorã. Sikaar tẽngã neb wʋsg sẽn kelg pagã goamã, b tẽe a Zeezi. Pagã ra yeta nebã yaa: ‘A togsa maam bũmb nins fãa mam sẽn maanã.’ (Zã 4:39) Tẽngã nebã sẽn wa bulgẽ wã, b kosa a Zeezi t’a pa ne bãmba, n sõs ne-b n paase. A Zeezi sakame, n sɩd pa Samaari rasem a yiibu.

Samaari nebã sẽn kelg a Zeezi wã, neb a taab me n tẽ-a. B yeela pagã yaa: “Ka leb n yaa fo goamã yĩng la tõnd sẽn tẽed a Zeezi wã ye. Bala, tõnd mensã wʋma b goamã, la tõnd miime tɩ sɩd yaa bãmb la dũni fãagdã.” (Zã 4:42) Samaari pagã kõo mak-sõng sẽn sõngd tõnd tɩ d bãng tɩ d sã n wa kõt Kirisã kaseto, d segd n talla goam sẽn na n kɩt tɩ nebã rat n bãng bũmb wʋsg n paase.

Tẽeg-y tɩ koodã kẽebg ra ket n taa kiis a naase. Beenẽ, b kẽebda orzã tʋʋlg la tʋʋl-nif kiuugã pʋgẽ. Dẽnd a Zeezi sẽn wa n gomdã tɩ ra yaa sɩpaolg bɩ yʋʋm-sar kiuugã sẽnese. Woto leb n sõngdame tɩ d bãng tɩ yʋʋmd 30 Pakã poore, a Zeezi ne a karen-biisã maana kiis a nii bɩ sẽn yɩɩd rẽ Zʋʋde, n zãms nebã la b lis-ba. Masã wã, b rɩka sor n kuiis Galɩle. B sã n ta be, bõe n na n maane?