Ge ba le tseleng ba etšwa Judea ba eya Galilea, Jesu le barutiwa ba gagwe ba ya ka leboa ba phatša seleteng sa Samaria. Ba lapišitšwe ke leeto. Mo e ka bago mosegare wa sekgalela, ba ema kgauswi le motse wa Sikara gore ba khutše sedibeng seo se ka bago se epilwe ke Jakobo goba a lefile batho gore ba se epe nywageng e makgolo e fetilego. Go fihla le mehleng ya rena, sediba seo se ka hwetšwa kgauswi le motse wa mehleng yeno wa Nablus.

Ge Jesu a sa khuditše kgauswi le sediba, barutiwa ba gagwe ba ya motseng wa kgauswi go yo reka dijo. Mosadi wa Mosamaria o tla go ga meetse ge ba sa ile. Jesu o re go yena: “Mphe meetse ke nwe.”—Johane 4:7.

Bajuda le Basamaria ka kakaretšo ga ba nwešane meetse ka baka la kgethollo e tsemilego medu. Ka gona, mosadi yo o maketše gomme o a botšiša o re: “Go tla bjang gore wena, o re o le Mojuda o nkgopele meetse mola ke le mosadi wa Mosamaria?” Jesu o a araba o re: “Ge nkabe o tsebile gore mpho e sa lefelelwego ya Modimo ke eng le gore ke mang yo a rego go wena: ‘Mphe meetse ke nwe,’ o ka be o kgopetše yena gomme a ka be a go neile meetse a phelago.” Mosadi o araba ka gore: “Mohlomphegi, ga o na le kgamelo ya go ga meetse, le gona sediba se a iša. Ka gona meetse a gago a phelago a tšwa mothopong ofe? Na o feta rakgolokhukhu wa rena Jakobo yo a re neilego sediba se, le yo yena ka noši gotee le barwa ba gagwe le diruiwa tša gagwe ba nwelego meetse a sona?”—Johane 4:9-12.

Jesu o re: “Yo mongwe le yo mongwe yo a nwago meetse a o tla buša a nyorwa. Mang le mang yo a nwago meetse ao ke tlago go mo nea ona a ka se ke a nyorwa le ka mohla, eupša meetse ao ke tlago go mo nea ona, go yena e tla ba sediba sa meetse seo se runyago bakeng sa go nea bophelo bjo bo sa felego.” (Johane 4:13, 14) Ee, le ge Jesu a lapile, o ikemišeditše go abelana le mosadi wa Mosamaria mantšu ao a neago bophelo a therešo.

Ke moka mosadi o re: “Morena, mphe meetse ao, e le gore ke se hlwe ke nyorwa goba ke dula ke etla lefelong le go tlo ga meetse.” Bjale go bonala Jesu a fetoša seo ba bolelago ka sona gomme o re go yena: “Sepela o yo bitša monna wa gago le tle mo.” O araba ka gore: “Ga ke na monna.” Eupša o tlabja ke seo Jesu a se tsebago ge a mmotša a re: “O a rereša ge o re: ‘Ga ke na monna.’ Gobane o bile le banna ba bahlano gomme monna yo o nago le yena gona bjale ga se monna wa gago.”—Johane 4:15-18.

O kwa gabotse seo Jesu a mmotšago sona, ka gona o bolela a maketše o re: “Mohlomphegi, ke lemoga gore o moporofeta.” Ke moka o bontšha gore o kgahlegela dilo tša moya. Bjang? O tšwela pele o re: “Borakgolokhukhu ba rena [Basamaria] ba be ba rapela thabeng ye [Thaba ya Geritsima, yeo e lego kgauswi]; eupša lena [Bajuda] le re Jerusalema ke lefelo leo batho ba swanetšego go rapela go lona.”—Johane 4:19, 20.

Lega go le bjalo, Jesu o hlalosa gore lefelo la borapedi ga le bohlokwa. O re: “Go tla nako yeo ka yona le ka se kego la rapela Tate thabeng ye goba Jerusalema.” Ke moka a mmotša a re: “Nako e a tla  le bjale ke yona, yeo ka yona barapedi ba kgonthe ba tlago go rapela Tate ka moya le ka therešo, gobane ruri Tate o nyaka ba bjalo gore ba mo rapele.”—Johane 4:21, 23, 24.

Seo Tate a se nyakago go barapedi ba therešo ga se moo ba rapelago gona eupša ke tsela yeo ba rapelago ka yona. Mosadi yo o kgahlegile. O re: “Ke tseba gore Mesia o etla, e lego yo a bitšwago Kriste. Ge yoo a fihla, o tla re tsebiša dilo ka moka phatlalatša.”—Johane 4:25.

Ke moka Jesu o utolla therešo e bohlokwa o re: “Nna yo ke bolelago le wena, ke yena yoo.” (Johane 4:26) Nagana ka seo! Mosadi o tla go ga meetse mosegare wa sekgalela. Lega go le bjalo, Jesu o mmontšha botho ka tsela e kgahlišago. O mmotša ka go lebanya seo go bonagalago a se a tšwa a se bolela phatlalatša go ba bangwe—gore ke yena Mesia.

Barutiwa ba Jesu ba boa Sikara ba swere dijo. Ba mo hwetša a le sedibeng sa Jakobo moo ba mo tlogetšego gona, eupša bjale o bolela le mosadi wa Mosamaria. Ge barutiwa ba fihla, o tlogela moeta wa gagwe ke moka a ya motseng.

Ge a fihla Sikara, mosadi yoo o anegela batho dilo tšeo Jesu a mmoditšego tšona. O ba botša a kgodišegile o re: “Etlang mo le bone motho yo a mpoditšego dilo ka moka tše ke di dirilego.” Ke moka, mohlomongwe e le go tsoša kgahlego, o a botšiša o re: “Na mohlomongwe yena yoo ga se yena Kriste?” (Johane 4:29) Yeo ke potšišo ya mabapi le taba e bohlokwa—yeo e bego e dutše e ratwa go tloga mehleng ya Moshe. (Doiteronomio 18:18) Seo se dira gore batho ba motseng ba tle ba tlo iponela Jesu.

Ka nako yeo, barutiwa ba kgopela Jesu gore a je dijo tšeo ba tlilego le tšona. Eupša o araba ka gore: “Ke na le dijo tšeo ke di jago tšeo lena le sa tsebego ka tšona.” Barutiwa ba makatšwa ke seo, ba boledišana seng sa bona, ba re: “Na go na le motho yo a mo tlišeditšego sa go ja?” Jesu ka botho o ba hlalosetša ka mantšu ao a bolelago se sengwe  go balatedi ba gagwe ka moka, a re: “Dijo tša ka ke gore ke dire thato ya yo a nthomilego le go phetha modiro wa gagwe.”—Johane 4:32-34.

Modiro wo Jesu a bolelago ka wona ga se wa puno ya mabele, wo o tla tlago ka morago ga dikgwedi tše nne. Go e na le moo, Jesu o bolela ka puno ya moya, ka ge a tšwela pele a bontšha ka gore: “Emišang mahlo le bone mašemo gore a šweufaletše go bunwa. Ga bjale mmuni o hwetša moputso e bile o kgoboketša dienywa bakeng sa bophelo bjo bo sa felego, e le gore mobjadi le mmuni ba thabe gotee.”—Johane 4:35, 36.

Jesu a ka ba a be a šetše a lemogile mafelelo a go gahlana ga gagwe le mosadi wa Mosamaria. Ba bantši ba ba tšwago Sikara ba dumela go yena ka baka la bohlatse bjo mosadi yo a ba neago bjona, gobane o botša batho o re: “O mpoditše dilo ka moka tše ke di dirilego.” (Johane 4:39) Ka baka leo, ge ba etla sedibeng ba etšwa Sikara, ba kgopela Jesu gore a dule gomme a tšwele pele a bolela le bona. Jesu o amogela taletšo ya bona gomme o dula Samaria matšatši a mabedi.

Ge Basamaria ba theetša Jesu, ba bantši ba dumela go yena. Ba botša mosadi yoo ba re: “Ga re sa dumela ka baka la polelo ya gago; gobane re ikwetše ka noši gomme re tseba gore motho yo ka kgonthe ke mophološi wa lefase.” (Johane 4:42) Ga go pelaelo gore mosadi wa Mosamaria o bea mohlala o mobotse wa kamoo re ka neago bohlatse ka Kriste, ka go tsoša kgahlego e le gore bao ba re theetšago ba nyake go kwa tsebišo e oketšegilego.

Gopola gore ke dikgwedi tše nne pele ga puno—go bonagala e le puno ya garase, yeo moo tikologong ye e bago ka seruthwane. Ka gona, mohlomongwe mo nakong ye ke November goba December. Se se bolela gore ka morago ga Paseka ya 30 C.E., Jesu le barutiwa ba gagwe ba feditše mo e ka bago dikgwedi tše seswai ba le Judea ba ruta le go kolobetša. Bjale ba leba ka leboa tikologong ya gabo bona ya Galilea. Ba letetšwe ke’ng moo?