Jesús chu kstalaninanin taxtukgo kJudea chu amakgo knorte, anta kʼGalilea, pero xlakata nachankgo anta, xlititaxtutkan kSamaria. Tastunumaja chu lu tlakgwankgonit. Wa xlakata tachokgokgo xlakata najaxkgo lakatsu kSicar, kxpaxtun pozo nema max wa xtlawanit Jacob o xmatlawinanit makgasata. La uku, uma pozo wijku chu wi lakatsu kkachikin Nablus.

Jesús jaxa kxpaxtun pozo chu kstalaninanin ankgo tamawakgo taway. Akxnitiya chin chatum puskat samaritana xlakata namakutu chuchut, chu Jesús wani: «Kakintawa chuchut» (Juan 4:7).

Xlakata judíos ni katalalinkgo samaritanos, puskat kaks lilakawan chu kgalhskin: «¿Tuku xlakata maski wix judío, kiskinipat chuchut, maski akit puskat xalak Samaria?». Jesús kgalhti: «Komo xtilakgapasti tamaskiwin nema kaj xachunata masta Dios, chu ama tiku waniman: “Kakintawa chuchut”, wix xtiskini, chu xla xtimaxkin chuchut nema masta latamat». Wa xlakata puskat wan: «Wix nipara kgalhiya tuku pumakutuya chuchut, chu pozo lu pulhman. Wa xlakata, ¿niku natiyaya uma chuchut nema masta latamat? Wix ni tlakg xlakaskinka nixawa xamakgan kintlatkan Jacob, tiku kinkamaxkin uma pozo chu na anta katakgotnalh xkamanan chu xʼanimales, ¿ni xlikana?» (Juan 4:9-12).

Jesús wani: «Putum tiku nalikgotnan uma chuchut nakgalhputipara. Putum tiku nalikgotnan chuchut nema akit nakmaxki nikxni katikgalhputipa, wata chuchut nema akit nakmaxki nalitaxtu la taxtunu nema namaxki latamat nema ni kgalhi xlisputni» (Juan 4:13, 14). Chuna la akxilhaw, maski Jesús tlakgwanita, litachuwinan samaritana tuku xaxlikana nema namakgtaya nalatama putum kilhtamaku.

Akxni puskat kgaxmatli uma tachuwin, wani Jesús: «Kakimaxki uma chuchut, xlakata nialh nakkgalhputi chu nialh nakmin xkgatnan unu». Ama kilhtamaku, Jesús lakgpali tuku litachuwinama chu wani: «Kapit tasaniya minchixku chu katata unu». Puskat kgalhtinan: «Ni kkgalhi kinchixku». Chu Jesús wani: «Xlikana akxni wana: “Ni kkgalhi kinchixku”. Xlakata tatamakgaxtokgnita kgalhkitsis lakchixkuwin, chu tiku uku tawila ni tamakgaxtokga» (Juan 4:15-18). ¡Max kaks lilakawan pi Jesús katsi xpalakata!

Uma tachuwin lu kaks malakawanilh puskat chu wa xlakata wani: «Kakxilha pi wix palakachuwina». Uma puskat limasiya pi lakgati tuku xla Dios akxni wan: «Xalakgmakgan kinatlatnikan [samaritanos] kakninanikgolh Dios kʼuma lanka sipi [nema wanikan Guerizim chu ni makgat xwi], pero wixin [judíos] wanatit pi anta kJerusalén niku latamanin xlikakninanitkan Dios» (Juan 4:19, 20).

Pero Jesús liwana wani pi niku kakninanikan Dios ni wa tuku tlakg xlakaskinka: «Mima kilhtamaku akxni nipara kʼuma sipi, chu nipara kJerusalén nakakninaniyatit xaTlat». Chu wampara: «Pero, kilhtamaku nachin, xlikana pi chinita, akxni xaxlikana xkakninanin Dios nalikakninanikgo xaTlat espíritu chu xaxlikana, xlakata xaTlat kaputsama tiku chuna kakninaniputunkgo» (Juan 4:21, 23, 24).

 Wa xlakata, tuku tlakg xlakaskinka akxilha xaTlat wa la kakninanikan chu ni wa niku kakninanikan. Puskat kaks lilakawan. Chu wan: «Akit kkatsi pi mima Mesías tiku wanikan Cristo. Akxni namin xla putum nakinkawaniyan» (Juan 4:25).

Chu Jesús wani tuku lu xlakaskinka: «Akit, wa ama, tiku tachuwinaman» (Juan 4:26). ¡Lu kaks malakawaninan! Uma puskat tiku minit makutu chuchut tastunut, kgaxmata pi Jesús wani tuku nina tiku makatsini: pi xla wa Mesías. ¡Lu lanka talakgalhaman tuku Jesús wani!

Uma kilhtamaku xtamakgalhtawakgen liminkgo liwat nema kitamawakgolh kSicar. Jesús antiya wi lakatsu xpozo Jacob anta niku makgxtakgkgolh, pero la uku tachuwinama chatum samaritana. Puskat anta makgxtakga xpuxkgatni chu an kkachikin.

Akxni chan kSicar, tsuku kalitachuwinan latamanin tuku Jesús waninit. Xatapaxuwan kawani: «Katantit chu kaʼakxilhtit chatum chixku tiku kiwanilh putum tuku ktlawanit. ¿Ni max wa uma litaxtu Cristo?» (Juan 4:29). Uma lu xlakaskinka takgalhskinin nema latamanin katsiputunkgo xatakgalhtin lata kxkilhtamaku Moisés (Deuteronomio 18:18). Wa xlakata latamanin xalak Sicar ankgo niku wi Jesús xlakata naʼakxilhkgo.

Kstalaninanin Jesús wanikgo pi kawalh tuku liminkgonit. Pero xla kakgalhti: «Akit kkgalhi tuku nakwa nema wixin ni lakgapasatit». Xlakan kaks lilakawankgo chu lawani: «Niti alimini liwat, ¿ni xlikana?». Pero Jesús xatapaxuwan kawani tuku wamputun, chu tuku wa lu xlakaskinka xpalakata putum kstalaninanin: «Kiliwat wa nakmakgantaxti xtalakaskin tiku kimalakgachanit chu nakmasputu xtaskujut» (Juan 4:32-34).

Taskujut nema lichuwinama Jesús ni wa namakikan tachanan, nema tsankga akgtati papaʼ xlakata natsuku. Wata kilhchanima xtaskujut Dios. Katsiyaw uma xlakata tuku wan alistalh: «¡Kaʼakxilhtit! Kkawaniyan: Katalakayawatit chu kaʼakxilhtit snapapa kapukuxtun, tlantiya namakikan  tachanan. La uku tiku maki tachanan makglhtinamaja xtaskgaw chu makima tawakat xla latamat nema ni kgalhi xlisputni, xlakata tiku chanananit chu xmakina tachanan lakxtum napaxuwakgo» (Juan 4:35, 36).

Max Jesús katsiya tuku kitaxtulh xlakata tachuwinalh samaritana. Lhuwa latamanin xalak Sicar tsukukgo kanajlanikgo xlakata uma puskat kawani: «Kiwanilh putum tuku ktlawanit» (Juan 4:39). Wa xlakata akxni chankgo kpozo wanikgo Jesús pi katamakgxtakgli xlakata tlakg lhuwa tuku nakalitachuwinan. Xla kawani pi tlan chu tamakgxtakga anta akgtiy kilhtamaku.

Akxni kgaxmatnikgo Jesús, tlakg lhuwa samaritanos kanajlanikgo chu wanikgo puskat: «Nialh kkanajlayaw kaj xlakata tuku wanti; xlakata akinin kkgaxmatnitaw chu kkatsiyaw pi uma chixku xlikana xlakgmaxtuna kakilhtamaku» (Juan 4:42). Xliʼakxilhtit samaritana kinkamasiyaniyan la nalichuwinanaw Jesucristo. Chuna la xla tlawalh, tlan natlawayaw pi latamanin tlakg nakatsiputunkgo.

Kalakapastakti pi akgtati papaʼ tsankga xlakata namakikan tachanan, max wa cebada, kʼuma kachikin makikan tachanan max marzo chu abril. Wa xlakata uma tuku lichuwinaw max chuna lalh papaʼ noviembre o diciembre. Uma wamputun pi lata kkata 30 akxni tlawaka Pascua, titaxtunita akgtsayan papaʼ la Jesús chu kstalaninanin lichuwinamakgo Dios chu kamunumakgo latamanin kJudea. Pero la uku amakgo kxchikkan, kʼGalilea. ¿Tuku nala akxni nachankgo?