Jisas na ol disaipel bilong em i lusim Judia na i go long Galili, ol i wokabaut i go long hap not bilong distrik Samaria. Ol i wokabaut inap longpela hap na ol i taiet. Nau em olsem 12 klok, olsem na ol i stop long taun Sikar na malolo long wanpela hulwara em ating Jekop i bin digim o em i baim sampela man long digim inap planti handret yia i go pinis. I kam inap long taim bilong yumi, yumi inap lukim kain hulwara olsem klostu long taun em nau ol i kolim Nablus.

Taim Jisas i malolo arere long hulwara, ol disaipel i go long taun i stap klostu bilong baim sampela kaikai. Ol i go pinis, na wanpela meri Samaria i kam long kisim wara. Jisas i tokim em: “Givim sampela wara long mi long dring.”—Jon 4:7.

Ol Juda i no save poroman wantaim ol Samaria, long wanem, ol i luk daun long ol man bilong narapela lain. Olsem na meri i kirap nogut na i tok: “Yu wanpela Juda na olsem wanem yu askim mi, wanpela meri Samaria, long givim wara long yu?” Jisas i tokim em: “Sapos yu bin save long presen God i givim na long dispela man husat i askim yu, ‘Givim wara long mi,’ orait bai yu askim em, na em bai givim yu wara i gat laip.” Meri i tokim em: “Bikman, yu no gat baket bilong kisim wara na hulwara i daun tru. Olsem na bai yu kisim dispela wara i gat laip long we? Tumbuna bilong mipela Jekop i bin givim dispela hulwara long mipela. Na em yet wantaim ol pikinini bilong en na ol bulmakau sipsip samting bilong en, ol i bin dring long dispela wara. Ating yu winim tumbuna bilong mipela, a?”—Jon 4:9-12.

Jisas i tok: “Olgeta man i dring long dispela wara, nek bilong ol bai drai gen. Man i dring long wara mi givim em, nek bilong en bai i no inap drai gen. Wara mi givim long em bai kamap olsem hulwara insait long em na givim laip oltaim long em.” (Jon 4:13, 14) Maski Jisas i taiet, em i redi long autim tok i tru bilong laip long dispela meri Samaria.

Meri i tok: “Bikman, givim dispela wara long mi, bai nek bilong mi i no ken drai na mi no ken kam oltaim long dispela hap long kisim wara.” Orait nau Jisas i senisim tok olsem: “Yu go, singautim man bilong yu na kam long hia.” Meri i tok: “Mi no gat man.” Tasol em i kirap nogut long samting Jisas i save long en taim Jisas i tokim em: “Yu tok stret olsem, ‘Mi no gat man.’ Yu bin i gat 5-pela man, na dispela man nau yu gat, em i no man tru bilong yu.”—Jon 4:15-18.

Meri i klia long tok bilong Jisas, olsem na em i tok: “Bikman, nau mi save yu wanpela profet.” Orait nau em i kamapim klia olsem em i gat laik long kisim save long tok bilong God. Em i tok: “Ol tumbuna bilong mipela [ol Samaria] i bin mekim lotu long dispela maunten [maunten Gerasim, em ples i stap klostu], tasol yupela [ol Juda] i save tok Jerusalem em ples we ol man i mas mekim lotu.”—Jon 4:19, 20.

Tasol Jisas i tokim em olsem ples bilong mekim lotu i no bikpela samting. Em i tok: “Taim bai kamap na yupela bai i no lotuim Papa long dispela maunten o long Jerusalem.” Bihain em i tokim meri: “Taim i laik kamap, na nau i kamap pinis, na ol man i lotu tru long Papa, ol bai lotuim em long spirit na long pasin i tru. Tru tumas, Papa  i painim ol kain man olsem long lotuim em.”—Jon 4:21, 23, 24.

Papa i no save tingim ples em ol man i lotu long en, nogat, em i tingim pasin ol i bihainim bilong lotuim em. Dispela meri i kirap nogut long tok bilong Jisas na i tok: “Mi save olsem Mesaia bai kam, em ol i kolim Krais. Taim em i kam, em bai tokaut long mipela long olgeta samting.”—Jon 4:25.

Bihain Jisas i kamapim klia wanpela bikpela tok i tru, em i tok: “Mi dispela man, nau mi toktok wantaim yu.” (Jon 4:26) Tingim! Dispela meri i kam long 12 klok long san bilong kisim wara. Tasol Jisas i mekim gutpela pasin tru long em. Jisas i tokim em long samting em i no bin tokim ol narapela long en, olsem em i dispela Mesaia.

Ol disaipel bilong Jisas i kam bek long taun Sikar wantaim kaikai. Na ol i bungim Jisas long hulwara bilong Jekop, em ples we ol i bin lusim em long en, tasol nau em i toktok i stap wantaim wanpela meri Samaria. Taim ol disaipel i kam kamap, meri i lusim sospen wara bilong em na em i go long taun.

Taim meri i go kamap long Sikar, em i tokim ol manmeri long ol samting Jisas i bin tokim em long en. Em i tokim ol: “Yupela kam lukim dispela man husat i tokim mi long ol samting mi bin mekim.” Na bilong kirapim tingting bilong ol, em i askim ol: “Ating dispela man em i Krais?” (Jon 4:29) Em wanpela bikpela tok em planti man i laik save long en kirap long taim bilong Moses. (Lo 18:18) Dispela tok i kirapim ol man bilong taun long go na ol yet i ken lukim Jisas.

Ol disaipel i tokim Jisas long kisim kaikai em ol i bin baim. Tasol em i tokim ol: “Mi gat kaikai em yupela i no save long en.” Ol disaipel i tingting planti long dispela tok, na ol i toktok namel long ol yet olsem: “Ating wanpela i bringim kaikai i kam long em, a?” Long gutpela pasin, Jisas i kamapim tok bilong helpim olgeta disaipel bilong em long luksave long wanem samting i bikpela  samting, em i tok: “Kaikai bilong mi em long mekim laik bilong man i bin salim mi i kam na long inapim wok em i givim long mi.”—Jon 4:32-34.

Dispela wok Jisas i toktok long en, em i no wok bilong bungim wit na bali samting bikos 4-pela mun bihain ol kaikai bai redi. Tasol Jisas i toktok long ol samting bilong lotu, em i tok: “Apim het na lukim ol gaden, kaikai i redi pinis. Nau yet man bilong bungim kaikai i wok long kisim pe na bungim ol kaikai bilong kisim laip oltaim. Olsem na man i planim kaikai na man i bungim kaikai, tupela i ken amamas wantaim.”—Jon 4:35, 36.

Ating Jisas i luksave olsem tok bilong em i helpim meri Samaria long mekim sampela samting. Planti man long taun Sikar i bilip long Jisas taim ol i harim ol stori dispela meri i mekim. Em i tokim ol olsem: “[Jisas] i tokim mi long olgeta samting mi bin mekim.” (Jon 4:39) Olsem na taim ol i lusim Sikar na i kam bungim Jisas long hulwara, ol i tokim em long stap na stori moa wantaim ol. Jisas i amamas long tok bilong ol na em i stap inap 2-pela de long Samaria.

Taim ol Samaria i harim tok bilong Jisas, planti moa i bilip long em. Ol i tokim meri: “I no long tok bilong yu na mipela i bilip, nogat, mipela yet i harim na mipela i save gut olsem tru tru dispela man em i seivia bilong ol manmeri bilong graun.” (Jon 4:42) Tru tumas, meri Samaria i stap gutpela eksampel long olsem wanem yumi inap autim tok long ol man long Krais, olsem mekim ol tok bilong kirapim ol long kisim sampela save moa.

Fopela mun moa na ol man bai kisim kaikai long gaden. Long dispela ples ol i save bungim bali long mun Mas o Epril. Olsem na nau em ating mun Novemba o Disemba. Dispela i makim olsem bihain long Pasova bilong 30 C.E., Jisas na ol disaipel bilong em i bin stap inap 8-pela mun samting long Judia. Ol i wok long skulim ol man na baptaisim ol. Nau ol i laik lusim dispela ples na go bek long hap not, em asples bilong ol long Galili. Wanem samting bai painim ol long Galili?