Han hi Jesus ngan an iya mga disipulo nagbiyahe tipanorte tikang ha Judea ngadto ha Galilea, inagi hira ha distrito han Samaria. Kapoy na hira ha pagbiyahe. Pagkaudto, pinahuway hira hirani ha syudad han Sicar ha atabay nga posible ginhimo o ginpahimo ni Jacob mga siglo na an naglabay. Ha aton panahon, ito nga atabay makikita ha moderno nga syudad han Nablus.

Samtang napahuway hi Jesus ha may atabay, an iya mga disipulo kinadto ha kahirani nga syudad basi pumalit hin pagkaon. Han waray pa hira makabalik, usa nga Samaritana an inabot basi mag-alog. Hi Jesus nagsiring ha iya: “Alayon, tagi ako hin maiinom.”—Juan 4:7.

Ha kabug-osan, an mga Judio ngan Samaritano diri nakikig-istorya ha kada tagsa tungod han maiha na nga diskriminasyon. Salit nahipausa an babaye ngan nagpakiana: “Kay ano nga bisan kon Judio ka naaro ka hin maiinom ha akon nga Samaritana?” Hi Jesus binaton: “Kon maaram ka la han waray bayad nga regalo han Dios ngan kon hin-o an nasiring ha imo, ‘Alayon, tagi ako hin maiinom,’ maaro ka gud ha iya, ngan tatagan ka niya hin tubig nga buhi.” Nagsiring an Samaritana: “Mano, waray ka ngani timba ha pagsarok, ngan hilarom an atabay. Salit diin ka man makuha hin tubig nga buhi? Mas maopay ka ba kay ha amon kaapoy-apoyan nga hi Jacob, nga naghatag ha amon hini nga atabay, ngan hiya mismo ininom dinhi pati an iya mga anak ngan kabakahan?”—Juan 4:9-12.

Hi Jesus binaton: “An tagsa nga nainom hini nga tubig uuhawon utro. Kondi an bisan hin-o nga nainom han tubig nga akon ihahatag diri na gud uuhawon, kay an tubig nga ihahatag ko ha iya magigin pariho hin burabod dida ha iya nga nagbubugwak basi maghatag hin kinabuhi nga waray kataposan.” (Juan 4:13, 14) Oo, bisan kon kapoy na hi Jesus, andam hiya nga isumat ha Samaritana an kamatuoran nga naghahatag hin kinabuhi.

Katapos, an babaye siniring: “Mano, tagi ako hito nga tubig, basi diri na ako uhawon ngan diri na magbinalik-balik nganhi ha pag-alog.” Hini nga takna, baga hin karuyag ni Jesus nga bag-uhon an topiko, hiya nagsiring: “Tawaga an imo bana ngan balik nganhi.” An babaye binaton: “Waray ako bana.” Pero sigurado nga nahipausa hiya han nagsiring hi Jesus: “Husto an imo ginsiring nga waray ka bana, kay lima an imo nagin bana, ngan an lalaki nga iginkakaupod mo yana diri mo bana.”—Juan 4:15-18.

Klaro ha Samaritana an punto ni Jesus. Nahipausa hiya ngan nagsiring: “Mano, ha akon pag-abat usa ka nga propeta.” Iginpakita niya nga interesado hiya ha espirituwal nga mga butang. Paonan-o? Hiya nagpadayon: “An amon kaapoy-apoyan [an mga Samaritano] nagsingba dinhi hini nga bukid [Bukid Gerisim, nga hirani ha ira] pero nasiring kamo [an mga Judio] nga ha Jerusalem la kinahanglan magsingba an mga tawo.”—Juan 4:19, 20.

Pero iginsaysay ni Jesus nga an lugar han pagsingba diri amo an importante. Hiya nagsiring: “Maabot an panahon nga magsisingba kamo ha Amay, diri dinhi hini nga bukid o ha Jerusalem.” Katapos, iya ginsumatan an babaye: “Yana na an panahon nga an totoo nga mga magsiringba magsisingba ha Amay uyon ha espiritu ngan ha kamatuoran, kay ginbibiling gud han Amay an mga sugad ha ira nga magsisingba ha iya.”—Juan 4:21, 23, 24.

 An ginkikita han Amay ha iya tinuod nga magsiringba diri kon diin hira nagsisingba kondi kon paonan-o hira nagsisingba. Bumilib hito an babaye. Hiya nagsiring: “Maaram ako nga makanhi an Mesias, nga tinatawag nga Kristo. Pag-abot niya, dayag nga igsusumat niya ha amon an ngatanan.”—Juan 4:25.

Katapos hi Jesus nagpahayag hin importante nga kamatuoran: “Ako nga nakikiistorya ha imo amo hiya.” (Juan 4:26) Ini nga babaye inabot ha udto basi mag-alog, ngan direkta nga iginsumat ha iya ni Jesus nga hiya an Mesias. Espesyal gud ini kay iginsumat ha iya ni Jesus an butang nga waray pa niya isumat ha iba.

An mga disipulo ni Jesus binalik tikang ha Sicar nga may dara nga pagkaon. Nakita nira hi Jesus ha atabay ni Jacob diin nira hiya ginbayaan, ngan may kaistorya na nga Samaritana. Pag-abot han mga disipulo, ginbayaan han Samaritana an iya tibod ngan kumadto ha syudad.

Pag-abot ha Sicar, iya igin-istorya ha mga tawo an mga iginsumat ha iya ni Jesus. Kombinsido nga nagsiring hiya ha ira: “Kadi kamo, kitaa niyo an tawo nga nagsumat ha akon han ngatanan nga akon ginbuhat.” Katapos, basi mapukaw an ira interes, hiya nagpakiana: “Posible ba nga hiya an Kristo?” (Juan 4:29) Pakiana ini mahitungod han importante nga topiko nga gin-iistoryahan tikang pa ha panahon ni Moises. (Deuteronomio 18:18) Nagpagios ito ha mga tawo nga gumawas ha syudad basi makita nira mismo hi Jesus.

Hito nga takna, gin-inaghat hi Jesus han iya mga disipulo nga kumaon han ira dara nga pagkaon. Pero hiya binaton: “May pagkaon ako nga diri niyo hinbabaroan.” Nahipausa hito an mga disipulo ngan nag-iristorya: “Waray iba nga nagdara ha iya hin pagkaon, diri ba?” Ha buotan nga paagi, iginsaysay ni Jesus an iya karuyag sidngon pinaagi han mga pulong nga aplikado ha ngatanan niya nga sumurunod: “An akon pagkaon amo an pagbuhat han kaburut-on han nagsugo ha akon ngan paghuman han iya buruhaton.”—Juan 4:32-34.

 An buruhaton nga ginsisiring ni Jesus diri an pag-ani han lugas nga mahitatabo paglabay pa hin upat ka bulan. Lugod an iya gin-uunabi amo an espirituwal nga pag-ani, sugad han iginpapakita ha iya ginsiring: “Kitaa niyo an kaumhan, hinog na an aranihon. Nakarawat na han mag-arani an suhol ngan nagtitirok hiya han bunga para ha kinabuhi nga waray kataposan, salit magkakalipay an magsarabwag ngan an mag-arani.”—Juan 4:35, 36.

Bangin nasantop na ni Jesus an resulta han iya pakiistorya ha Samaritana. Damu nga taga-Sicar an tinoo ha iya kay an babaye nagsiring ha ira: “Iya iginsumat ha akon an ngatanan nga akon ginbuhat.” (Juan 4:39) Salit han kinadto hira ha atabay, ira ginhangyo hi Jesus nga magpabilin ngan mag-istorya ha ira hin dugang pa. Inuyon hito hi Jesus ngan nagpabilin hiya ha Samaria hin duha ka adlaw.

Samtang an mga Samaritano namamati kan Jesus, damu pa an tinoo ha iya. Nagsiring hira ha babaye: “Natoo kami diri tungod han imo ginsiring, kay kami mismo nakabati ngan nahibaro nga ini nga tawo amo gud an paratalwas han kalibotan.” (Juan 4:42) Oo, an Samaritana naghatag hin maopay nga susbaranan kon paonan-o kita magpapamatuod mahitungod han Kristo pinaagi ha pagpukaw han interes han aton mamarati basi magin andam hira ha pagkarawat hin dugang nga impormasyon.

Hinumdumi nga upat pa ka bulan antes an pag-ani han sebada, nga nahitatabo ha katsaringsing dinhi hini nga rehiyon. Salit posible nga Nobyembre o Disyembre na hadto. Nagpapasabot ito nga katapos han Paskua han 30 C.E., hi Jesus ngan an iya mga disipulo nagpabilin ha Judea hin walo ka bulan o sobra pa, nga nanunutdo ngan nanbabawtismo. Yana tipakadto na hira ha norte ha ira lugar ha Galilea. Ano an mahitatabo ha ira didto?