Biree si Jesús ne ca discípulo stiʼ Judea zecaʼ Galilea, peru para chindácabe raqué, naquiiñeʼ tídicabe Samaria. Maʼ galaa dxi ngue, ne maʼ bidxágacabe pur viaje que. Nga runi, ora yendácabe gaxha de Sicar, gulezadxícabe ti ratu para guiziiláʼdxicabe ruaa ti bizé, zándaca ni biʼniʼ Jacob maʼ raca stale iza o zándaca gudíxebe tu bíʼnini. Tiempu riʼ, nuuruʼ bizé ca, ne nuuni gaxha de guidxi Nablus.

Caziilaʼdxiʼ Jesús ruaa bizé que laga zeʼ ca discípulo stiʼ ndaaniʼ guidxi que zisicaʼ guendaró. Óraque bedandá ti gunaa de Samaria zicaa nisa, ne gudxi Jesús laabe: «Dané caadxi nisa gueeʼ» (Juan 4:7).

Tiempu que, nabé runi ca judíu menu ca samaritanu ne qué rinacaʼ guidxaagacaʼ laacabe. Nga runi, bidxagayaa gunaa que caniʼné Jesús laa ne gunabadiidxabe Jesús: «¿Ximodo nga canábaluʼ naa nisa, pa judíu lii ne naa nacaʼ samaritana yaʼ?». Óraque bicabi Jesús: «Pa ñannuʼ xii nga cusigaʼdeʼ Dios lii, ne ñannuʼ tuu nga cayabi lii: “Dané caadxi nisa gueeʼ”, ninábaluʼ laa nisa, ne laa nudii lii nisa nabani». Para ná gunaa que rabi laabe: «Peru, Señor, qué gápaluʼ ni cueeneluʼ nisa, ne gueteʼ bizé riʼ. ¿Paraa nga chindeeluʼ nisa nabani ca yaʼ? ¿Jma xa risácaluʼ que bixhozebiidadu Jacob? Laa bidii bizé riʼ laadu. Laa güeʼ nisa stini ne ca xiiñiʼ ne ca yuze stiʼ» (Juan 4:9-12).

Gudxi Jesús gunaa que: «Guiráʼ tu gueʼ nisa riʼ, zati nisa sti biaje. Peru binni gueʼ nisa ni gudieeʼ laa la? maʼ qué ziuuruʼ dxi gati nisa. Zaca nisa ni gudieeʼ laa ti manantial dentru de laa ra guidá nisa ni gudii guendanabani ni qué zaluxe» (Juan 4:13, 14). Galán ejemplu bisaana Jesús, purtiʼ neca maʼ bidxaga, bisiidiʼ gunaa samaritana que ni dxandíʼ, ni zacané laa guicaa guendanabani ni qué zaluxe.

Ora binadiaga gunaa que ni gudxi Jesús laa, guníʼ: «Señor, dané naa nisa ca, ti cadi gáteruaʼ nisa ne maʼ cadi guibiguetaʼ raríʼ para cueeʼ nisa». Ruluíʼ si bichaa Jesús de tema ne gudxi laabe: «Guyé, yecaa xheeluʼ ne gudáʼ raríʼ». Para bicabi gunaa que: «Qué gapaʼ diaʼ xheelaʼ». Óraque gudxi Jesús laabe: «Biaʼsi bicábiluʼ ora guniʼluʼ qué gápaluʼ xheelaluʼ, purtiʼ maʼ gúpaluʼ gaayuʼ xheelaluʼ, ne hombre nabezaneluʼ yanna riʼ cadi xheeluʼ laa» (Juan 4:15-18). ¡Nanna pabiáʼ bidxagayaa gunaa riʼ ora biʼyaʼ nanna Jesús stale cosa de laa!

Pur ca diidxaʼ gudxi Jesús gunaa riʼ, bidii cuenta de ti cosa ne dede cadxagayaaʼ gudxi Jesús: «Señor, zuluáʼ profeta lii». Despué, bisihuinni gunaa riʼ riuulaʼdxiʼ ganna de Dios pur ca diidxaʼ ni guníʼ: «Lu dani riʼ [ni láʼ Guerizim, ne nuuni gaxha de raqué] nga biʼniʼ adorar ca bixhozebiidadu [ca samaritanu] Dios, peru laatu [ca judíu] natu naquiiñeʼ gaca adorarbe Jerusalén» (Juan 4:19, 20).

Óraque, bisiene Jesús laabe cadi lugar ra runi adorar binni Dios nga ni jma risaca: «Zedandá hora nin lu dani riʼ ne nin Jerusalén qué zuni adorartu Dios». Ne laaca guníʼ: «Peru zedandá hora —ne yanna nga laani—, ca ni dxandíʼ runi adorar  Dios zuni adorarcaʼ laabe né espíritu ne ni dxandíʼ. Purtiʼ cuyubi Dios clase binni ca para guni adorar laa» (Juan 4:21, 23, 24).

Ni jma risaca para Bixhózenu nga modo runi adorarnu laa ne cadi lugar ra runi adorarnu laa. Cadxagayaa gunaa que, ne gudxi Jesús: «Nannaʼ zeeda Mesías, ni rábicabe Cristu. Ne ora gueedabe la? zusiene chaahuibe laadu guiráʼ ni» (Juan 4:25).

Óraque, gudxi Jesús laabe ti cosa nabé risaca: «Naa nga laabe, ni caniʼné lii» (Juan 4:26). Guendaridxagayaa ¿njaʼ? Guyé gunaa riʼ galaa dxi zicaa nisa ne gudxi Jesús laa xiixa ni zándaca qué huayabi guirutiʼ: laa nga Mesías. ¡Guizáʼ naroʼbaʼ ndaayaʼ gucuaa gunaa riʼ!

Biaʼsi peʼ óraque, bedandá ca discípulo stiʼ Jesús de yesicaʼ guendaró guidxi Sicar. Biiyacabe zuba Jesús ruaa bizé stiʼ Jacob, ne yanna biiyacabe caníʼnebe ti gunaa samaritana. Óraque, bisaana gunaa que jarru ra daʼ nisa stiʼ raqué ne zeʼ ndaaniʼ guidxi que.

Ora yendá gunaa riʼ Sicar, gudxi ca binni de guidxi que ni gudxi Jesús laa. Cayéchebe cayábibe ca binni que: «Latáʼ gúʼyatu ti hombre ni gudxi naa guiráʼ ni huayuneʼ». Ne zándaca para chiguuyaʼ ca binni que xi cazaaca, gúdxibe laacaʼ: «¿Ñee cadi laabe nga Cristu la?» (Juan 4:29). Ndiʼ nga ti cosa nabé risaca nuu ca binni que guizaaca dede tiempu stiʼ Moisés (Deuteronomio 18:18). Ngue runi, guyé ca binni de Sicar ra nuu Jesús para gúʼyacaʼ laabe.

Cayabi ca discípulo stiʼ Jesús laa gó ni maʼ bedanecaʼ. Peru gúdxibe laacaʼ: «Napaʼ guendaró para gahuaʼ ne qué gánnatu xi laani». Biyadxísaacaʼ ne gunabadiidxacaʼ: «Guirutiʼ caʼruʼ guedané ni gobe, ¿njaʼ?». Óraque bisiene Jesús laacaʼ né diidxaʼ nadóʼ xii ngue nuu guiníʼ. Gúdxibe laacaʼ ti cosa ni nabé risaca para ca xpínnibe: «Guendaró stinneʼ nga guneʼ ni ná ni biseendaʼ naa ne guiluxe xhiiñaʼ» (Juan 4:32-34).

 Peru cadi caníʼ diʼ Jesús de cosecha ni rindisaʼ binni lu layú, ni chiguiasa dentru de tapa beeu, sínuque caniʼbe de ti cosecha espiritual. Nánnanu zacá ni pur ca diidxaʼ ni guniʼbe: «Laguindisalú ne laguuyaʼ, maʼ blancu nuu lu ca layú ca, maʼ nuucani listu para guiasa cosecha. Maʼ cayaxa ni candisaʼ cosecha ne maʼ cutópabe ni. Cosecha ca nga ca binni ni zacaa guendanabani ni qué zaluxe, ti zacá guiecheʼ ni candisaʼ cosecha que ne ni bisaba biidxiʼ lu layú que» (Juan 4:35, 36).

Zándaca bidii Jesús cuenta xi guleendú pur guniʼné gunaa samaritana que. Stale de ca binni de Sicar bizulú biʼniʼ crecaʼ laabe pur ni gudxi gunaa que laacaʼ: «Gúdxibe naa guiráʼ ni bineʼ» (Juan 4:39). Nga runi, ora yendá ca binni que ra bizé que gúdxicaʼ Jesús guiaana ndaaniʼ guidxi que para gusiidiʼ laacabe jma. Ngue runi, biaana Jesús raqué chupa gubidxa.

Ra binadiaga ca samaritanu que Jesús, stale de laacaʼ biʼniʼ crecaʼ laabe ne gúdxicaʼ gunaa que: «Maʼ cadi pur si ni gúdxiluʼ laadu nga runi credu. Laapedu maʼ binadiágadu ne maʼ nánnadu dxandíʼ peʼ hombre riʼ nga ni chigulá guidxilayú» (Juan 4:42). Ejemplu stiʼ gunaa samaritana riʼ, rusiidiʼ ni laanu ximodo zanda gudiʼnu testimonio binni de Jesucristu. Cásica biʼniʼ gunaa riʼ, laaca zanda gucuáʼninu interés stiʼ ca binni ni racalaʼdxiʼ guiziidiʼ jma.

Xtapa beeu si cayaadxaʼ para guiasa cosecha ndaaniʼ guidxi que, zándaca cebada nga rindísacabe, lu beeu marzo ne abril. Nga runi, zándaca bizaaca guiráʼ ndiʼ lu beeu noviembre o diciembre. Nga runi, zanda guininu dede lu Pascua ni guca lu iza 30 que, maʼ ziné Jesús né ca discípulo stiʼ xhono beeu de cayuni predicarcaʼ ne caguunísacaʼ binni ndaaniʼ guidxi Judea. Yanna maʼ chécabe Galilea, xquídxicabe. ¿Xi guiráʼ guizaacacabe raqué yaʼ?