Kɛ Zezi dili cɛn ba nɲɔn Samari mɛn’n nun lɔ’n, ɔ ɔli Galile mɛn’n nun lɔ. Lɔ yɛ ɔ ɲinnin-ɔn. Sanngɛ nán wunmiɛn lolɛ ti yɛ w’a sɛ i sin Galile lɔ-ɔ. I nun ng’ɔ o Zide mɛn’n nun lɔ’n, ɔ wlɛli i wun ase kpa boli jasin fɛ’n kleli sran mun. Ɔ maan ɔ ɔli Galile mɛn’n nun lɔ naan ɔ́ kó dí Ɲanmiɛn i junman’n i kpa liɛ su. Sanngɛ ɔ semɛn i wun kɛ lɔfuɛ’m bé wá sɔ́ i nun klanman. Afin i bɔbɔ seli kɛ: “Ɲanmiɛn nuan ijɔfuɛ leman ɲrun i bɔbɔ i klɔ’n su.” (Zan 4:44) Kɛ ɔ nin i sɔnnzɔnfuɛ’m be juli lɔ’n, i sɔnnzɔnfuɛ’m b’a kɛmɛn i wun lɛ. Be ɔli be osufuɛ’m be sin, yɛ be ko dili junman nga be di i laa’n.

?Kɛ Zezi bó jasin’n, ndɛ benin yɛ ɔ kannin-ɔn? Ɔ seli kɛ: “Blɛ’n w’a ju. Ɲanmiɛn i Famiɛn dilɛ’n w’a mantan koko. Amun kaci amun akunndan’n naan amun lafi Ɲanmiɛn i jasin fɛ’n su.” (Marki 1:15) ?Wafa sɛ yɛ Galilefuɛ’m be sɔli Zezi nun-ɔn? Be nun kpanngban be sɔli i nun klanman yɛ be yili i ayɛ. Nán ndɛ ng’ɔ kan’n i ngunmin ti yɛ be sɔli i nun klanman-ɔn. Sanngɛ Galilefuɛ nga be ko dili Delɛ cɛn ng’ɔ sinnin lɛ’n Zerizalɛmun lɔ’n, be wunnin abonuan sa nga Zezi yoli be lɔ’n. I kwlaa sɔ’n ti yɛ be sɔli i nun klanman Galile mɛn’n nun lɔ’n niɔn.​​—Zan 2:23.

?Galile mɛn’n i klɔ benin su yɛ Zezi boli i junman’n i dilɛ bo-ɔ? Atrɛkpa’n, Kana klɔ’n su lɔ-ɔ. Lɔ yɛ ɔ yoli maan nzue’n kacili duvɛn aja kun bo’n niɔn. Ɔ maan i kpɛ nɲɔn su m’ɔ́ kɔ́ lɔ’n yɛ ɔ o lɛ-ɔ. Kɛ ɔ juli lɔ’n, ɔ tili i kɛ ba kun w’a tɔ tukpacɛ kekle kpa naan ɔ la wie bɛ su. Ba sɔ’n i si’n ti Famiɛn Erɔdu Antipasi i junman difuɛ, yɛ ɔ tran Kapɛɛnaɔmun klɔ su. Famiɛn Erɔdu sɔ’n yɛ ɔ́ wá mán atin kɛ be kpɛ Zan Batɛmun yofuɛ’n i ti’n niɔn. Famiɛn Erɔdu i junman difuɛ sɔ’n tili i kɛ Zezi fin Zide mɛn’n nun lɔ w’a ba Kana klɔ’n su lɛ. I sɔ’n ti’n, ɔ fɛli i Kapɛɛnaɔmun klɔ’n su lɔ ɔ ko toli Zezi Kana klɔ’n su lɛ. Kɛ ɔ́ tó Zezi lɛ’n, i wla’n w’a bo i wun kpa. Ɔ maan ɔ srɛli i kpa kɛ: “E Min, bla ndɛndɛ. Sɛ ɔ timɛn i ti’n, min wa kan’n wú.”​​—Zan 4:49.

Ndɛ nga Zezi kannin’n boli bian’n i nuan. Ɔ seli i kɛ: “Kɔ, ɔ wa yasua’n w’a yo juejue.” (Zan 4:50) Bian’n lafili ndɛ nga Zezi kan kleli i’n su, naan w’a sɛ i sin w’a wɔ i awlo. Kɛ ɔ́ kɔ́’n, ɔ nin i junman difuɛ’m be yiali. Be bɛli i atin kpalɛ naan bé kán ndɛ fɛfɛ kpa kun klé i. Yɛle kɛ i wa’n w’a yo juejue. Kɛ mɔ bian’n kunndɛli kɛ ɔ́ wún sa kun i wlɛ ti’n, ɔ usali kɛ: ‘?Dɔ benin su yɛ ba’n i tukpacɛ’n yoli sɔsɔ-ɔ?’

Be tɛli i su kɛ: “Anunman dɔ nso su’n su yɛ i wunnɛn’n yacili lolɛ-ɔ.”​​—Zan 4:52.

I lɛ nun’n, bian’n wunnin i wlɛ kɛ dɔ kunngba sɔ’n su yɛ Zezi seli i kɛ: ‘Ɔ wa yasua’n w’a yo juejue’n niɔn.’ I sin’n, bian’n nin i awlobofuɛ’m be kwlakwla be kacili Klisi i sɔnnzɔnfuɛ.

Ɔ maan Zezi yoli abonuan sa nɲɔn Kana lɔ. I klikli’n, yɛle kɛ ɔ yoli maan nzue’n kacili duvɛn. I nɲɔn su’n yɛle kɛ ɔ yoli ba yasua kun m’ɔ nunmɛn i ɲin bo lɛ’n i juejue. Lika nga Zezi wo’n nin lika nga ba sɔ’n wo’n, be afiɛn ti nun kilo kɔe ablaɔn-nin-nsiɛn (26). Zezi yoli abonuan sa wie mun ekun. Sanngɛ abonuan sa nga liɛ’n, ɔ ti i liɛ ngunmin. Afin ɔ kle kɛ ɔ ti Ɲanmiɛn nuan ijɔfuɛ kun mɔ w’a sɛ i sin Galile mɛn’n nun lɔ-ɔ. ?Sanngɛ Ɲanmiɛn i nuan ijɔfuɛ sɔ’n ‘ɲán ɲrun i bɔbɔ i klɔ’n su?’

Fluwa’n i bue nga bé bá lɔ’n be nun’n, é wá tɛ́ kosan ngalɛ’n su. Afin Zezi su sɛ i sin Nazarɛti klɔ’n su lɔ. Lɔ yɛ ɔ ɲinnin-ɔn. ?Sa benin yɛ ɔ́ jú lɔ-ɔ?