To whenue Jesu ko zan nudi azán awe to Samalia godo, e dedo tòdaho he mẹ e nọ nọ̀. E ko dọyẹwheho taun to Jude, amọ́ e ma lẹkọ jei Galili nado yì gbọjẹ. Kakatimọ, e bẹ lizọnyizọn he gbloada humọ de jẹeji to otò he mẹ e whẹ́n te. Jesu ma na ko donukun dọ gbẹtọ lẹ na yí emi ganji to finẹ, na ewọ lọsu ko dọ dọ, “yẹwhegán de ma nọ tindo gbégbò to otò etọn titi mẹ.” (Johanu 4:44) Kakati nado gbọṣi e dè, devi etọn lẹ lẹkọyi whẹndo yetọn lẹ mẹ podọ yì azọ́n yetọn dai tọn lẹ kọ̀n.

Owẹ̀n tẹwẹ Jesu jẹ lilá ji? Owẹ̀n lọ wẹ: “Ahọluduta Jiwheyẹwhe tọn ko dọnsẹpọ. Mì lẹnvọjọ bo tindo yise to wẹndagbe lọ mẹ.” (Malku 1:15) Podọ nawẹ gbẹtọ lẹ yinuwa gbọn? Na nugbo tọn, Galilinu susu wẹ yí Jesu ganji bo gbògbéna ẹn. E ma yin na owẹ̀n etọn kẹdẹ wutu wẹ gba. Omẹ Galili tọn delẹ tin to hùnwhẹ Juwayi tọn tẹnmẹ to Jelusalẹm to osun delẹ die wayi bo mọ nujiawu he Jesu ko wà lẹ.—Johanu 2:23.

Fie wẹ Jesu bẹ lizọnyizọn he gbloada etọn jẹeji te to Galili? E taidi dọ Kana wẹ, yèdọ fie e ko diọ osin zun ovẹn te to hùnwhẹ alọwle tọn de whenu. To whenue Jesu wá finẹ whla awetọ, e sè dọ visunnu de to awutu sinsinyẹn jẹ bo tlẹ ko to kúdonu. Ahọluzọnwatọ de sin visunnu wẹ, yèdọ ahọluzọnwatọ Hẹlọdi Antipa tọn de, enẹ wẹ ahọlu he na wá gbòta na Johanu Baptizitọ lọ. Ahọluzọnwatọ ehe sè dọ Jesu ko tọ́n sọn Jude wá Kana. Enẹwutu, dawe lọ zingbejizọnlin sọn owhé etọn gbè to Kapẹlnaumi wá Kana nado dín Jesu mọ. Ahọluzọnwatọ he to awubla mẹ ehe vẹ̀ ẹ dọmọ: “Oklunọ, wá whẹpo ovi ṣie nido kú.”—Johanu 4:49.

Hogbe he Jesu yizan nado na gblọndo dona ko paṣa dawe lọ. E dọmọ: “Yì; visunnu towe ko jẹgangan.” (Johanu 4:50) Ahọluzọnwatọ Hẹlọdi tọn lọ yí Jesu sè bo lẹkọ dedo whé. To aliho ji, e pé afanumẹ etọn lẹ he ko whlẹndo nado wá dọ wẹndagbe lọ na ẹn. Etẹ nkọ, visunnu etọn ko jẹgangan bo to jogún-jogún! Dawe lọ tẹnpọn nado mọnukunnujẹemẹ ganji bo kanse dọ, ‘Whetẹnu wẹ e jẹgangan?’

Yé gblọn dọmọ: “Osọ he wayi to gànhiho ṣinawetọ lọ mẹ wẹ agbasa-hùnmiyọ́n lọ jo e do.”—Johanu 4:52.

E wá họnwun na ahọluzọnwatọ lọ dọ gànhiho he mẹ Jesu dọ dọ “Visunnu towe ko jẹgangan” lọ pẹẹ wẹ. Enẹgodo, dawe enẹ he tindo adọkun jẹ obá lọ mẹ nado tindo afanumẹ lẹ, gọna whédo etọn blebu lẹzun devi Klisti tọn lẹ.

Gbọnmọ dali, Jesu wà azọ́njiawu to Kana whla awe; e diọ osin zun ovẹn bosọ hẹnazọ̀ngbọna dẹpẹ de sọn olá, yèdọ sọn nudi kilomẹtlu 26. E họnwun dọ e ma yin azọ́njiawu ehelẹ kẹdẹ wẹ e wà. Amọ́, azọ̀nhẹngbọ ehe jẹna ayidego, na e dohia dọ ewọ ko lẹkọwa Galili. Ayihaawe ma tin dọ yẹwhegán he Jiwheyẹwhe ko kẹalọyi de wẹ ewọ, ṣogan obá tẹ mẹ wẹ ‘yẹwhegán ehe na yin gbégbòna to otò etọn titi mẹ’ jẹ?

Enẹ na sọawuhia hezeheze dile Jesu pànta whé to Nazalẹti. Etẹwẹ to tepọn ẹn to finẹ?