Pengudah dua hari ba Samaria, Jesus mupuk ngagai Galili, endur alai iya dibesaika. Iya udah bebendar nginjil ba Judea lalu iya deka terus ransing agi nginjil ba Galili. Suba, Jesus empu kala madah “nabi enda dibasa ba menua diri.” (John 4:44) Nyadi, iya engka enda nyangka orang ba Galili deka nyambut iya enggau manah. Maya nya, bala murid Jesus enda nitihka iya. Tang sida pulai baru ngagai rumah sida, lalu ngereja pengawa sida ke suba.

Nama pesan ti ditusui Jesus? Jesus madahka: “Perintah Petara nyau semak. Nesal ati meh ke dosa kita, lalu arapka Berita Manah.” (Mark 1:15) Nama asil iya? Mayuh orang Galili nyambut Jesus enggau manah, lalu meri iya basa. Tu ukai ketegal pesan ke dibai iya aja. Beberapa bulan sebedau nya maya Pengerami Paska, sekeda orang Galili bisi ba Jerusalem. Lalu ba dia, sida meda mayuh kereja ajih ke digaga Jesus.—John 2:23.

Dini alai Jesus berengkah nginjil ba Galili? Ba Kana, alai iya kala nukar ai nyadi wain ba siti pengerami tikah. Lebuh Jesus pulai baru ke Kana kali tu, iya ninga pasal siku anak pemesai ke balat sakit. Anak nya nyau deka mati. Iya anak siku pemesai ke gawa enggau Herod Antipas [Tu meh Raja Herod Antipas ke deka mumpung pala John Pemaptisa]. Pemesai tu ninga Jesus deka datai ngagai Kana. Nyadi pemesai tu mupuk ari Kapernaum ngagai Kana laban deka ngiga Jesus. Pemesai nya minta ngagai Jesus: “Tuan, aram mupuk enggau aku sebedau anak aku mati.”—John 4:49.

Jesus nyaut pemesai nya: “Mupuk meh nuan. Anak nuan udah gerai.” (John 4:50) Pemesai nya arapka jaku Jesus lalu iya pan pulai ngagai Kapernaum. Ba rantau jalai, iya betemu enggau bala ulun iya. Sida madahka anak iya udah gerai! Iya nanya sida: ‘Ni maya anak aku gerai?’

Ku sida nyaut iya: “Ba urung pukul satu ngalih hari kemari, iya nyau badu agi chelap angat.”—John 4:52.

Pemesai nya nyau sedar, nya maya ti sama lebuh Jesus madah “Anak nuan udah gerai.” Pengudah nya pemesai tu, bala ulun iya, sereta semua sida sebilik nyadi murid Jesus.

Nya alai, Jesus udah ngaga dua iti kereja ajih ba Kana. Iya udah nukar ai nyadi wain, sereta ngeraika siku nembiak lelaki ari jauh, kira-kira penyauh 25 kilometer. Jesus mega bisi ngereja pengawa ajih ke bukai. Tang kereja ajih Jesus ke udah ngeraika nembiak lelaki nya amat penting, laban tu nunjukka Jesus udah berengkah nginjil ba Galili. Jesus endang nabi ti diterima Petara, tang kati iya deka terus nyadi ‘nabi ti dibasa ba menua diri’?

Tanya tu deka disaut seraya Jesus neruska pengawa nginjil iya ngagai Nasaret, iya nya endur asal iya empu. Nama deka nyadi ngagai iya ba dia?