20-تاراۋ
قانا قالاسىنداعى ەكىنشى كەرەمەت
مارقا 1:14، 15 لۇقا 4:14، 15 جوحان 4:43—54
-
«قۇداي پاتشالىعى جاقىنداپ قالعانىن» ۋاعىزدادى
-
يسا جىگىتتى الىس جەردە تۇرىپ-اق ساۋىقتىردى
يسا ساماريادا ەكى كۇندەي بولىپ، وسكەن جەرىنە بەت الدى. ياھۋدەيادا اۋقىمدى ۋاعىز ٸسىن اتقارعان ول عاليلەياعا دەمالۋ ٷشىن ەمەس، قىزمەت اياسىن كەڭەيتۋ ٷشىن كەلە جاتىر. ٴبىراق «پايعامباردى ٶز ەل-جۇرتى قادىرلەمەيدى» دەگەن سوزىنە ساي، ٶزىن وندا قۇشاق جايا قارسى الادى دەپ كۇتپەدى (جوحان 4:44). ال شاكىرتتەرى يسانىڭ قاسىندا قالماي، ٶز وتباسىلارى مەن شارۋالارىنا ورالدى.
يسا قانداي حاباردى ۋاعىزدادى؟ «قۇداي پاتشالىعى جاقىنداپ قالدى. كۇنالارىڭا وكىنىپ، ىزگى حابارعا سەنىڭدەر»،— دەپ ٴجۇردى (مارقا 1:15). مۇنى عاليلەيالىقتار قالاي قابىلدادى؟ كوپ ادام يسانى تىڭداپ، ونى قۇرمەتتەدى. ولارعا يسانىڭ حابارى عانا ەمەس، يەرۋساليمدە جاساعان كەرەمەتتەرى دە اسەر ەتكەن. ويتكەنى بىرنەشە اي بۇرىن قۇتقارىلۋ مەيرامىن تويلاۋعا بارعانداردىڭ كەيبىرى كەرەمەتتەردى ٶز كوزدەرىمەن كورگەن بولاتىن (جوحان 2:23).
يسا عاليلەياداعى قىزمەتىن قاي جەردە باستادى؟ قانا قالاسىندا بولۋ كەرەك. الدىڭعى جولى ول وسى قالادا سۋدى شاراپقا اينالدىرعان بولاتىن. ال بۇل جولى يسا ٴبىر جاس جىگىتتىڭ قاتتى سىرقاتتانىپ، ٶلىم اۋزىندا جاتقانىن ٴبىلدى. جىگىت يرود انتيپاس پاتشانىڭ (جاقيانىڭ باسىن العان پاتشانىڭ) سارايىنداعى قىزمەتكەردىڭ بالاسى ەدى. قاپارناۋمدا تۇراتىن بۇل قىزمەتكەر يسانىڭ قاناعا كەلگەنىن ەستىگەن بويدا جولعا شىققان. يسانى تاۋىپ العاندا، قاتتى قايعىرعان اكە: «مىرزا، بالام ولمەي تۇرعاندا، مەنىمەن ٴجۇرىڭىزشى»،— دەپ ٶتىندى (جوحان 4:49).
يسا: «ۇيىڭىزگە قايتا بەرىڭىز، بالاڭىز امان-ەسەن»،— دەپ جاۋاپ بەرگەندە، الگى قىزمەتكەر قايران قالعان شىعار (جوحان 4:50). ول يسانىڭ سوزىنە سەنىپ، بىردەن ۇيىنە قايتتى. جولدا جاقسى حابار ايتۋعا اسىعىپ كەلە جاتقان قۇلدارىنا كەزىكتى. ونىڭ ۇلى قۇلانتازا ساۋىعىپ كەتكەن ەكەن! سوسىن بالاسىنىڭ قاي ۋاقىتتا ٴتاۋىر بولعانىن سۇراعاندا، ولار: «كەشە جەتىنشى ساعاتتا قىزۋى باسىلدى»،— دەپ جاۋاپ بەردى (جوحان 4:52).
سوندا قىزمەتكەر بۇل ۋاقىت يسانىڭ «بالاڭىز امان-ەسەن» دەگەن كەزى ەكەنىن ٴتۇسىندى. سودان باقۋاتتى تۇرعان بۇل كىسىنىڭ بۇكىل ٷي ٸشى ٴماسىحتىڭ شاكىرتى بولدى.
وسىلايشا يسا قانا قالاسىندا ەكى كەرەمەت جاسادى. ٴبىرىنشىسى، ۇيلەنۋ تويىندا سۋدى شاراپقا اينالدىردى. ال ەكىنشىسى، 26 شاقىرىمداي جەردەگى جاس جىگىتتى ساۋىقتىردى. ول باسقا دا كەرەمەتتەر جاسادى. دەگەنمەن بۇل كەرەمەتتەردى يسا عاليلەياعا ورالعاندا جاساعاندىقتان، ەرەكشە ايتىلىپ كەتكەن. يسا قۇداي قولداعان پايعامبار ەكەنى انىق، الايدا بۇل پايعامباردى ٶز ەل-جۇرتى قانشالىقتى قادىرلەيدى ەكەن؟
بۇل يسا نازارەتتەگى ۇيىنە بەت العاندا ايقىن بولدى. ونى نە كۇتىپ تۇردى؟
