Yesu pa kupwa kupityija mafuku abidi mu Samadia, wajokela mu yabo ntanda. Waingila kampanye kakatampe ka busapudi mu Yudea, ino pano kajokelangapo mu Ngadilea kukakōkolokwa. Ino, washilula mwingilo mukatampe kashā mu ntanda yaatamine’mo. Yesu kalañangapo ya kutambulwa’ko biyampe, mwanda aye mwine amba, “mupolofeto kadipo na bulēme mu yabo ntanda.” (Yoano 4:44) Bana ba bwanga pa kyaba kya kushikata nandi abakajokela ku mobo abo, ku bisaka ne ku twaji twabo.

Le i musapu’ka washilula kusapula Yesu? I wa amba: “Bulopwe bwa Leza bubafwena. Mwisāsei, itabijai myanda miyampe.” (Mako 1:15) Le bantu abalonga’po namani? Bine, bene Ngadilea bavule abatambula Yesu biyampe, ne kumulēmeka. Ke pa mwandapo wa musapu wandi bitupu. Bantu bamo ba mu Ngadilea baendele ku Pashika ya mu Yelusalema myeji mivule kunyuma kadi bamwene’ko biyukeno bya kutendelwa byalongele Yesu.​—Yoano 2:23.

Le i mutamba’ka wa Ngadilea washilula’ko Yesu mwingilo wandi mukatampe? Bimweka padi i mu Kana, mwine mwaalamwine mema ke vinyu ku masobo a butundaile. Padi’ko uno musunsa wa bubidi, Yesu wayuka amba kudi mwana umo ubela bya lufu. I mwana wa mwingidi wa bulēme mu umbikalo wa Heloda Antipese, mulopwe mwine wateteje Yoano Mubatyiji mutwe mwenda mafuku. Uno mwingidi wa bulēme waivwana’mba Yesu watambe ku Yudea waiya mu Kana. O mwanda uno mwana-mulume watambe kwandi ku Kapanama waiya kukimba Yesu mu Kana. Mwingidi wa bulēme udi na bulanda wazenze Yesu amba: “A Mfumwami, tūka nami kepafwile wami mwana mutyetye’pa.”​—Yoano 4:49.

Yesu walondolola na kunena bintu bitulumuna uno muntu amba: “Enda; obe mwana i mūmi.” (Yoano 4:50) Mwingidi wa bulēme wa Heloda wakulupila Yesu kajokela kwandi. Aye mu dishinda wetana na bapika bandi badi bāya lubilo kumusapwila mwanda muyampe. Bine, wandi mwana i mūmi kadi wakoma! Pa kusaka kuyuka senene, waipangula’mba: ‘Wakomene kitatyi’ka?’

Abamulondolola amba: “Ngitu yadi mimukabe yamutūkile kesha pa nsá ya busamba-bubidi.”​—Yoano 4:52.

Mwingidi wa bulēme wayuka’mba i’nka kitatyi kyamunenene Yesu amba, “Obe mwana i mūmi.” Kupwa papo, uno muntu wa lupeto lwa kwikala na bapika ne njibo yandi yonso abaikala ke bana ba bwanga ba Kidishitu.

Mu uno muswelo, Yesu walonga bingelengele bibidi mu kino kifuko, kwalamuna mema ke vinyu ne kubelula nsongwalume na kulampe ku kintu kya makilometele 26. Inoko bino bingelengele ke byonsopo. Ino kuno kundapa kudi na mvubu mwanda kulombola kujoka kwandi mu Ngadilea. Bibamweka patōka’mba i mupolofeto mwitabijibwe na Leza, ino le uno mupolofeto ukalēmekwa na bantu ba mu yandi ntanda’?

Tusa kwikimona pano ke penda Yesu ku Nazala. I bika bimutengēle’ko?