Bang’ tieko odiechienge ariyo kama Samaria, Yesu koro dhi e alwora ma dalagi ma en Galili. Osebedo koyalo Judea kuom ndalo mogwaro. Kata kamano, ok oduogo Galili mondo oyue. Kar mano, ochako tije ne Nyasaye e okang’ malach ahinya e alwora ma ne oponieni. Ong’eyo ni jomoko ok dhi rwake kuno, nikech owuon nosewacho ni, “ji ok mi janabi duong’ e gweng’gi owuon.” (Johana 4:44) Kar mondo jopuonjrene osik kode, gin gidok e miechgi kendo e tijegi machon.

En ote mane ma Yesu chako yalo? Oteno en ma: “Pinyruodh Nyasaye osekayo machiegni. Lokuru chunyu a e richo kendo ubed gi yie kuom wach maber.” (Mariko 1:15) To ere kaka ji rwako wachno? En adier ni ng’eny Jo-Galili rwake kendo gimiye duong’. Jo-Galiligo ok rwake mana nikech ote moyalo. Moko kuomgi ne ni Jerusalem e sawo mar Pasaka dweche moko motelo, kendo ne gineno ranyisi madongo ma Yesu notimo.​—Johana 2:23.

Ka Yesu ni Galili, en alwora mane ma Yesu chakoe tich ma odwaro timo e okang’ malachni? Nenore ni ochako gi taon mar Kana, kama ne oselokoe pi mobedo divai e nyasi moro mar arus. Ka Yesu ni kuno e kinde mar ariyoni, ikelone wach ni wuowi moro matin tuo kendo chiegni tho. En wuod jatij Ruoth Herode Antipa, ma bang’e ne ong’ado wi Johana Jabatiso. Jatijno winjo ni Yesu osea Judea kendo koro en Kana. Omiyo, jatijno wuok dalane Kapernaum mondo odhi omany Yesu Kana. Jatij ruothno nigi lit ahinya. Osayo Yesu kama: “Ruoth, lor mwalo ibi ka pok nyathina matin otho.”​—Johana 4:49.

Nyaka bed ni dwoko ma Yesu miyo jalno bwoge ahinya. Yesu wachone kama: “Wuog idhi; wuodi koro ngima.” (Johana 4:50) Jatij Herodeno yie gi gima Yesu owachoneno, omiyo ochako wuoth mar dok dala. Ka en e yo, jalno romo gi wasumbnine ka reto mondo gikelne wach maber. Ee, ginyise ni wuode osechango kendo owinjo maber! Mondo obed gadier, jalno penjogi niya: ‘En sadi ma nochako winjoe maber?’

Wasumbnigo dwoke kama: “Midhusi nyoro oa kuome sa abiriyo odiechieng’.”​—Johana 4:52.

Jalno fwenyo ni mano e sa sie ma Yesu nyoro owachonee niya: “Wuodi koro ngima.” Nenore ni jalni en jamwandu nikech en gi wasumbni. Bang’ kosechang wuodeno, jalno kanyachiel gi joode duto bedo jopuonjre Kristo.

Omiyo, Kana en taon ma Yesu otimoe honni ariyo. Mokwongo, noloko pi mobedo divai, to mar ariyo ochango wuowi matin man mabor kode, chiegni kilomita ma dirom 26 kama. En adier ni mago ok e honni kende motimo. Kata kamano, hono motimono konyo ahinya nikech mano nyiso ni koro oseduogo Galili. Kuom adier, Yesu en janabi ma Nyasaye oyiego. Kata kamano, iparo ni ‘ji dhi miyo janabi duong’ e gweng’gi’ e okang’ maromo nade?

Mano biro nenore maler nimar koro ochomo Nazareth dalagi. Ang’o ma dhi timorene ka ochopo kuno?