Ka morago ga matšatši a e ka bago a mabedi Jesu a le Samaria, o ya tikologong ya gabo. O bile le lesolo le letelele la go bolela ka Mmušo kua Judea, eupša ga a boele Galilea go yo khutša. Go e na le moo, o thoma bodiredi bjo bogolo kudu nageng yeo a goletšego go yona. A ka be a sa letela gore a amogelwe gabotse moo, ka gobane bjalo ka ge Jesu a boletše, “moporofeta ga a newe kgodišo ga gabo.” (Johane 4:44) Go e na le gore barutiwa ba gagwe ba dule le yena, ba boela gae malapeng a gabo bona le medirong ya bona ya peleng.

Jesu o thoma go bolela ka molaetša ofe? Ke wo o rego: “Mmušo wa Modimo o batametše. Itsholeng gomme le be le tumelo ditabeng tše dibotse.” (Mareka 1:15) Batho ba arabela bjang? Ge e le gabotse, Bagalilea ba bantši ba amogela Jesu gabotse gomme ba mo nea kgodišo. Ga ba dire seo feela ka baka la molaetša wa gagwe. Ba bangwe bao ba tšwago Galilea ba be ba le Pasekeng kua Jerusalema dikgwedi tše fetilego gomme ba bone dipontšho tše makatšago tšeo Jesu a di dirilego.—Johane 2:23.

Jesu o thoma kae bodiredi bja gagwe bjo bogolo bja Galilea? Go bonala a thoma Kana, moo a kilego a fetoša meetse gore e be beine monyanyeng wa lenyalo. Ge a le moo monyanyeng wa bobedi, Jesu o kwa ka mošemanyana yo a babjago o šoro, yo a lego kgauswi le go hwa. Ke morwa wa mohlankedi wa mmušo wa Heroda Antipase, kgoši yeo ka morago e ilego ya laela gore Johane Mokolobetši a kgaolwe hlogo. Mohlankedi yo o kwa gore Jesu o tlogile Judea o tlile Kana. Ka gona monna yo o tšea leeto go tloga legaeng la gagwe kua Kaperenaume o ya Kana go yo hwetša Jesu. Mohlankedi yo a nyamilego kudu o kgopela Jesu o re: “Morena, theoga pele ngwanaka yo monyenyane a ehwa.”—Johane 4:49.

Jesu o arabela ka mantšu ao a makatšago monna yo, ge a re: “Sepela; Morwa wa gago o a phela.” (Johane 4:50) Mohlankedi wa Heroda o dumela Jesu gomme a thoma leeto la gagwe la go boela gae. Ge a le tseleng o gahlanetšwa ke bahlanka ba gagwe, bao ba hlaganetšego go mmotša ditaba tše dibotse. Ee, morwa wa gagwe o a phela e bile o phetše gabotse! O leka go hlakanya ditaba gomme o a botšiša o re: ‘O kaonefetše neng?’

Ba a mo araba ba re: “Letadi le mo tlogile maabane ka iri ya bošupa.”—Johane 4:52.

Mohlankedi o lemoga gore ke ka nako yona yeo ge Jesu a be a re: “Morwa wa gago o a phela.” Ka morago ga moo monna yo, yoo a humilego gore a ka ba le bahlanka, gotee le lapa la gagwe ka moka e ba barutiwa ba Kriste.

Ka gona Kana ke lefelo leo go lona Jesu a dirago mehlolo gabedi, a fetoša meetse gore e be beine gomme ka morago a fodiša mošemanyana yo monyenyane a le bokgoleng bja dikhilomithara tše 26. Go ba gona, mehlolo ye ga se yona feela yeo a e dirilego. Eupša phodišo ye ke e bohlokwa ka gobane e bontšha gore o boile Galilea. Go molaleng gore ke moporofeta yo a amogetšwego ke Modimo, eupša ‘moporofeta yo o tla newa kgodišo ga gabo’ go fihla bokgoleng bofe?

Seo se tla bonala ge Jesu a leba gae kua Natsaretha. O letetšwe ke’ng moo?