Kayari na manga duaran agew ed Samaria, linmay Jesus ed baley to. Walay malaknab ya panagpulong to ed Judea, balet ag-onsempet ed Galilea pian manpainawa. Imbes, pian igapo toy mas malaknab ya ministeryo ed binalegan ton lugar. Agto iilaloan ya sikatoy awaten dan tampol, ta singa imbaga to, “say sakey a propeta et agnapagalangan diad mismon baley to.” (Juan 4:44) Imbes ya ibaan da, anempet ed pamilya da iray disipulo to tan intuloy day datin anapan da.

Antoy impulong nen Jesus? “Asingger lay Panarian na Dios. Magbabawi kayo, tan manisia kayo ed maong a balita.” (Marcos 1:15) Antoy resulta? Dakel ya taga Galilea so angawat ed si Jesus, pinagalangan da. Aliwan lapu labat ed mensahe to. Wala ray taga Galilea ya linmad Paskua ed Jerusalem diad imbeneg iran bulan tan anengneng da ray makapakelkelaw ya ginawa to.​—Juan 2:23.

Iner inggapo nen Jesus so malaknab ya ministeryo to ed Galilea? Maseguron diad Cana​—lugar ya mamilagron pinagmaliw ton alak so danum diad sakey a bansal. Diad mikaduan inyakar tod man, abalitaan nen Jesus so nipaakar ed sakey a kalangweran ya grabe so sakit to tan ngalngali la ompatey. Anak iman na opisyal nen Herodes Antipas, ari ya nampaputot ed ulo nen Juan Bautista diad saginonor. Abalitaan na sayan opisyal ya nanlapud Judea si Jesus tan paonlad Cana. Kanian sikatoy nambiahe manlapud abung tod Capernaum paonlad Cana pian anapey Jesus. Akikasid sikato so maer-ermen ya opisyal: “Katawan, mila kad siak antis ya ompatey so melag ya ana’ko.”​—Juan 4:49.

Seguradon mankelaw so opisyal ed ebat nen Jesus: “Pawil ka la; manbilay so anak mo.” (Juan 4:50) Anisia imay opisyal nen Herodes tan anempet la. Nen wala nid dalan, nabet to ray aripen to ya manaapuran mangipaamtay maong a balita ed sikato. On, say anak to et mabilay tan inmabig la! “Anton oras so inyabig to?” so intepet to pian napankonektaan to ray agawa.

“Naandi lay petang to karuman, diad komapiton oras,” so inkuan da.​—Juan 4:52.

Anonotan na opisyal ya saman may eksakton oras nen imbaga nen Jesus ya “Manbilay so anak mo.” Kayari na satan, samay anak tan say opisyal, a mayaman lapud walaan na saray aripen, tan say interon sankaabungan to et nagmaliw ya disipulo nen Kristo.

Kanian diad Cana et amiduan nanggaway milagro si Jesus, impagmaliw ton alak so danum insan amaabig na kalangweran anggano 26 kilometroy kaarawi tod sikato. Siempre aliwan saraya labat so milagron ginawa to. Balet agnalingwanan iyan impamaabig to lapud pakatandaan itan na impawil tod Galilea. Malinew ya sikatoy propeta ya inabobonan na Dios. Balet panon kalaknab so ‘pamagalang ed sayan propeta diad mismon baley to’?

Naamtaan itan no onsempet si Jesus ed Nazaret. Anto kasi nagawad sikato diman?