Kunyima kwa mafuku abidi mu Samariya, Yesu balukile mwiumbo dyabo. Bakatuka mu kukita kampanye kakata ka mudimo wa bulungudi mu Yuudeya, kadi tamwalukiile ku Ngalileya bwa nkayikisha nya. Anka, kubabanga mudimo ukata wa bulungudi mu nsenga ibadi mkudile. Auku shi t’abakamutambula kalolo nya, mwanda aye nabeene badi mwibyakule shi: “Mutemuki [t’anemekiibwa] mwiumbo diabo nya.” (Yowano 4:44) Pamutwe pa kushaala naye, balongi ba Yesu abalukile ku mashibo aabo mu kukita midimo yabo ya pa kyubishi.

Yesu babangile kulambukisha mukandu wa mushindo kinyi? Ubadi shi: “Bufumu Bw’Efile Mukulu tabudi peepi. Alulayi mashimba nukumiine mukandu wi buwa.” (Maako 1:15) Abakitshine naminyi? Binobino, beena Ngalileya be bungi abatambwile Yesu kalolo, bamupa kinemo. Ta nka penda pa mwanda wa ano mayi nya. Munda mwa myeshi kumpala, bebungi ba kwabadi abadi ku Kidiibwa kya lukilo mu Yesuleme, na abadi bamone bilengyeleshi bibadi Yesu mukite.—Yowano 2:23.

Mu mu musoko kinyi wa mu Ngalileya ubadi Yesu mubangye mufubo waye ukata? Abimweka shi mu Kana, mubadi mwate meema ealuula nfinyo ku musangelo w’ebambo. Bwa musango wa kabidi, pabadi Yesu ki kwakwa, batambwile mukyendji shi kwi kasongwalume kakambilwe peepi na lufu. Badi mwana a mukata a basalayi a kwa Eroode Antipase, yawa nfumu badi mutume eyi bwa shi batshibe Yowano Mubatshishi mutwe. Uno mukata a basalayi bapushishe shi Yesu bakatuka ku Yuudeya bende ku Kana. Aye nkukatuka kwabo ku Kapernaume bwa kwenda ku Kana mu kulonda Yesu. Badi mwiyayile Yesu na kinyongwa kyoso shi: “Mwanana alaala kumpala kwa shi mwana ande afwe.”—Yowano 4:49.

Yesu balulwile yawa muntu bibadi bimukanyishe shi: “Nda, mwana oobe atala.” (Yowano 4:50) Mukata a basalayi a kwa Eroode badi mukumine mwi Yesu abanga kwalukila kwaye. Pabadi alukiila, bafumankeene na bampika baye, abende lubilo mu nkamulungula mukandu wibuwa. Oolo, mwan’aye tabafwile nya, badi bibuwa! Nshe mwana bebayipwishe shi: “Nsaa kinyi yayikalanga mupushe bi buwa?”

Abo nkumwaluula shi: “Maloba, pa nsaa ya musambobidi, mbidi kaalo yimukatukile.”—Yowano 4:52, Kilombeeno kipya 2014.

Mukata a basalayi nkushinkamisha shi bibadi nka yaaya nsaa ibadi Yesu mumulungule shi: “Mwana oobe atala.” Kunyima kwa byabya, yawa muntu badi mpeta, na bampika, mpa na ba mu nshibo yaye yooso abafikile balongi ba Kidishitu.

Yesu badi mukite bilengyeleshi misusa ibidi mu Kana, badi mwaluule meema bu nfinyo, akupu aye nkupaasha kansongwalume ke mu bilometre bifikye ku 26. Bino bilengyeleshi ta mbyoso nya. Kadi kuno kupaasha kwi na muulo bwa shi bantu baukye shi Yesu balukila ku Ngalileya. Eyendo shi badi mutemuki mukuminyibwe n’Efile Mukulu, kadi abadya kumwata na ‘kineemo kwabo’ su?

Byabya abikamweka patooka bu abyalukila Yesu kwabo ku Nazarete. Nkinyi akimutengyela kwakwa?