Ibabé pééna, liyôgbe likeñi li nlama ba i Nasaret. I ngéda a bé ke kôs sôble yak Yôhanes, hala a yé nwii wada len, Yésu a bé kapinda mu tison Nasaret. Ndi nano, a nyiba kiki mut a mboñ bihélha bi mam. Bôt ba tison ba nyamnda ni ngôñ i tehe nye a mboñ bihélha bi mam.

Ngôñ yap i nañ ngéda Yésu, kiki lem a nke ndap bibégés i tison. ‘Kiki hiki Sabat,’ mu mandap ma bibégés, ba nsoohe, ba añ ki bikaat Môsi a tila. (Minson mi baôma 15:21) Ba mbéna ki soñgol bipes bi bikaat bi bapôdôl. Ibabé pééna, i ngéda Yésu a ntelep inyu añ, a nyimbe masu ma ngandak bôt inyule a bi tégbaha ngandak nwii, a lok mu ndap bibégés i. Ba nti nye nhôôk kaat u mpôdôl Yésaya. A nléba het i yé ntilga inyu Nu Yéhôva a bé lama hoo, pes kaat di nléba ikété Yésaya 61:1, 2.

Yésu a ñañ le Nhook u, u bé lama añle bet ba yé minkôm le ba ga bana kunde, le bôt ba ndim ba ga tehna, ni le nwii Yéhôva a ga unda bôt loñge yé ñem u nlo. Yésu a nti ngwélél a yé ha nhôôk kaat, a yén isi. Bôt bobasôna ba ñôm nye mis. I mbus, a nyoñ ki hop, a pémés bini bibañga bi mahee: “I len ini, i tilna ini ni ntip nok i mal yon.”​—Lukas 4:21.

Bôt ba nhel ‘inyu bibañga bilam bi mpémél i nyo wé,’ ba kalak ki le: “Baa man Yôsep wada bé nunu?” Ndi mu kii Yésu a nôgda le ba ngwés le a boñ bihélha bi mam kiki bi ba bi nok, a nkal bo le: “Ibabé pééna, n’a gwélél bini bibañga inyu yem: ‘A dokta tibil wemede. I mam momasôna di bi nok le u bi boñ i Kapernaum, boñ yak mo hana i loñ yoñ.’” (Lukas 4:22, 23) Inyu bôt ba Nasaret, Yésu a bé lama ndugi mélés makon ma bôt ba tison yé, bon ba bé lama ba bôt ba bisu i kôhna nseñ i bihélha gwé bi mam. Bebek ba nhoñol le Yésu a nyan bo.

Mu kii a nyi mahoñol map, Yésu a ntoñle bo ngim mam i i mbéñge ñañ wap. Biyik bi bôda bi bé ngandak i loñ Israel i dilo di Éliya, ndi, Éliya a bi ôma bé yak yik muda i Israel to yada. A bi ke i Sarépta, tison bebee ni Sidôn, yak yik muda i i bé bé muda Lôk Israel. Nyoo nyen Éliya a bi boñ hélha jam i i bi péyés niñ. (1 Bikiñe 17:8-16) Bôt ba lô ba bé ki ngandak i Israel i dilo di Élisa, ndi Élisa a bi pubus ndik Naaman, mut Siria.​—2 Bikiñe 5:1, 8-14.

Lelaa bôt ba tison het Yésu a bi néñél ba mboñ ngéda ba nok le ñañ Yésu u nyelel ngitophémle yap lôñni libak le ba ntôñ ndik ni bomede? Ba bobasôna ba yé i ndap bibégés ba ñunup, ba telep, ba pémés nye tison. Ba nkena Yésu i ngii hikôa het Nasaret a ôñne inyu leñ nye isi. Ndi Yésu a nso bo, a nke ibabé mbabaa yo ki yo. Nano Yésu a nke i Kapernaum, i ñombok u ngwañ tuye Galiléa.