Tarpaima-ima do halak Nasaret naeng mangida Jesus mambahen tanda halongangan manang mukjizat. Nunga sataon Jesus tardidi. Andorang so tardidi ditanda halak do ibana tukang hau. Alai saonari, godang do halak na mamboto molo ibana boi mambahen tanda halongangan.

Diboto nasida do na jotjot Jesus laho tu sinagoga. Disi do halak martangiang jala manjaha angka buku ni si Musa. “Ai ganup ari Sabbat do i dijahahon di angka sinagoga.” (Ulaon ni Apostel 15:21) Dijahahon do disi angka buku na sinurat ni angka panurirang. Godang do halak na ro tu sinagoga, ra ditanda Jesus do nasida. Tingki jongjong Jesus naeng manjaha, dilehon ma tu ibana gulungan ni si Jesaya. Dijahahon ibana ma surirang taringot tu Halak na dipillit marhite tondi parbadia ni Jahowa. Saonari disurat do i di Jesaya 61:1, 2. 

Dijaha Jesus ma taringot tu Halak na dipillit i na laho mamaritahon haluaon tu angka na tartaban, na pamalumhon halak na mapitung, jala na paboahon taon parasi ni rohaon ni Jahowa. Dung i, dilehon ibana ma gulungan i tu parhobas na disi, jala hundul ma ibana. Sude ma halak mangida ibana, dung i didok ibana ma, “Sadari on ma saut ayat na binegemuna on.”​—Lukas 4:21.

Marlas ni roha ma angka halak, jala “longang ma nasida mambege angka hata na uli na kaluar sian pamanganna”. Masipandohan ma nasida, ninna ma, “Nda anak ni si Josep ibana tahe?” Alai diboto Jesus do naeng idaon nasida ibana mambahen tanda halongangan. Gabe didok Jesus ma, “Huboto do na naeng dohononmuna songon on tu ahu, ‘E pangubati, pamalum ma jo dirim. Bahen ma di hutam on songon naung hubege hami angka na binahenmu di Kapernaum.’” (Lukas 4:22, 23) Didok roha ni angka jolma i, ingkon di hutana sandiri do parjolo bahenon ni Jesus tanda halongangan. Alai ala ndang dibahen Jesus tanda halongangan gabe jut ma roha ni nasida.

Diboto Jesus do na songon i pingkiran ni nasida. Alani i dipaboa ibana ma na masa di Israel najolo. Di tingki ni si Elia, godang do ina na mabalu di Israel alai, tu ina na mabalu na di Sarpat do si Elia disuru Jahowa. Jala disi do si Elia mambahen tanda halongangan na parohon haluaon. (1 Rajaraja 17:8-16) Songon i nang di tingki ni si Elisa, godang do halak na marsahit kusta di Israel. Alai, holan si Naaman halak Ram i do dipamalum.​—2 Rajaraja 5:1, 8-14.

Sian angka tudosan i tarida ma, na mangkaringkothon diri do angka na di sinagoga i jala ndang marhaporseaon. Alani i, gabe muruk ma nasida. Disarat nasida ma Jesus tu luar ni kota i, diboan ma ibana tu punsu ni dolok ni huta Nasaret, jala naeng dabuhonon ni nasida ma Jesus sian i. Alai, boi do malua Jesus sian nasida. Laho ma ibana tu Kapernaum di sabola utara ni topi Laut Galilea.