Kɛ Zezi juli Nazarɛti klɔ’n su lɛ’n, lika’n kejeli yekee. I nun nga Zezi te o Nazarɛti lɛ’n, nn ɔ ti waka sɛfuɛ. Kɛ ɔ ko wunnin Zan i wun kɛ ɔ yo i batɛmun’n, i afuɛ kun tra su yɛ. Sanngɛ siɛn’n, sran’m be kwlaa be kɛn i ndɛ kɛ ɔ yo abonuan sa mun. I sɔ’n ti’n, klɔfuɛ’m be wun blibli be kpa. Afin be kunndɛ kɛ ɔ yo abonuan sa sɔ mun wie kle be.

Sran’m be srɛ Ɲanmiɛn ‘Ɲanmiɛn sulɛ sua’m be nun Wunmiɛn-lolɛ-cɛn kwlaa nun’n.’ Kpɛkun be kanngan Moizi i fluwa’m be nun ndɛ wie mun. (Sa Nga Be Yoli’n 15:21) Ndɛ nga Ɲanmiɛn nuan ijɔfuɛ’m be klɛli’n, be kanngan nun wie. Zezi wluli be Ɲanmiɛn sulɛ sua’n nun. Ɔ yo i sɔ titi. Kɛ sran’m be wunnin i’n, be wun bliblili be kpa ekun. Zezi jrannin nglo naan w’a kanngan fluwa’n nun. Kɛ ɔ jrannin nglo’n, atrɛkpa ɔ wunnin sran kpanngban mɔ nin be kɔ Ɲanmiɛn sulɛ sua’n nun titi’n, be wlɛ. Be fali Ɲanmiɛn nuan ijɔfuɛ Ezai i fluwa’n be mɛnnin i. Ɔ tikeli su naan w’a kunndɛ lika nga be kan Sran nga Zoova fɛli i wawɛ’n mɛnnin i’n, i ndɛ’n. Biblu nga e le be andɛ’n be nun’n, lika sɔ’n wo Ezai 61:1, 2 nun.

Fluwa’n i bue nga Zezi kanngannin nun’n, ɔ se kɛ Sran sɔ’n ɔ́ wá sé be nga be trali be lomuɛn’n be kɛ bé wá ɲán be ti, yɛ aɲinsifuɛ’n bé wá wún ase. Asa ekun’n, sran sɔ’n wá sé sran’m be kɛ blɛ nga Zoova i klun wá jɔ́ sran’m be wun’n, w’a mantan koko.Kɛ Zezi wieli fluwa’n nun kanngan’n, ɔ fa mannin sran ng’ɔ nian su’n, kpɛkun ɔ ko trannin ase. Be kwlaa nga be o lɛ’n, be niɛnnin i siin. Kpɛkun ɔ boli ijɔlɛ bo ekun. Ɔ kannin ndɛ cinnjin kun seli kɛ: “Ɲanmiɛn ndɛ nga amun tili i icra’n, w’a kpɛn su andɛ.”​​—Liki 4:21.

“Ndɛ fɛ ng’ɔ fin i nuan fiteli’n boli sran’m be nuan.” Yɛ be seli be wiengu kɛ: “Zozɛfu i wa’n niɔn. ?Nɛ́n i-ɔ?” Sanngɛ Zezi sieli i nzɔliɛ kɛ sran sɔ’m be kunndɛ kɛ ɔ yo abonuan sa ng’ɔ yoli be klɔ wie’m be su’n i wunsu kle be. Afin be tili i kɛ ɔ yoli abonuan sa wie mun. I sɔ’n ti’n, Zezi seli be kɛ: “Ndɛ nga be kan se kɛ, ‘Dɔɔtrɔ bian, yo ɔ bɔbɔ ɔ wun ayre’n,’ n si kɛ amún kɛ́n i sɔ bé klé min. Yɛle kɛ like nga a yoli i Kapɛɛnaɔmun lɔ mɔ e tili’n, yo i wunsu ɔ bɔbɔ ɔ klɔ wa. ’” (Liki 4:22, 23) Nazarɛtifuɛ’m be buli i kɛ Zezi bɔbɔ i klɔ’n su lɛ yɛ ɔ fata kɛ ɔ dun mmua yo sran’m be juejue-ɔ. Be buli i kɛ i klɔfuɛ mun yɛ ɔ fata kɛ ɔ dun mmua yo be ye-ɔ. Sanngɛ kɛ mɔ Zezi w’a yoman sɔ’n ti’n, be seli be wun kɛ w’a buman be sran.

Zezi si akunndan nga be bu’n. I sɔ’n ti’n, ɔ boli sa wie mɔ be juli Izraɛli lɔ laa’n, be su kleli be. Ɔ seli be kɛ Eli blɛ su’n, angbeti bla kpanngban be o Izraɛli nvle’n nun. Sanngɛ b’a sunmanman Eli be nun wie fi i sin, saan angbeti bla m’ɔ timan Izraɛlifuɛ’n i ngunmin cɛ i sin yɛ be sunmɛnnin i-ɔ. Bla sɔ’n o Sarɛpta klɔ m’ɔ mantan Sidɔn mɛn’n i su. Eli ɔli lɔ ko yoli abonuan sa kun. Ɔ maan bla’n nin i awlobofuɛ’m b’a wuman. (1 Famiɛn Mun 17:8-16) Asa kusu’n, Elize blɛ su’n, kokowefuɛ kpanngban be o Izraɛli nvle’n nun. Sanngɛ w’a yoman be nun wie fi juejue, saan Naaman m’ɔ ti Sirifuɛ’n, i kunngba cɛ yɛ ɔ yoli i juejue-ɔ.​​—2 Famiɛn Mun 5:1, 8-14.

Laa ndɛ sɔ mɔ Zezi boli be su lɛ’n, be kleli i klɔfuɛ’m be weiin kɛ be bu be bɔbɔ ngunmin be wun akunndan, yɛ be lafimɛn i su. Sanngɛ be waan ndɛ ng’ɔ kannin’n timan su. ?I sɔ’n ti’n, ngue yɛ be yoli-ɔ? Sran nga be o Ɲanmiɛn sulɛ sua’n nun cɛn sɔ’n nun’n, be fali ya dan kpa. Be jasoli, kpɛkun be trɛli i naan b’a fɛ i klɔ’n nun b’a fite. Be fɛ i ɔli oka nga i su yɛ be kplannin Nazarɛti klɔ’n, i ti su nglo lɔ. Be waan bé sú i bo bé yí i asiɛ wun wa. Sanngɛ Zezi floli be sa nun ɔli. B’a kwlá yomɛn i like fi. Siɛn’n, Zezi su kɔ Kapɛɛnaɔmun. Klɔ sɔ’n wo Galile Jenvie’n i nglo lɔ lika’n nun lɔ, wia atɔliɛ lɔ bue liɛ’n su.