Teke bisô bôte ya Nazareth ba vuñ abui. Ôsusua na a ke, asu na a ke dubane be Jean, den a nga ke ngumba mbu, Yésus a mbe kafinda valé. Ve éyoñe ji be nga yeme nye ane môt a bo beta be mam. Bemie jale be ne ôjeja’a ya yen ane a bo mam mevo’o y’été ézezañe jap.

Ba tu’a beta bo ôjeja’a éyoñe ba yene Yésus a kele’e nda Zambe aval a wô’ô ja zu a bo. Ba bo meye’elane wôé, a ba lañe bekalate be Moïse, ane da boban “menda me Zambe môse mi sondô mise.” (Mam Minlôman 15:21) Be wô’ô fe lañe bifase ya bekalate bekulu mejô. Éyoñe Yésus a tebe na a lañ, a yiane yem abui bôt a nga zu a yen éyoñ a mbe a za’ak nda Zambe nyi. Ba kalane nye mvulekane kalate nkulu mejô Ésaïe. A yoé vôme ba kobô ajô Nyô Yéhôva a wo’oya a nsisime wé, éfus éte é ne den kalate Ésaïe 61:1, 2.

Yésus a lañ aval avé Nyô be nga ka’ale a ye kate minkôme foé ya éto fili jap, mindindime na mia ye beta yen, a kate bôte foé mbu Yéhôva a ye nyii bôt. Ane Yésus a ve môte mvulekane kalate, a tabe ke si. Nde bôte bese ba lôbô nye. Ane a jô be éko éziñ a abui bifia, a bifia bite bi n’édok na: “Den, e ntilan mi ndôme mane wô’ô nlañan e melo menan ô tôébaneya.”​—Luc 4:21, Mfefé Nkôñelan.

Bôte ba semé mbamba ‘mejô ma kui anyu dé,’ a môt ase a jô nyi mbo’o na: “Ye nyôna a nji bo e mone Yôsep nga?” Ve mbôl a nga yeme na ba kômbô yen ane a bo beta be mame be nga wô’ô na a bo, nde Yésus a ke ôsu a jô na: “[Teke bisô] mia ye kane ma e nkana wu na: a dokita, saé ñhe womien, mam mese bi nga wô’ô na ô nga bo Capernaoum, bo’o ñhe fe me avale da vana e si jôé.” (Luc 4:22, 23, Mfefé Nkôñelan) Bôte be mbe be too fefele nda bôte Yésus ba yiane simesane na, nsaéne bôt wo yiane taté bobane nlame wé, asu bôte bé bebien. Ajô ete be ne simesane na Yésus a biasé be.

Éyoñ a yemeya ôsimesane wop, Yésus a kañete mam méziñe me nga boban Israël. A kate be na, minkus abui mi mbe Israël melu me Élie a nga to, ve Zambe a nji lôm Élie be nkuse wua ya minkuse mite. A nga viane ke be nkuse minga ô nji be minga ya Israël e Sarepta, tison e ne fefele Sidon, vôm a nga bo asimba e nga nyii minga ate a nda bôte jé. (1 Bejô Bôt 17:8-16) A melu me Élisée, abui minzezam e mbe Israël, ve nkulu mejô a nga saé ve Naaman étam, môte ya Syrie.​—2 Bejô Bôt 5:1, 8-14.

Jé bôte ya nlame Yésus ba bo éyoñe be wô’ôya bive’ane Yésus a nyoñ, bive’ane bia liti na be ne te mbunan, a na ba jeñe ve mfi wop bebien? Ba be ne nda Zambe ba kañ, ba kôlô si a titane Yésus na a kôlô tison. Ane ba ke nye abôbône nkôle vôme tisone ya Nazareth é ne nlôñan, a ba jeñe na be sô’ôlô nye na a ke ku nkôle si. Ve Yésus a tulane be zañ, ve ke mvo’é. Éyoñe ji Yésus a ke Capernaoum, ékôte mañ ya nord-ouest ya Galilée.