Kola enienij e Nazareta, ke ca macatre hë qa ngöne lo ijine Iesu a wai Ioane troa bapataiso. Nge qëmekene tro nyidrë a tro, atre tratrau sinöe nyidrë. Ngo enehila, ka hlemu nyidrë pine la itre huliwa nyine haine i nyidrë. Matre, itre atre Nazareta a lapa treqene tro nyidrëti a kuca la itre huliwa cili nyipi angatr.

Kola ha elë catre la trenge aja ne la itre atre Nazareta, la angatr a öhnyi Iesu e tro lapa kowe la sunago, tune lo hnei nyidrëti hna majemin. E hnine la sunago, itre atr a thith me e la itre tusi Mose, nge hna kuca lai “hnine la itre sunago e nöjei sabath.” (Itre Huliwa 15:21) Hna hane fe e la itre xa mekene tus ne la itre hna perofetan. Matre ame la Iesu a cile troa e, canga wangatrehmekune ju hi nyidrë la itre atr, ke ekö hë nyidrëti hmi e cili. Ame hna line pi koi nyidrëti la tusi Isaia. Nyidrëti a thele jë lo götrane ka qaja lo Atre hna iëne hnene la uati hmitrötre i Iehova. Enehila, hna qatrenge la mekune cili ngöne Isaia 61:1, 2.

Iesu a e jë la hna perofetane cili laka, tro la hna Iën a cainöjëne la iamele koi itre hna oth, me cainöjëne laka, tro la itre timek a goe, nge troa traqa la macatre ne manathith i Iehova. Thupene lai, Iesu a line hmaca pi la tusi hna ewath kowe la hlu, me lapa. Nge itre atren a goeë tili nyidrë, matre nyidrëti a nango ithanata aqeanyi hmaca ju, nge nyidrëti a qaja ju la ketre ini ka tru, me hape: “Eatre hë enehila la hna cinyihane celë hnei nyipunie hna dreng.”—Luka 4:21.

Hnene la itre atr hna haine “la aqane ithanata i nyidrë ka menyik,” nge angatr a ihnyingënekeune ka hape: “Tha kolo kö lo nekö i Iosefa la?” Ngo trotrohnine hi Iesu ka hape, aja i angatr troa sipu goeëne la itre iamamanyikeu, tune lo hnei angatr hna drei mejen. Matre öni Iesu: “Eje hi laka, tro hi nyipunieti lai a qeje ni me hape: ‘Droketre, ketre sipu aloinyi nyipëti jë. Ase hë huni dreng la itre ewekë hnei nyipëti hna kuca e Kaperenauma, nga hane jë kuca tune ngöne la nöje i nyipë.’ ” (Luka 4:22, 23) Ma angetre Nazareta jë a mekune ka hape, tro Iesu a pane aloinyi mec e kuhu hnalapa, me huliwa koi nöj. Nge ma angatre fe a mekune laka, ase petre hi wangaconyi angatr.

Ngo atre hi Iesu la itre mekuna i angatr, matre nyidrëti a amexeje jë la itre ewekë ka traqa ekö. Nyimutre la itre sine föe e Isaraela ngöne lo hneijine i Elia, ngo öni Iesu, tha hna upi Elia kö koi angatr. Hna upi angeice pe kowe la ketre sine föe ka tha sine la nöje Isaraela. Sine föe ne Sarepeta, traon ezine Sidona, hnë kuci iamamanyikeu i Elia. (1 Ite Joxu 17:8-16) Nge ngöne la hneijine i Elisaia, ala nyimu la itre lepera e Isaraela, ngo Namana casi hi la hna aloin hnene la perofeta, ngacama atre Suria angeic.—2 Ite Joxu 5:1, 8-14.

Iesu hi lai a xome la itre tulu cili nyine amamane la pengöi ange Nazareta hnine la sunago, itre ka tha imeku, me ka pë lapaun. Matre nemene la hnei angatr hna kuca? Elëhni jë hi angatr, matre angatr a mejë jë, me uku Iesu tröne la traon. Angatr a huli Iesu jë kowe la wetr hnë xupi Nazareta, me elë sai nyidrë kowe la gaa draië, matre uku nyidrë qa lai. Eloine hi, hnei Iesu hna kötre mel. Haawe, nyidrëti hë la a tro Kaperenauma, traon e kolopi nge kuë ne la Hnagejë Ne Galilaia.