Akea te nanououa bwa e bae ni bati te ingainga i Natareta. Bon te kabentaa Iesu imwain nakona ni bwabetitoaki iroun Ioane, teuana tabun te ririki n nako. Ma ngkai e a tanoata taekana bwa te tia karaoi kakai. A ingainga kaain te kaawa ni kan noria ni karaoi kakai tabeua i buakoia.

E a ueke riki nanoia ngke e nakon te tinakoka Iesu n aron ae e tataneiai iai. E irekereke te botaki are karaoaki ikanne ma te tataro ao te wareware man ana boki Mote n aron ae kakaraoaki n “taian tinakoka ni katoaa te bongi n taabati.” (Mwakuri 15:21) A warekaki naba mwakoro tabeua ni booki ibukin taetae ni burabeti. Ngke e tei Iesu ni wareware, ao e bae ni kinaia aomata aika bati n ririki ake e roroko iai n te tinakoka aei. E anganaki ana nira ni boki te burabeti are Itaia ao e a kunea iai taekan Teuae kabiraki n taamnein Iehova, ae mena n Itaia 61:1, 2.

E wareware Iesu n taekan Teuare e na tataekina kainaomataaia ake a tautoronaki, kaureani mataia aika mataki, ao rokon te ririki ibukin akoan te aba iroun Iehova. E anganako te nira ni boki nakon te tia ibuobuoki ao e tekateka. A a bane ngkai aomata n taraia. E kamaanna teutana ao imwina e taekina te taeka ae kakawaki ni kangai: “N te bong aei ao e a kakoroaki bukin ae kam a tia n ongora mani kibun te Koroboki ae Tabu aei.”​—Ruka 4:21.

A kubanako aomata n “ana taeka aika tamaroa aika nako mai wina,” ao a taku i marenaia: “Tiaki bon natin Ioteba teuaei?” Ma ngke e ataia Iesu bwa a kan noria ni karaoi kakai n aron taekana ake a a tia n ongo, ao e reitia ni kangai: “Kam na bae n taekina nakoiu te taeka aei, ‘Te taokita, kamarurungko i bon iroum,’ ao kam na kangai naba, ‘Ti a tia n ongo taekani baike a karaoaki i Kaberenaum.’ ” (Ruka 4:22, 23) A iangoia kaain ana kaawa Iesu bwa e riai ni moanaki te kakamaiu man ana kaawa ibukini kakabwaiaaia moa kaaina. Ngaia are a bae n iangoia bwa e kakeai bongaia Iesu.

E atai aia iango Iesu ngaia are e a taekin tabeua baike a riki ni karakinan Iteraera rimoa. E taku bwa a bati ngkoa aine ake a a tia ni mate buuia i Iteraera n ana bong Eria ma e aki kanakoaki Eria nakoia. Ma e kawara te aine ae tiaki te I-Iteraera ae e a tia ni mate buuna, i Tarebata ae te kaawa ae uakaan ma Titon ike e a karaoa te kakai ni kakamaiu iai. (1 Uea 17:8-16) N ana bong te burabeti are Eritai a a bati rebera i Iteraera, ma e tii katoka reberan Naaman are te I-Turia.​—2 Uea 5:1, 8-14.

Tera aroia aomata ake n ana kaawa Iesu ake a un n te kabotau ae karakinan rimoa aei are e a kaotaki iai aia bangaomata ao akean aia onimaki? A un aomata ake n te tinakoka ao a teirake ao a ienikuri ni kaotinakoa Iesu man te kaawa. A kairia nakoni katatin te maunga are e tei i aona Natareta, ao a kataia ni kabwakaa mai iai. Ma e reke birinakona mairouia ao e kamanoa. E a nako Kaberenaum ngkai nako meangimaeaoni mataniwin Naman Kariraia.